18 noyabr 2021-ci il tarixində BMT Baş Assambleyasının 76-cı sessiyası çərçivəsində Assambleyanın Üçüncü Komitəsində Qoşulmama Hərəkatının sədri qismində Azərbaycan Prezidentinin təşəbbüsü ilə QH üzvləri adından irəli sürülmüş “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə BMT üzv dövlətləri tərəfindən qəbul edilib.
Xarici İşlər Nazirliyindən Trend-ə verilən məlumata görə, qətnaməyə 126 BMT üzvü dövlət həmmüəllif qismində qoşulub.
Qeyd edilir ki, kifayət qədər müfəssəl məzmunda olan qətnamədə, digər məsələlərlə yanaşı, COVID-19 pandemiyasına qarşı mübarizə sahəsində həyata keçirilmiş bir sıra əhəmiyyətli qlobal təşəbbüslər, o cümlədən Azərbaycan Prezidentinin təşəbbüsü ilə 3-4 dekabr 2020-ci il tarixində keçirilmiş BMT Baş Assambleyasının COVID-19-a qarşı mübarizəyə həsr olunmuş xüsusi sessiyası alqışlanır: “İnkişaf etmiş və inkişaf etməkdə olan ölkələr arasında COVID-19 əleyhinə peyvəndlərin bölgüsündə mövcud olan bərabərsizlikdən ciddi narahatlıq ifadə edilir və bunun Dayanıqlı İnkişaf Məqsədlərinin icrasına əngəl törədən başlıca faktorlardan biri olduğu vurğulanır.
COVID-19-a qarşı mübarizədə çoxtərəfliliyin, eləcə də beynəlxalq həmrəylik və əməkdaşlığın əhəmiyyətinə xüsusi vurğu edilir. Bu xüsusda, bütün dövlətlər, özəl şirkətlər və digər aktorlar COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi istiqamətində konkret tədbirlər görməyə çağırılır.
Bütün dövlətlər COVID-19 əleyhinə peyvəndlərin ixracı ilə bağlı mövcud olan əsassız maneələri aradan qaldırmağa və peyvəndlərin hazırlanması və səmərəli paylanması sahəsində əməkdaşlığa dəvət olunur.
BMT Baş Katibinə Baş Assambleyanın növbəti sessiyasına hazırkı qətnamənin icrası ilə bağlı hesabat təqdim etməsi tapşırılır.
Sözügedən qətnamənin qəbulu Azərbaycan Respublikası Prezidentinin sədrliyi ilə Qoşulmama Hərəkatının COVID-19 pandemiyasına qarşı mübarizədə qlobal səylərin mərkəzində olmağa davam etdiyinin daha bir göstəricisi olmuşdur", - deyə məlumatda qeyd edilir.
“Müasir İnkişaf” Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, Qoşulmama Hərəkatının sədri qismində Azərbaycan Respublikası Prezidentinin təşəbbüsü ilə QH üzvləri adından irəli sürülmüş “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə BMT üzv dövlətləri tərəfindən qəbul edilməsi çox mühüm hadisədir. M.Göyüşlü hesab edir ki, Azərbaycan Prezidenti COVID-19 panemiyası meydana gələndən inidyə qədər bütün bəşəriyyəti düşündüyünü ortaya qoyub və pandemiyadan çıxış yolları, üsulları təklif edib. M.Göyüşlünün sözlərinə görə, dünya liderləri arasında peyvəndlərin ədalətsiz bölgüsünə ilk etiraz edən Azərbaycan Prezidenti olub və “peyvənd şovinzminə” son qoyulması barədə fikirlərini bildirib və bütün beynəlxalq təşkilatları, dövlətləri peyvənd ayrıseçkiliyinə dair mübarizədə həmrəyliyə səsləyib. “Azərbaycan Prezidentinin təşəbbüsü ilə belə vacib bir sənədin qəbul edilməsi mühüm hadisədir. BMT kimi nüfuzlu bir təşkilatın komitəsində qəbul edilən bu qətnamə bütün bəşəriyyətin maraqlarına xidmət edir. Azərbaycan Prezidenti son illər daim “vaksin millətçiliyi”nə qarşı çağırışlar edirdi ki, iqtisadi cəhətdən güclü, imkanlı olan bəzi ölkələr kasıb ölkələrə qarşı yürütdüyü ayrıseçkilik siyasətini dayandırmalıdır. Qoşulmama Hərəkatının sədri olaraq Azərbaycan tərəfindən dəfələrlə bu məsələ qaldırılırdı ki, “peyvənd millətçiliyi” yanlış tendensiyadır və bu, ciddi problemlər yarada bilər. Hər zaman da Azərbaycan tərəfindən bu problemi yaradanlar tənqid olunurdu. Bəlkə də kənardan olan bəzi müşahidəçilərdə belə təəssüratlar yarana bilərdi ki, bu fikirlər sadəcə səsləndirilir. Azərbaycan Prezidentinin təşəbbüsü ilə bu qətnamənin qəbul edilməsi onu göstərir ki, Azərbaycan dövləti, dövlət başçısı sözdə dediklərinin əməldə də, reallıqda da həyata keçirilməsi üçün çoxşaxəli, çoxtərəfli işlər aparır. Bu qətnamənin qəbul edilməsi onun nəticəsidir ki, Prezident İlham Əliyevin səsləndirdiyi hər bir fikir, irəli sürdüyü hər bir təşəbbüs ümumbəşəri maraqları əhatə edir, bu baxımdan da onun hər bir addımı belə yüksək səviyyədə qarşılanır. COVID-19 pandemiyası nəinki Azərbaycan üçün, bütün dünya üçün böyük təhdidlər yaradıb. Bununla da yeganə mübarizə yolu kimi ÜST kütləvi peyvəndləməni göstərir. Peyvəndlərin də qiyməti hər ölkə üçün əlçatan deyilsə, onda demək bizim bu bəla ilə vidalaşmağımız üçün illər tələb olunacaq. Bu isə bütün dünya üçün narahatedici bir məsələdir. Bir ölkə peyvəndlə təmin olunursa, o biri kənarda qalırsa, bu ədalətli deyil. Hesab edirəm ki, BMT Prezident İlham Əliyevin təşəbbüsü ilə irəli sürülən qətnaməni qəbul etməklə dünya ölkələrini “peyvənd millətçiliyinə” qarşı vahid müstəvidə birləşdirdi”-deyə M.Göyüşlü qeyd etdi.
İradə SARIYEVA
