Avropa Xalq Partiyası Ermənistan-Azərbaycan sərhədində baş verən son gərginliklə bağlı bəyanat yayıb. Partiya baş verən son hadisələrə görə narahatlığını ifadə edir və tərəfləri sülh və təhlükəsizlik qaydalarına əməl etməyə çağırır.
Maraqlıdır ki, partiya bəyanatının sonunda “münaqişənin” həllində beynəlxalq nizamlama mexanizmlərinin tətbiqinin zəruriliyinə işarə edir və bu xüsusda ATƏT-in Minsk Qrupu həmsədrlərinin adını çəkir. Göründüyü kimi, əslində neytrallığı qorumalı olan partiya birmənalı şəkildə Ermənistanın mövqeyindən çıxış edir. Bizim qəbul etmədiyimiz tezisləri dövriyəyə buraxır. Münaqişənin mövcudluğundan, həmsədrlərin fəaliyyətinin zəruriliyindən danışır. Görünür, bunun bir səbəbi də Ermənistandakı siyasi partiyaların Avropa Partiyası ilə sıx əlaqədə işləməsi ilə bağlıdır. Bəs, Azərbaycandakı partiyaların necə, Avropa Partiyası ilə əlaqəsi varmı?
Azərbaycanın ilk siyasi partiyası kimi qeydiyyatdan keçən və Avropadakı qurumlarla ciddi əlaqəsi olan Azərbaycan Milli İstiqlal Partiyasının (AMİP) Beynəlxalq əlaqələr üzrə sədr müavini Elşən Mustafayev “Bakı-Xəbər”ə açıqlamasında bildirdi ki, sözügedən partiya yalnız Avropa İttifaqı hüdudlarında fəaliyyət göstərən partiyaların ittifaqıdır: “Daha dəqiq ifadə etsək, müxtəlif ölkələrdən olan və Avropa Parlamentində təmsil olunan deputaların yaratdığı bir ittifaqdır. Avropa Parlamentində ən böyük fraksiyalardan biri sayılır. Azərbaycandan heç bir partiya həmin ittifaqın üzvü deyil. Ancaq AMİP 10 ildən artıqdır ki, onlarla əməkdaşlıq edir. Bizim ora üzv olmaqla bağlı məsələmiz hazırda da gündəmdədir. Məndə olan dəqiq məlumata görə, YAP da ora ilə əməkdaşlıq edirdi. Hər iki partiyanın həmin quruma üzv olmaq perspektivi var idi. Ancaq onların nizamnaməsinə görə, Avropa Xalq Partiyasına üz olan partiya öz ölkəsində, ən azı bir nəfərlə də olsa, parlamentdə təmsil olunmalıdır. AMİP kimi biz nə qədər əməkdaşlıq etsək də, öz ölkəmizin parlamentində təmsilçiliyimiz olmadığı üçün ora üzv ola bilmirik. Ermənistan isə uzun illərdi orada iki partiya ilə təmsil olunur. Bu da onlara müəyyən qruplara təsir etmək kimi imkanı qazandırır. Təsir imkanlarımız buna görə zəifdir. Avropa Xalq Partiyasında Fransanının dominant mövqeyi də var. Erməniləri açıq dəstəkləməklərinin altında bu maraqlar da durur. Bunun günahını indiyə kimi bizim parlamentə düşməyimizə əngəl olanlarda görürəm. 2015-ci ildən sonra YAP ora ilə əməkdaşlığı dayandırıb. Əminəm ki, biz orada təmsil olunsaydıq, YAP-ın da üzvlüyünə şərait yaradacaqdıq. Üzv olmasaq belə, həmin qurumla əlaqələrimiz yüksək səviyyədədir. Hətta elə olub ki, ölkəmizlə bağlı kəskin bəyanatların verilməsi perspektivini görüb, dostlarımız vasitəsilə prosesi əngəlləmişik. İndi görün biz həmin təşkilatın daxilində olsaq nələr edə bilərik. Biz Beynəlxalq Demokrat İttifaqının üzvüyük. Avropa Xalq Partiyası da eyni hüquqlarla həmin təşkilatın üzvüdür. Biz həmin ittifaq vasitəsilə də ora təsirlər edirik. Ümid edirik ki, yaxın seçkilərdə bizim parlamentdəki təmsilçiliyimizə əngəl yaradılmaz və biz həmin qurumda təmsil olunarıq. Dediyiniz məsələ ilə bağlı da həmin quruma öz mövqeyimizi bildirəcəyik. Orada təmsilçilərimiz olmadığı üçün balansı poza bilirlər”.
Məhəmmədəli QƏRİBLİ
