17 noyabr 2021-ci il tarixində YUNESKO Baş Konfransının davam edən 41-ci sessiyası çərçivəsində YUNESKO İcraiyyə Şurasının 2021-2025-ci illər üzrə üzvlüyünə seçkilər keçirilib. Azərbaycan UNESCO-nun İcraiyyə Şurasına üzv seçilib. Əlbəttə, bu, ölkəmizin növbəti uğurudur.
Məsələ burasındadır ki, təcavüzkar, mədəni irs canisi Ermənistan da YUNESKO İcraiyyə Şurasının 2021-2025-ci illər üzrə üzvlüyünə iddialı olduğunu açıqlamışdı. Ermənistan təmsilçiləri ölkələrinin YUNESKO İcraiyyə Şurasına üzv seçiləcəyinə əmin olduqlarını deyirdilər.
Azərbaycan Mədəniyyət Nazirliyindəki mənbələrimizdən əldə etdiyimiz məlumata görə, Azərbaycanla paralel olaraq Ermənistan da YUNESKO İcraiyyə Şurasına üzv seçilib.
Düzdür, hələ bu xəbərə Ermənistan mətbuatında rast gəlməmişik. Amma məlumatlı mənbə seçildiyini deyir. Bütün hallarda, YUNESKO Baş Konfransının davam edən 41-ci sessiyası başa çatandan sonra YUNESKO İcraiyyə Şurasına üzv seçilən ölkələrin siyahısı dərc ediləcək…İlkin məlumatımız belədir ki, Ermənistan da şuraya üzv seçilib, amma çox təəssüf, Azərbaycan nümayəndələri bunun qarşısımı ala bilməyib.
Ermənistanın YUNESKO İcraiyyə Şurasına üzv seçilməsi bu təşkilatın ikiüzlü siyasət yürütməsinin təzahürüdür. YUNESKO-nun bu məsələdə Azərbaycanla Ermənistan arasında balans yaratmasına ehtiyac yoxdur. Yəni təşkilatın “Azərbaycanla Ermənistan arasında qarşıdurma mövcuddursa, birini qəbul edərik o biri inciyər” kimi yanaşması, süni balans yaratması, belə bir prinsiplə işləməsi düzgün deyil. Hazırda YUNESKO bu prinsiplə işləyir.
Ermənistan Azərbaycanın mədəni sərvətlərini, maddi-mədəni irsini, tarixi, dini abidələrini məhv edib, dağıdıb. Ermənistan Azərbaycanın 67-dən çox məscidini yerlə yeksan edib.
Ekspertlərin fikrincə, YUNESKO-nun süni balans yaratmaq naminə İcraiyyə Şurasına Azərbaycanla Ermənistanı birgə qəbul etməsi təcavüzkara verilən dəstəkdir. YUNESKO bu addımı ilə təcavüzkar Ermənistanın mədəni irs cinayətlərinə, soyqırımlarına bəraət qazandırmış olub.
Ənvər Çingizoğlu: “Azərbaycanla Ermənistanı bir tərəzinin gözünə qoymaq, təcavüzkarla təcavüzə məruz qalanı bir səviyyədə tutmaq YUNESKO-nun əsl simasını göstərir”
Tarixçi-etnoqraf Ənvər Çingizoğlu bizimlə söhbətində bildirdi ki, YUNESKO Azərbaycanla Ermənistanı eyni tərəzinin gözünə qoyubsa, bu, sözügedən təşkilatın növbəti anti-Azərbaycan davranışının təzahürüdür. Ə.Çingizoğlunun sözlərinə görə, Ermənistan 30 il müddətində Azərbaycanın maddi-mədəni, tarixi, dini abidələrini dağıdıb, talan edib, amma indiyə qədər YUNESKO-nun səsi çıxmayıb. Ekspertin bildirdiyinə görə, təcavüzkarla təcavüzə məruz qalanın bir səviyyədə tutulması o təşkilatın nüfuzuna, obyektivliyinə ciddi zərər vurur. “Azərbaycanla Ermənistanın bir tərəzinin gözünə qoymaq, təcavüzkarla təcavüzə məruz qalanı bir səviyyədə tutmaq YUNESKO-nun əsl simasını göstərir. Azərbaycanla Ermənistanın YUNESKO İcraiyyə Şurasına eyni zamanda üzv qəbul edilməsi onu göstərir ki, bu təşkilat ermənipərəstliyindən bir addım da olsun geri çəkilməyib və çəkilməyəcək də. Süni balans yaratmaq üçün Azərbaycan məscidlərini dağıdan, donuzxanaya çevirən, mədəni irsimizi soyqırıma məruz qoyan Ermənistanın da YUNESKO İcraiyyə Şurasına üzv seçilməsinə şərait yaradılması çox mənfi haldır”.
Ə.Çingizoğlunun sözlərinə görə, bu məsələdə YUNESKO-nun “xətir üstə xəstə yatması” heç cür qəbul edilən deyil.
Rizvan Hüseynov: “…Bu böyük bir haqsızlıqdır”
Qafqaz Tarixi Mərkəzinin rəhbəri Rizvan Hüseynov da “Bakı-Xəbər”ə bildirdi ki, bu böyük bir haqsızlıqdır: “Sözsüz ki, bu böyük bir haqsızlıqdır. Azərbaycan ərazisində, Qarabağda Ermənistanın saysız tarixi-mədəni abidə dağıtması, xüsusən də dini abidələri məhv etməsi YUNESKO tərəfindən nəzərə alınmayıbsa və YUNESKO İcraiyyə Şurasına hər iki tərəf seçilibsə, heç olmasa YUNESKO bu səviyyədə yeni müzakirələr təşkil etməlidir ki, həmin müzakirələrdə Azərbaycan və Ermənistan tərəfi bir-birinə öz fikirlərini bildirsin. Bəllidir ki, Azərbaycanın deyiləsi çoxlu sözü, göstəriləsi çoxlu faktları var. Heç şübhə yoxdur ki, Ermənistan tərəfi bu dialoqdan qaçacaq. Amma bu müzakirə lazımdır. Xüsusən də haqsızlıq edilərək Ermənistan da Azərbaycanla paralel YUNESKO İcraiyyə Şurasına üzv seçilibsə, Azərbaycan belə bir təşəbbüslə çıxış etməlidir ki, həmin səviyyədə açıq, yaxud ekspert şurası səviyyəsində bir müzakirə açılısın. Azərbaycan ərazisində, Qarabağda olan dini abiədələr və irs məsələsi müzakirəyə çıxarılsın. Bu təşəbbüs mətbuatda da yayılmalıdır. Əgər bu müzakirələrdən erməni tərəfi imtina etsə, bu da bizim üçün bir qələbə olardı, razılıq versə də həmçinin bizim bir qələbəmiz olacaq” - deyə R.Hüseynov qeyd etdi.
İradə SARIYEVA
