Ermənistanın baş naziri Nikol Paşinyan Ermənistan hərbçilərini, əsgərlərini Azərbaycana əsir düşməkdə ittiham edib. N.Paşinyan hesab edir ki, onlar özləri əsir düşürlər.
Paşinyan deyib ki, hər bir əsgərin əsir düşdüyü vəziyyət araşdırılmalıdır. “Hesab edirəm ki, Ermənistan Respublikasının Silahlı Qüvvələrində xidmət edən hər bir şəxsin üzərinə müəyyən öhdəliklər düşdüyü üçün hər bir əsir götürülmə hadisəsini lazımi qaydada araşdırmağın vaxtı çatıb.
Biz hamımız araşdırmalıyıq ki, onlar necə, hansı şəraitdə əsir düşüb? Hərbi nizamnamədə açıq şəkildə göstərilir ki, hansı halda əsir götürülməsi cinayət sayılmır. Məsələn, açıq-aydın görünür ki, əsgər huşsuz vəziyyətdə əsir götürülübsə, bununla bağlı iddialar ola bilməz”.
Pasinyanın bildirdiyinə görə, erməni əsgərləri özləri əsir düşürlər. Dogrudanmi erməni əsgərləri, hərbçiləri qəsdən əsir düşürlər?
Ekspertlərin sözlərinə görə, nəzərə alsaq ki, onların çoxu hərbiyə zorla cəlb edilib, xidmət etmək, döyüşmək, yad torpağında ölmək istəmirlər, eyni zamanda Ermənistanın sınıq-salxaq ordusunda acınacaqlı vəziyyət hökm sürür və sair, bu baxımdan Paşinyanın dediklərində həqiqət ola bilər. Siyasi şərhçilər və hərbi ekspertlərin bildirdiyinə görə, ümumiyyətlə, II Qarabağ müharibəsində də, 16 noyabrda sərhəddə baş verən döyüşdə də erməni əsgərləri, hərbçiləri öz qorxaqlıqlarını göstəriblər. Onlara görə, erməni hərbçiləri əksər zamanlarda müqavimətsiz təslim olublar. Ekspertlər deyir ki, hətta indiyə qədər neçə Ermənistan əsgəri Azərbaycan tərəfə keçib və orduda vəziyyətin dözülməz olduğunu deyib.
“...Ermənilər Azərbaycan hərbçilərinə prinsipial müqavimət göstərmək iqtidarından məhrumdur”
Siyasi şərhçi Aqşin Kərimov “Bakı-Xəbər”ə bildirdi ki, bu ölkənin baş nazirinin erməni əsgərlərini əsir düşməkdə ittiham etməsi Ermənistan ordusunun daxilindəki ağır problemlərin açıq etirafıdır.
“Nikol Paşinyanın ölkəsinin əsgərlərini Azərbaycan tərəfinə az qala qəsdən əsir düşməkdə ittiham etməsi hər bir halda Ermənistan ordusunda dərin isterikanın və psixoloji böhranın olduğunun göstəricisidir.
Şüarçılıq və pafosdan uzaq bir şəkildə rahat deyə bilərik ki, Azərbaycanın İkinci Qarabağ müharibəsində Ermənistanı məğlub etməsi erməni ordusunun altını üstünə çevirib.
Paşinyan indi erməni əsgərlərin əsir düşməsi məsələsinə görə öz hakimiyyətinə hansısa formada bəraət qazandırır və ya orduda kök atmış keçmiş hakimiyyətlə bağlı komandanların üzərinə məsuliyyət qoyur. Düzü, əməliyyat şəraitinin detalları ilə bağlı dəqiq məlumatlar olmadığına görə, erməni əsgərlərin hansı şəraitdə əsir düşdüyünü də deyə bilmərik.
Lakin hazırda sosial şəbəkələrdə paylaşılan videolardan görünür ki, ermənilər Azərbaycan hərbçilərinə prinsipial müqavimət göstərmək iqtidarından məhrumdur”.
A.Kərimiov bildirir ki, düzdür, noyabrın 16-da sərhəddəki toqquşmalar müharibə bitdikdən sonra ilk genişmiqyaslı döyüşlər idi, amma erməni ordusu yenə də üz-üzə gəlməkdən qorxurdu və buna görə artilleriyanı, minaatanları işə salırdı. “Erməni əsgərlərin isterik durumu göz qabağındadır, onların psixoloji durumu əl-qollarını bağlayır ki, bu da onların əsir götürülməsini asanlaşdırır. Bilirlər ki, Azərbaycan əsgərləri ilə üz-üzə gələrkən hər hansı müqavimət göstərməyin mənası yoxdur, əgər buna cəhd etsələr məhv olunacaqlar” - deyə A.Kərimov bildirdi.
İradə SARIYEVA
