Qarabağ məsələsi ilə bağlı öz üzərinə vasitəçilik missiyasını götürən Fransa yenə də ermənilərə və xüsusilə də separatçılara açıq dəstəyini verir. Parisdən Azərbaycan cəmiyyətində qıcıq yaradacaq xəbərlər daxil olur. Belə ki, Rusiya sülhməramlı qüvvələrinin məsuliyyət zonasında fəaliyyət göstərən oyuncaq “dqr hökumətinin” bəzi nümayəndələrinin Fransaya “işgüzar səfəri” haqda erməni qaynaqları xəbər yayıb. Xankəndidən olan Xanumyanı və Tovmasyanı Fransada "rəsmi qonaq" kimi qəbul ediblər. Onlardan biri özünü "nazir", digəri "parlament spikeri" adlandırır...
Bu xəbərlərə əsasən, həmin oyuncaq “hökumətin” “ərazi və infrastrukturun idarəedilməsi naziri” Hayk Xanumyan və qondarma “dqr parlamentinin spikeri” Artur Tovmasyan noyabrın 15-dən 19-na qədər Fransada səfərdə olub. Xankəndidən olan “nazir” və “parlament spikeri” noyabrın 15-də Fransanın Aix-Marseille-Provence Metropoliyasının rəhbəri Martine Vassale, noyabrın 17-də Fransanın Milli Assambleyasındakı həmin qondarma ”dərnəyin” rəhbəri François Pupponi ilə görüşüb. Bu görüşdə deputatlar Florence Provendier və İsabelle Santiaqo da iştirak edib. Yenə də noyabrın 17-də Xanumyan və Tovmasyan Alfortville şəhərinin meriyasında mer Luc Carvounas ilə görüşüblər, ertəsi gün isə onları Fransa Senatında Respublikaçılar qrupunun rəhbəri, senator Bruno Retailleau qəbul edib. Noyabrın 19-da isə Xankəndidən getmiş separatçıları Valense şəhərinin meri Nicolas Daragon qəbul edib. Görüşdə, həmçinin, Bourg-Lès-Valence şəhərinin meri Marlène Mourier, Valence şəhər merinin 1-ci müavini Véronique Pugeat və Montelimar şəhəri merinin 1-ci müavini Marie-Christine Magnanon iştirak edib. Həmin gün Xanumyanla Tovmasyanı Fransanın İsere Departamentinin rəhbəri Jean-Pierre Barbier də qəbul edib. Fransanın bəzi şəhərlərinin yerli idarəetmə orqanlarının Azərbaycan ərazilərinin bir hissəsində qurulmuş bu oyuncaq rejimin nümayəndələrini “rəsmi qonaq” qismində qəbul etməsinə hansı adı vermək olar?
Qeyd edək ki, 44 günlük müharibədən əvvəl də Fransaya analoji səfərlər təşkil edilirdi. Həmin vaxt Fransa bunun rəsmi dəvət əsasında reallaşmadığını bəyan edirdi. Çox maraqlıdır, niyə Fransanın əlaqədar qurumları yerli idarəetmə orqanlarına separatçıları “rəsmi qonaq” statusunda dəvət etməməyin zərərli olması ilə bağlı xəbərdarlıq etməyib?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Fransanın separatizminə dəstək verməsi yeni hadisə deyil: “Bundan əvvəl də qondarma qurumun “rəsmi şəxsləri” Fransada yüksək şəraitdə qəbul olunub. Hazırda Paris həmin siyasətini davam etdirir. Maraqlıdır ki, Fransa kiçik dövlətlərdə baş qaldıran separatizm meyllərini daim dəstəkləyir. Biz bunu Kosovoda da gördük. Ancaq İspaniyada baş qaldıran Kataloniya separatizminə qarşı kəskin mövqe tutdu. Avropa Birliyinin lider dövlətlərindən biri kimi Kataloniyada keçirilən referendumun nəticələrini tanımamaq barədə qərar qəbul etdi. Separatist hərəkətlərə yol verənlərə qarşı cəza tədbirlərinin görülməsini dəstəklədi. İspaniyanı bununla bağlı ən kəskin addımlar atmağa həvəsləndirdi. Fransa parlamenti “Dağlıq Qarabağ Respublikası”nı tanımaqla bağlı hökumətə müraciət edib. Bu məsələnin müzakirəsinə razılıq verilməsəydi, həmin məsələ parlamentdə heç müzakirəyə çıxarılmazdı. Sonra da dedi ki, qondarma qurumun tanınması Fransanın və Ermənistanın maraqlarına cavab vermir, çünki beynəlxalq hüquqa ziddir. Buna baxmayaraq, məsələni gündəmə gətirdi. Düşündülər ki, müxtəlif dövlətlərin parlamentləri də bənzər addımlar atar. Ancaq düşündükləri olmadı. Çox təəssüf ki, Fransa belə meylləri davam etdirir və bundan sonra da edəcəyinə şübhə qalmır. Azərbaycan diplomatiyası çox ustalıqla bu təhlükələri sovuşdura bilib. Biz bu xətti davam etdirməliyik. Bir an belə arxayınlaşmadan sülh müqaviləsinin imzalanması istiqamətində addımlarımızı atmalıyıq və Qarabağ məsələsini birdəfəlik gündəmdən çıxarmalyıq”.
Məhəmmədəli QƏRİBLİ
