Bu günlərdə Milli Məclisdə bəzi deputatların imtiyazların artırılması, kirayədə yaşayan deputatlara verilən kirayə haqqının həcminin yüksəldilməsi tələbi ilə çıxış etməsi ölkədə böyük narazlıq yaratdı.
Həmin mövzu ilə bağlı əməkdaşımızla söhbətində Böyük Dayaq Partiyasının sədri Mirkazım Seyidov “Bakı-Xəbər”ə çox maraqlı bir fakt açıqlayıb. Partiya sədri “...Bundan əvvəl xəbər yayıldı ki, Milli Məclisin deputatları öz həyatlarını 103 min 920 manata sığorta edirlər. Hərbçinin həyatını isə cəmi 11 min manata sığorta edirik” - deməklə diqqətimizi bu mühüm fakta çəkib... Deputatların öz həyatlarını 103 min 920 manata sığorta edirməsi faktı həqiqətən də anormal bir haldır. Necə olur ki, işi-gücü var-dövlət davası döymək, imtiyazlar, evlər, maşınlar tələb etmək olan (təbii ki, bütün deputatlar nəzərdə tutulmur) deputatlar öz həyatlarını 103 min 920 manata sığorta edirlər, amma qarda, soyuqda Vətəni qoruyan, canını torpaq uğrunda qurban edən hərbçinin həyatı isə cəmi 11 min manata sığorta edilir? Bu necə olur və nə dərəcədə ədalətlidir?
İbrahim Rüstəmli: “...Cəmiyyətdə belə rəy formalaşıb ki, deputatlar heç nə ilə məşğul olmur, ona görə də, nə üçün onun sığorta pulu hərbi qulluqçunun sığorta pulundan çox olmalıdır”
Hərbi ekspert İbrahim Rüstəmli “Bakı-Xəbər”ə bildirdi ki, ordu həddən artıq böyük kontingentdir: “Azərbaycan Ordusunun hərbi qulluqçuları Azərbaycan Prezidentinin Ehtiyat Fondundan sığortalanıblar. Azərbaycan Prezidentinin Ehtiyat Fondundan 11 min manat həcmində sığortalanmışıq. Mən özüm də sığortalanmış ordu mənsublarından biri olmuşam və sığorta pulumu da almışam.
Bu gün mütəxəssəslərin deputatların özlərini hansı məbləğdə sığortaladığını gündəmə gətirməsi və bu faktı hərbi qulluqçuların sığortalandığı məbləğlə müqayisə etməsi bəzi deputatların sərgilədiyi xoşagəlməz davranışlarla bağlıdır. Çünki kresloda yatan, illərlə səsi eşidilməyən deputatlar var. Bu cür məsələlər insanların emosional duyğularına təsir edir və nəticədə də bu cür müqayisə ortaya çıxır. Deputatların özlərini neçə min manata sığortalatdığını deyə bilmərəm. Amma sizə tam əminliklə deyə bilərəm ki, Azərbaycan ordusunun şəxsi heyəti şəxsən Ali Baş Komandanımız tərəfindən daim diqqətdədir. Şəxsən mən ehtiyatda olan bir polkovnik-leytinant kimi dövlətin qayğısını hər an hiss edirəm”.
İ.Rüstəmlinin sözlərinə görə, bəzi deputatların sərgilədiyi xoşagəlməz davranışlar camaat arasında istər-istəməz narazılıq, narahatlıq yaradır. Ekspert bildirdi ki, ictimaiyyət deputatın maaşının hərbçinin maaşından artıq olmasından qıcıqlanır. “Narazılığa səbəb bəzi deputatların davranışlarıdır. Belələrinin hərəkətləri camaatda deputat statusuna qarşı qıcıq yaradıb. Amma deyim ki, bizim çox yaxşı, ləyaqətli deputatlarımız da var. Bəzi deputatlara görə cəmiyyətdə belə rəy formalaşıb ki, deputatlar heç nə ilə məşğul olmur, ona görə də, nə üçün onun sığorta pulu hərbi qulluqçunun sığorta pulundan çox olmalıdır. Amma yenə də deyirəm, hərbi qulluqçular ölkə başçsının şəxsi qayğısı ilə əhatə olunub, öz əsgərini, hərbçisini cənab Prezident qədər çox sevən ikinci bir dövlıət başçısı tanımıram” .
İ.Rüstəmli sonda təklif etdi ki, cəbhədə, ağır coğrafi iqlim şəraitində xidmət edən zabitlərimiz, müddətdən artıq xidmət edən hərbi qulluqçularımızın, gizirlərimizin maaşı 5 qat artırılsın, onlar bunu haqq edir.
Natiq Cəfərli: “Azərbaycan hərbçilərinin həyat sığortasının 11 min manat olması...”
İqtisadçı Natiq Cəfərlinin sözlərinə görə isə, hərbçilərin həyat sığortasının məbləği artırılmalıdır: “Azərbaycan hərbçilərinin həyat sığortasının 11 min manat olması çox aşağı göstəricidir. Bu, illər əvvəl təyin edilmiş bir məbləğdir. Burada son illər baş verən inflyasiya, manatın alıcılıq qabiliyyətinin düşməsi nəzərə alınmayıb. Bunlar indeksləşdirilməlidir. Hərbi qulluqçulara həyat sığortasını nə qədər yüksək etsək də yenə də azdır. Millət, xalq olaraq onların ailə vəziyyəti ilə bağlı sosial problemlərini həll etmək bizim boynumuzun borcudur. Ona görə də, parlamentdə olan deputatların həyat sığortası başqa alqoritmlə hesablandığından, onun hansı səviyyədə olması məni o qədər də maraqlandırmır. Amma məhz hərbiçlərin həyat sığortasının hətta bir neçə dəfə artırılmasına ehtiyac var”.
N.Cəfərlinin sözlərinə görə, nəzərə almaq lazımdır ki, bu illər ərzində infiliyasiya rəqəmləri həmin o göstəricidə öz əksini tapmayıb, bu mütləq indeksləşdirilməli və bir neçə dəfə artırılmalıdır.
İradə SARIYEVA
