Xaricdəki qüvvələrin həyata keçirdiyi anti-Azərbaycan təbliğatında erməni lobbisinin pulla ələ aldığı muzdlulardan birinin polşalı siyasətçi Tomaş Lex Buçek olduğu məlumdur. Daim Azərbaycan əleyhinə qara piar kampaniyalarında “aktiv” olan Tomaş Azərbaycanın 44 günlük müharibədə qələbəsindən sonra daha da quduzlaşıb.
Erməni pulunun qullarından biri olan və indiyə qədər etdiyi üzqaraldıcı hərəkətlərlə kifayətlənməyən Buçek bir neçə ay əvvəl Azərbaycanı beynəlxalq məhkəməyə vermək üçün petisiya da açmışdı. Tomaş erməni puluna elə aşiq olub ki, Azərbaycan dövləti, xalqı əleyhinə ağzına gələni yazır, danışır. Hətta bu barədə kitablar da çap etdirib. Azərbaycanın əleyhinə yazan, təbliğat aparan polşalı siyasətçi Tomaş Lex Buçekdən erməni mediasi soruşub ki, niyə Ermənistanı və erməniləri müdafiə edirsən, bizi müdafiə edən kitab yazırsan?
Buçekin də cavabı olduqca gülməli və əttökən olub. Əvvəlcə, ermənilərlə polyakların “qardaş”lığından dəm vuran Tomaş “erməni sevgisi”nin ikinci tərəfinin fərdi məsələ ilə bağlı olduğunu deyib. T.L.Buçek deyib ki, guya 1915-ci ildə Musa dağında baş verən “qırğın” zamanı onun müəlliminin həyatını milliyyətcə erməni həkim “qurtarıb”. Ondan sonra müəllimi Tomaşa ermənilərin “tanrı milləti” “olduğunu və “bu millətə bütün həyatı boyu” “borclu olduğu”nu deyib. Guya Buçek Azərbaycan əleyhinə müəlliminin vəsiyyətinə əsasən yazır və bununla da “ermənilərə borcunu qaytarır”.
Əslində, onun Hayastan fondundan və digər erməni fondlarından pul aldığı haqda ciddi faktlar var. Eyni zamanda, Tomaşın Azərbaycan dövlətinin, xalqının, ərazi bütövlüyünün əleyhinə yazdığı, erməniləri “məzlum, əzilən xalq” kimi təqdim etdiyi kitablarınının da xaricdəki erməni lobbisinin sifarişi və maliyəsi ilə yazılıb çap etdirildiyi məlumdur.
“Buçek bir muzdludur və erməni lobbisinin buyruq quludur”
AVCİYA-nın vitse-prezidenti, professor, siyasi şərhçi Məhərrəm Zülfüqarlı “Bakı-Xəbər”ə bildirdi ki, Azərbaycan əleyhinə ermənilərin təbliğatı yeni deyil, uzun illərdir bu proses olub: “Düzdür, biz son zamanlar buna qarşı qətiyyətli mübarizə aparırıq. Ancaq bir şeyi unuduruq ki, hansısa bir polyakın, yaxud başqa bir ölkənin vətəndaşının fərdi qaydada Azərbaycan əleyhinə iş görməsi həmin dövlətin mövqeyini əsk etdirmir. Azərbaycan-Polşa əlaqələri indi də inkişaf edir. Polşa tatarlarının həmişə Azərbaycana sayğısı olub, onlar da Azərbaycan-polyak əlaqələrində mühüm rol oynayıblar. Şəxsən mən özüm də Polşada səfərlərdə olarkən bunu görmüşəm. O ki qaldı ermənipərəst mövqedən çıxış edən muzdlu Buçekə, onun kimiləri hər yerdə var və belələrini pulla alıb-satmaq çox asandır. Buçek bir muzdludur və erməni lobbisinin buyruq quludur. Buçekin qərəzli yazılarından, çıxışlarından aydın olur ki, onun üçün müqəddəs heç nə yoxdur və bu adamın erməni “sevgisi” pul naminədir. Tomaş Lex Buçek aldığı “qonorar” xatirinə ermənilərlə bağlı istənilən əfsanə, mif düzəldib danışa bilər. Mənə elə gəlir ki, Azərbaycanda fəaliyyət göstərən ziyalıların da, bizim də əsas vəzifəmiz o olmalıdır ki, bu cür saxta iddialara, mifik fikirlərə qarşı daim mübarizə aparaq, həqiqətin üzə çıxmasına nail olaq. Tomaş kimi satqınlar Fransada da, dünyanın başqa ölkələrində də var. Amma Azərbaycanı müdafiə edənlər də çoxdur”.
M.Zülfüqarlının sözlərinə görə, Azərbaycan parlamenti xarici ölkələrlə ciddi işləməlidir, amma təəssüflər olsun ki, bu sahədə parlamentin fəaliyyətini müsbət qiymətləndirmək olmaz, deputatların mütləq əksəriyyəti “sukut” mövqeyindədir, bu da xoşagələn hal deyil. Azərbaycan parlamentinin ən azı 60-70 üzvü fəal olmalıdır ki, Tomaş kimi saxtalarlara layiqli cavab verilsin. “Hər bir azərbaycanlı bu işlə məşğul olmalıdır. Çünki erməni təbliğatı, erməni yalanı XIX əsrin sonlarından başlayaraq indiyənə qədər qardaş Türkiyəyə və bizə qarşı davam edir. Qardaş Türkiyəyə və bizə qarşı ermənilər yalanlar uydurmaqdadır”.
M.Zülfüqarlının sözlərinə görə, Tomaşın Musa dağındakı “üsyan”ı qeyd etməsinin hansı məna daşıdığı məlum deyil, amma orada polyakların adı keçmir və bu halda necə “erməni həkim” polyak müəllimin “həyatını qurtarıb”?
M.Zülfüqarlının bildiridiyinə görə, biz bu cür hallara, təxribatlara qarşı birləşməliyik: “Tomaş öz pul sevigisini, erməni pulunun qulu olduğunu ört-basdır etmək üçün bu cür mifik əhvalatlar uydurub. Başqa cür necə ola bilər ki, birdən-birə o bu cür mifik söhbətlərdən bəhs etsin? Bütün hallarda, bu kimi məsələlərə qarşı birləşməliyik ki, belələrinin Azərbaycan haqqında qarayaxma kampaniyalarının qarşısını ala bilək”.
İradə SARIYEVA
