Azərbaycan-Ermənistan sərhədində Laçın və Qərbi Zəngəzur istiqamətində hərbi eskalasiyadan dərhal sonra Ermənistan Təhlükəsizlik Şurasının katibi Armen Qriqoryan İctimai televiziyanın efirində bildirib ki, İrəvan 1997-ci ildə imzalanmış ikitərəfli sazişə uyğun olaraq Ermənistanın suveren ərazisini müdafiə etmək üçün Moskvaya müraciət edib.
A.Qriqoryanın sözlərinə görə, bu mərhələdə müraciət şifahi şəkildə rəsmiləşdirilib, daha sonra yazılı prosedur həyata keçirilib.
Qriqoryan Ermənistan hökumətinin belə bir prosesin başlanması ilə bağlı cəmiyyəti və tərəfdaşlarını xəbərdar etmək niyyətində olduğunu da bəyan edib.Təhlükəsizlik Şurasının katibi müraciətində vurğulayıb ki, Ermənistan Rusiya və KTMT-nin dəstəyini ala bilməsə, Paşinyan hökuməti digər beynəlxalq tərəfdaşlardan, ABŞ, Fransa və digər NATO üzvlərindən hərbi yardım istəmək hüququnu özündə saxlayır. A.Qriqoryanın sözlərindən aydın olur ki, N.Paşinyan hökuməti Rusiyanın danışıqlar prosesində dominant rolunu etiraf edir.
Ermənistan diplomatiyasının sağa-sola vurnuxması bizim tarixi ərazilərimizə qayıdışımızı ləngidə bilməz
Artıq Ermənistanın Qərbin təklifinə “hə”, Moskvaya isə “yox” dediyinə dair fakt üzə çıxıb. Avropa İttifaqı Şurasının Prezidenti Şarl Mişelin vasitəçiliyi ilə Azərbaycan və Ermənistan liderlərinin dekabrın 15-də görüşəcəyi xəbəri yayıldıqdan sonra Rusiya Prezidenti Vladimir Putinlə Ermənistanın Baş naziri Nikol Paşinyan arasında telefon danışığı olub. Kremlin mətbuat xidmətindən yayımlanan məlumatda bildirilib ki, Putin və Paşinyan 2020-ci ilin 10 noyabr və 2021-ci ilin 11 yanvar tarixlərində imzalanmış üçtərəfli bəyanatların yerinə yetirilməsi kontekstində regiondakı vəziyyətin və onun sabitləşdirilməsi üçün görülən tədbirlərin müzakirəsini davam etdiriblər.
Bu, Putinlə Paşinyan arasında həftə ərzində sayca ikinci telefon danışığı olub.
Hiss olunur ki, Putinin və Paşinyanın bir-birlərindən şübhələnmələri üçün əsasları var. Paşinyan Azərbaycan-Ermənistan sərhədinin müəyyənləşdirilməsi və Zəngəzur dəhlizinin açılması məqsədilə Putinin yanaşmasından, Putin isə Paşinyanın Brüsselin vasitəçiliyi ilə gerçəkləşəcək danışıqlarda ortaya qoyacağı mövqedən narahatdır. Kreml Bakı ilə İrəvan arasında həyata keçirdiyi təkbaşına vasitəçiliyi rəqibi Brüssellə bölüşmək istəmir. Bir çox ekspertlər bu fikirdədir ki, Paşinyan bu cür manevrləri ilə vaxt udur. Bu cür manevrlər azərbaycanlıların işğaldan azad olunan rayonlara “Böyük Qayıdış”ını ləngidə bilərmi?
Əslində, Ermənistan diplomatiyasının sağa-sola vurnuxması bizim tarixi ərazilərimizə qayıdışımızı ləngidə bilməz. Olsa-olsa sülh sazişinin imzalanmasını, sərhədlərin dəqiqləşdirilməsi və kommunikasiyaların bərpasını ləngidə bilər.
Vətən müharibəsindəki qələbədən dərhal sonra Qarabağa qayıdışı qısa zamanda həyata keçirmək üçün yenidənqurma işlərinə başlanıldı. Düşmənin 30 illik işğal dövründə ərazilərimizdə daşı daş üstündə qoymaması ilk vaxtlar bərpa prosesinin bir qədər uzun çəkəcəyilə bağlı qənaət yaratsa da, ölkə başçısının göstərişi ilə Qarabağın dirçəldilməsi istiqamətində atılan addımlar məcburi köçkünlərin yurd-yuvalarına yaxın müddətdə dönəcəyini deməyə əsas verir.
Zəngilanda "ağıllı kənd" proqramına başlanılması və s. ondan xəbər verir ki, qayıdış günü yaxınlaşır
Artıq Füzulidə beynəlxalq hava limanının tikintisi başa çatdı. Prezidentin tapşırığı ilə Füzuli-Cəbrayıl-Zəngilan-Ağbənd dəmir yol xəttinin də yenidən qurulmasına başlanılıb. Azərbaycan dövlət başçısının eyni zamanda Şuşa şəhərində istilik təchizatı sisteminin layihələndirilməsi, tikintisi və quraşdırılması ilə bağlı tədbirlər haqqında da Sərəncamı mövcuddur. Sərəncama əsasən, Şuşa şəhərində növbəti istilik mövsümündə 31 binanın isitmə və isti su ilə təmin edilməsi üçün 2021-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan “Azəristiliktəchizat” Açıq Səhmdar Cəmiyyətinə ilkin olaraq 1 milyon manat vəsait ayrılıb. Bununla paralel olaraq Şuşa şəhər 1 nömrəli tam orta məktəbin layihələndirilməsi və tikintisi məqsədilə Təhsil Nazirliyinə 3 milyon vəsait ayrılıb.
Bəli, ölkə ərazisində bir tərəfdən sadaladığımız quruculuq işləri və hətta daha artığı həyata keçirilir. Digər tərəfdən isə yaxın zamanda ata yurdlarına qayıdacaq vətəndaşlarlarımızın tam təhlükəsizliyini təmin etmək üçün düşməndən mina xəritələrini alma yolunda müdrik siyasət yürüdülür. Artıq diplomatik manevrlərin nəticəsi olaraq Ağdam, Füzuli və Zəngilan rayonlarının mina xəritələri əlimizdədir. Bunlardan yola çıxaraq qeyd edə bilərik ki, ölkədə Qarabağın bərpası, torpaqlarımızdan mənfur düşmənin izlərinin silinməsi üçün bütün güclər səfərbər edilib. Bu isə "Böyük Qayıdış"ın heç də uzaqda olmadığını düşünməyə əsas verir.
Cənab Prezidentin Ağdama səfəri, oradakı bəyanatları, o cümlədən Füzulidə görülən çox mühüm işlər, beynəlxalq hava limanının inşası, Zəngilanda "ağıllı kənd" proqramına başlanılması və s. ondan xəbər verir ki, qayıdış günü yaxınlaşır. Qayıdış üçün birinci təhlükəsizlik, ikinci isə yaşayış şəraiti, iş imkanları lazımdır. Bunların hamısı qrafik üzrə çox ciddi nəzarətlə həyata keçirilir. Zəfər yolu istifadəyə verildi. Şuşaya gedən yolla yanaşı, Qubadlıdan Laçın istiqamətinə də yol çəkilir. Həmçinin Xocavənd, Füzuli, Cəbrayıl rayonu ərazisində ara yollar salınır, yəni işlər çox sürətli gedir. Bu da məcburi köçkünlərin, yəni bizlərin doğma yurd-yuvaməza qayıdışını yaxınlaşdıran amil sayıla bilər.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
