Ermənistan baş naziri Nikol Paşinyan sərhəddəki təxribatlardan sonra, sanki aldığı dərsdən nəticə çıxaran adam görkəmini alıb. O deyib ki, Ermənistan uzun illər Dağlıq Qarabağ məsələsində beynəlxalq ictimaiyyətin mövqeyini ədalətsiz hesab edib və Azərbaycanın mövqeyinə qulaq asmayıb.
Onun sözlərinə görə, nəticədə müəyyən andan etibarən artıq Ermənistanın özünün də mövqeyi beynəlxalq ictimaiyyət tərəfindən qəbul olunmur: “İndi sual olunur ki, biz qərar qəbul etmək istəyirik, ya yox? Ermənistan hökumətinin missiyası qərar qəbul etməkdir. Amma deyilənlər o demək deyil ki, istənilən bir həll bizim üçün məqbuldur. Beynəlxalq ictimaiyyət Ermənistan və Azərbaycanın daimi şikayətlərindən sadəcə olaraq yorulub. Və kobud desək, hər iki tərəfi nəhayət öz aralarında razılığa gəlməyə və ortaq dil tapmağa çağırır. Niyə bizə elə gəlir ki, bütün dünya problem və qayğılarımızla yaşamalıdır? Bəlkə də bəzi problemlərimizi özümüzün həll etməyimizin vaxtıdır. Dünya ictimaiyyəti də bizə təxminən bunu deyir”.
Bununla Paşinyan vasitəçilər olmadan danışıqların baş tutması ilə bağlı təklif irəli sürür. Ancaq digər tərəfdən, Minsk Qrupunun yaxasını buraxmır. Paşinyanın təkbətək görüş təklifi realdır, yoxsa vaxt qazanmaq üçün növbəti blefdir?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, beynəlxalq ictimaiyyətin tərəflərin şikayətlərindən bezməsi haqda səslənən fikirdə, tam da olmasa, 50 faiz həqiqət var: “Əslində dünya Ermənistanın sızlamasından, ağlamasından cana doyub. Təklif olunan variantlardan biri də tərəflərin öz aralarında danışıb razılığa gəlməsidir. Güman edirəm ki, Paşinyan bu fikirləri səsləndirməkdə qeyri-səmimi deyil. Dəfələrlə deyib ki, birbaşa danışıq istəyir. Düzdür, ATƏT-in Minsk Qrupunun vasitəçiliyini də bura əlavə edib. Güman edir ki, onun əsas dəstəklicisi olan ABŞ və Fransa bu məsələdə Azərbaycana təzyiq göstərər. Hesab edir ki, bunun nəticəsində ikitərəfli danışıqlardan Ermənistanı qane edən bir nəticə ortaya çıxa bilər. Çox təəssüf ki, ikitərəfli danışıqlar indiki halda mənasız vaxt itirməkdən başqa nəsə deyil. Mövqelər o qədər uzaqdır ki, onları yaxınlaşdırmaq qeyri-mümkündür. Biz qəti şəkildə deyirik ki, Qarabağa status verilməyəcək. Ermənistan baş naziri isə deyir ki, Qarabağ Azərbaycanın tərkibində olmayacaq. Bu iki kəskin ziddiyyət təşkil edən mövqeni necə yaxınlaşdırmaq olar? Azərbaycanın bu məsələdə güzəştə getmək fikri yoxdur. Mövqeyini qəti şəkildə ortaya qoyub. Paşinyan güzəştə gedərmi? Sərhədlərin dəqiqləşməsi ilə bağlı verdiyi sözə əməl etməyən Ermənistan bizim ərazi bütövlüyümüzü dəstəkləməyə razı olarmı? Paşinyanın ciddi bir qərar qəbul edəcəyinə necə inanmaq olar? Buna görə də hesab edirəm ki, ikitərəfli danışıqlar heç bir nəticə verə bilməz. Yalnız 4-lük və ya 3+3 formatında baş tuta biləcək danışıqlardan hansısa nəticəni gözləməyə dəyər. Mütləq mənada Rusiya tərəfdən Ermənistana təzyiqlər olmalıdır. Mən Ermənistanın son təxribatlarını da Rusiya amili ilə izah edirəm. Bununla erməni ordusundakı əlaltıları vasitəsilə Paşinyanı cəzalandırmaq istəyirlər. Təsadüfi deyil ki, elə həmin gün Ermənistanın müdafiə naziri vəzifəsindən azad edildi. Paşinyanın Qərbdəki tərəfdarları isə onu dirəniş göstərməyə sürükləməklə Ermənistanın əleyhinə işləmiş olublar. Hazırda Paşinyan ciddi qərar qəbul etməkdən daha çox, çıxılmaz vəziyyətdə olan rəhbəri xatırladır”.
Məhəhəmmədəli QƏRİBLİ
