Erməni mediasının yaydığı məlumata görə, Avropa Parlamentinin 33 deputatı Azərbaycanın Ermənistana “təcavüzünü” pisləyib .
Qeyd edilir ki, AP deputatları Avropa İttifaqının xarici və təhlükəsizlik məsələləri üzrə ali nümayəndəsi Cozef Borelə bununla bağlı məktub göndəriblər.
Məktubda Azərbaycan Silahlı Qüvvələrinin Ermənistandan çıxarılması tələb olunur: “Noyabrın 16-da Azərbaycan Silahlı Qüvvələri Ermənistan Respublikasının şərq sərhədi boyunca hücuma keçib. Avropa Parlamentinin üzvləri kimi biz Azərbaycanın Ermənistan Respublikasının suveren ərazisinə hücumunu və ora soxulmasını pisləyirik”.
Müraciətdə utanmadan onu da qeyd ediblər ki, guya Azərbaycanın günahı üzündən 10 noyabr 2020-ci il atəşkəs bəyanatı pozulub və bölgədəki kövrək sülh ciddi şəkildə təhdidlə üzləşib: “Azərbaycanın Silahlı Qüvvələri dərhal və tamamilə Ermənistan ərazisindən çıxarılmalıdır”.
Görünən odur ki, Avroparlametin bəzi deputatları erməni lobbisinin təsirindən çıxa bilmirlər. Azərbaycan məgər Ermənistan ərazisinə daxil olub?
“Onlar emənilərə “ayı xidməti” göstərirlər və bunun öz qiyməti var”
Məsələyə münasibət bildirən millət vəkili, politoloq Elman Nəsirovun fikrincə, Avropa Parlementində bəzi deputatların erməni lobbisinin əlində alət olması təəssüf doğurur: “AP-nin bir sıra deputatları öz davranışları ilə bir daha göstərdilər ki, onlar erməni lobbisinin çox ciddi təsiri altındadılar. Bununla onlar emənilərə ayı xidməti göstərirlər. Sözügedən xidmətin də öz qiyməti var. Heç bir ciddi əsas olmadan Avropa İttifaqının xarici və təhlükəsizlik məsələləri üzrə ali nümayəndəsi Cozef Borelə şikayət edirlər. Bu minvalla onun Azərbaycana təzyiq göstərməsini istəyirlər. Guya bizim Silahlı Qüvvələrimiz Ermənistan ərazisinə daxil olub və oradan çıxarılmalıdır. Belə ədalətsizlikləri gördükcə Avropa demokratiyasının böhran keçirdiyinə bir daha əmin olursan. Çünki 30 il ərzində Azərbaycan əraziləri işğal altında qaldı, amma bir dəfə Avroparlament bununla bağlı kəskin mövqe ortaya qoymadı. Bir dəfə də olsun Ermənistana qarşı təzyiq vasitələrini işə salmadı. Hansısa sanksiyalarla, embarqolarla çıxış etmədi. Bütün bunlar bir daha onu göstərir ki, ikili standartlar baş alıb gedir. Həmin 33 deputat Avropa maraqlarına yox, əslində dar erməni maraqlarına xidmət edir. Bu da elə-belə olmur. Bütün bunlar haqqı ödənilmiş xidmətdir. O baxımdan hesab edirəm ki, həmin deputatların fəaliyyəti araşdırılsa, qanunazidd xeyli məqamlar ortaya çıxacaq. Hətta bir sıra hallarda cinayətkarlıqla bağlı məqamlar ortaya çıxacaq”.
Millət vəkili onu da əlavə etdi ki, Ermənistan tərəfi bu cür cılız vasitələrlə nəyəsə nail ola bilməyəcək.
Vidadi ORDAHALLI
