Son bir ildə elə bir beynəlxalq tədbir, rəsmi və qeyri-rəsmi görüş, yığıncaq yoxdur ki, Ermənistan orada “mədəni irs” oyunu oynamasın, beynəlxalq ictimaiyyəti çaşdırmaq üçün uydurma məlumatlarla dəridən-qapıqdan çıxmasın.
Ermənistanın xarici işlər naziri Ararat Mirzoyan Parisə işgüzar səfəri çərçivəsində Fransanın “Le Figaro” nəşrinə müsahibəsində iddia edib ki, guya “Qarabağda ermənilərin tarix və mədəniyyət abidələri Azərbaycan tərəfindən qəsdən məhv edilmə təhlükəsi altındadır”.
Erməni nazir həmçinin deyib ki, beynəlxalq təşkilatların, o cümlədən YUNESKO-nun “humanitar məqsədlər üçün” “Dağlıq Qarabağ”a daxil olması vacibdir. Nazir yenə ənənəsinə sadiq qalaraq çaşdırıcı fikirlər söyləyib, yalandan bildirib ki, guya Şuşadakı “Müqəddəs Xilaskar” kilsəsi PUA-lardan istifadə etməklə “raket atəşinə tutulub”. Mirzoyan açıqlamasının sonunda daha böyük saxtakarlığa yol verərək özündən uydurma rəqəmlər söyləyib. İddia edib ki, guya “Artsaxın 1500-ə yaxın mədəniyyət abidəsi, 19 min muzey eksponatı təhlükə altındadır”. Mirzoyanın Fransa mediasına məsuliyyətiz açıqlaması, absurd yalanları Ermənistanın siyasətinin yalan üzərində qurulduğunu bir daha göstərib. Orada bir soruşan olmayıb ki, ay Mirzoyan, “Artsax” var ki, onun “abidəsi” də olsun?
Ekspertlər deyir ki, Mirzoyanın məqsədi yalan danışmaqla beynəlxalq ictimaiyyəti çaşdırmaq, erməni diasporunu hərəkətə gətirmək və Fransadan daha çox dəstək almaqdır.
“Ermənistanın xarici işlər naziririnin bu cür absurd açıqlamaları...”
Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, BAO başqanının Türk dünyası ilə əlaqələr üzrə müavini, siyasi şərhçi Faiq Ələkbərli “Bakı-Xəbər”ə bildirdi ki, Ermənistan Azərbaycanın mədəni isrinə qarşı törətdiyi soyqırımlara, məhvetmə aktlarına, bir sözlə, bütün müharibə cinayətlərinə görə beynəlxalq aləmdə geniş şəkildə ifşa edilir. Ermənistanın həm beynəlxalq hüquq müstəvisində, həm də beynəlxalq ictimaiyyət qarşısında rüsvayi-cahan edilməsi Ermənistan rəsmilərini yeni yalanlar ixrac etməyə sövq edir. A.Mirzoyanın Fransa mediasına açıqladığı “faktlar”ın da növbəti yalan kampaniyasının tərkib hissəsi olduğunu deyən F.Ələkbərlinin sözlərinə görə, Ermənistan hazırda elə bir vəziyyətdədir ki, bütün gücünü toplayıb bizə qarşı beynəlxalq “hücum” təşkil etmək istəyir, bu səbəbdən də “erməni irsinin”, “xristian irsinin təhlükədə olduğunu” yalandan ortaya atır. “Ermənistanın xarici işlər naziri Ararat Mirzoyanın Fransanın “Le Figaro” nəşrinə müsahibəsi onu göstərir ki, onlar öz çirkin niyyətlərindən əl çəkmək istəmirlər, hələ yalan və böhtanlarına davam edirlər. Mirzoyanın və digər Ermənistan rəsmilərinin “Artsax mədəniyyəti” kimi qələmə verdiyi mədəni irs azərbaycanlıların mədəniyyətidir. Qarabağ ərazisində islamdan əvvəl mövcud olan mədəniyyət də, abidələr də, tarixi-mədəni irs də bütövlükdə Azərbaycan xalqınındır, bu bizə aiddir. İslamdan çox-çox əvvəl də Qarabağda Azərbaycan türkləri yaşayıb, onların dinləri, inancları, məlumdur ki, xristianlıq olub. Qarabağda mövcud olmuş tarixi, maddi-mədəni irsin ermənilərə heç bir aidiyyəti yoxdur. Onlar oradakı xristianlıq dövrü abidələrini qəsdən erməniləşdirir, “erməni-hay” damğası vura bilmədiklərini isə söküb dağıdıblar, yer üzündən siliblər. Mirzoyanın saylarını açıqladığı abidələrin də, muzey eksponatlarının da haylara heç bir aidiyyəti yoxdur. Mirzoyan bilməlidir ki, həmin muzey eksponatları da, abidələr də hayların deyil, hayların son 28-30 ildə azərbaycanlılardan oğurladığı irsdir və buna görə onlar cavab verəcəklər. İşğal dövründə Qarabağdakı bütün xristianlıq dövrü abidələrimiz, o cümlədən də muzey sərvətlərimiz ermənilər tərəfindən mənimsənilib. Bu isə böyük cinayətdir. Mirzoyan kimiləri bu cür sərsəm və əsası olmayan açıqlamalarla heç nə əldə edə bilməyəcək. Bu cür əsassız, yalan bəyanatlarla Ermənistanın, ermənilərin çirkin mahiyyətini ortaya qoyurlar. Ermənistanın xarici işlər naziririnin bu cür absurd açıqlamaları Azərbaycan-Ermənistan münasibətlərinin normallaşmasına zərər verir. Mirzoyan bu sərsəmləmələrlə gələcəkdə münasibətlərimizin dirçəldilməsinə qəsdən zərbə vurur”.
F.Ələkbərlinin sözlərinə görə, belə açıqlamalar nə Ermənistana, nə Mirzoyana, nə də onların havadarlarına bir xeyir verəcək. F.Ələkbərlinin qeyd etdiyinə görə, eyni zamanda oradakı mədəniyyətlərin məhv olması birbaşa Ermənistan və onların havadarları tərəfindən həyata keçirilib: “Ermənistan Azərbaycanı nə üçün ittiham etdiyini heç özü də bilmir. Faktiki olaraq, nəinki Qarabağda, eləcə də indiki Ermənistan ərazisində Azərbaycana aid mədəniyyət dünyanın gözü qarşısında dağıdılıb, assimilyasiya edilib, lakin heç bir beynəlxalq təşkilat bu cinayətə reaksiya verməyib. Amma gördüyümüz kimi, ermənilərə və onların havadarlarına isə Azərbaycana qarşı apardıqları şər kampaniyasına şərait yaradırlar. Bütün bunlar heç nəyi dəyişməyəcək. Çünki tarix gec-tez öz həqiqi üzünü ortaya qoyur”.
İradə SARIYEVA
