Məlum olduğu kimi, Ermənistan silahlı qüvvələrinin noyabrın 16-da dövlət sərhədinin Kəlbəcər və Laçın rayonları istiqamətində ölkəmizə qarşı törətdiyi genişmiqyaslı təxribat tam iflasa uğrayıb. Azərbaycan ordusunun qətiyyətli tədbirləri nəticəsində düşmənin hücumunun qarşısı alınıb, Ermənistan ordusu canlı qüvvə və texnika itkisi verərək geri çəkilib.
Bu hadisədə Azərbaycan üzləşdiyi itkilərin sayını rəsmən açıqlayıb. Ermənistanın təxribatı nəticəsində Azərbaycanın 7 hərbçisi şəhid olub, 10-u yaralanıb. Indi maraq doğuran erməni tərəfinin itkiləridir. Indilikdə dəqiq bəllidir ki, döyüşlər zamanı ordumuz hərbi qənimət kimi Ermənistan ordusunun xeyli sayda silah-sursatını - iriçaplı pulemyotlar, snayper tüfəngləri, atıcı silahlar, tank əleyhinə və əl qumbaraları, patronları və sair götürüb. Bir “Ural” və bir “UAZ” markalı avtomobil də ələ keçirilib. Ermənistan Müdafiə Nazirliyinin məlumatlarında rəsmən etiraf edilir ki, 13 əsgər Azərbaycan tərəfindən əsir götürülüb, 2 post itirilib. 40-dan çox yaralı var. Bundan başqa, daha 24 nəfərin aqibəti barədə isə məlumat yoxdur. Ancaq qeyd edək ki, Ermənistan Müdafiə Nazirliyi əhalinin qəzəbindən qorxduğu üçün ölənləri itkin düşmüş kimi təqdim edir. Ermənistanın “Qraparak” qəzeti xeyli sayda erməni hərbçisinin Azərbaycan Silahlı Qüvvələri tərəfindən əsir götürüldüyünü yazır və qeyd edir ki, Ermənistan tərəfi 11 döyüş mövqeyini itirib. O da məlumdur ki, Rusiya Cənub Hərbi Dairəsi qoşunlarının komandan müavini, general-leytenant Rüstəm Muradovu Bakıdan İrəvana aparan təyyarəsində bir erməni hərbçisinin cəsədi olub. Bu da o deməkdir ki, itkin düşən və əslində məhv edildikləri heç bir şübhə doğurmayan şəxslərlə birlikdə erməni tərəfinin ən azından 25 itkisi var. Bunu erməni müxalif deputatlar da təsdiq edir. Belə ki, baş nazir Nikol Paşinyanın parlamentdə keçirilən “hökumət saatında” səsləndirdiyi fikirlər, verilən suallara cavabı da düşmənin itkisinin çox olduğunu təsdiq edir. Müxalifətdən olan deputat Tiqran Abramyan baş nazirə belə bir sual ünvanlayıb: “Dərc olunmuş videoların birində görünür ki, döyüş mövqelərindən birinin itirilməsi heç bir atışma olmadan baş verib. Daha sonra informasiya var idi ki, bizdən 13 nəfər əsir düşüb, 24 hərbçi ilə isə rabitə kəsilib. Birincisi, bizim hərbi qulluqçuların taleyi barədə sizə nə məlumdur? İkincisi, onlara qarşı zorakılığın qarşısının alınması üçün nə edilir? Mən hələ ən pis mümkün ssenaridən danışmıram. Belə vəziyyətin yaranmasına görə kim məsuliyyət daşıyır?”. Paşinyan suala cavab verərkən deyib: “Necə yəni, atəş açmamaq əmri verilib? Belə bir şey ola bilməzdi. Birincisi ona görə ki, belə əmri yazılı və ya şifahi verən hər hansı şəxs Ermənistan Respublikası suverenlyinin qorunmasına dövlət xəyanəti edir”. “Azatutyun” radiosu bildirir ki, mövqelərdə müqavimət göstərilməməsini yolverilməz hesab etdiyini deyən baş nazir başqa bir müxalifətçi deputat olan Ayk Mamicanyanın Paşinyanın bundan əvvəl məhz belə hərəkət etdiyi barədə replikasına reaksiya verməyib. Deputat bildirib: “Az əvvəl siz dediniz ki, “atəş açmamaq əmrini verən adam dövlət xaini sayılmalıdır”. Amma yarım il bundan əvvəl demişdiniz: Sev liç gölünün (Qaragöl) 30 faizinə görə müharibə başlamamalıydıq ki...” Bax dövlət xəyanəti məhz belə olur. Yaxşı ki, sizin ədliyyə naziriniz islah-əmək binalarının təmirinə başlayıb. Çünki sizin gələcəyiniz mütləq orda keçəcək”. Paşinyan isə iddia edib ki, noyabrın 15-16-da 41 kvadrat kilometr ərazinin Azərbaycanın nəzarətinə keçməsi barədə məlumatlar da yalandır. O israr edib ki, son əməliyyatlar nəticəsində balans heç bir şəkildə dəyişməyib. Halbuki, Ermənistan Müdafiə Nazirliyinin rəsmi məlumatında mövqelərin itirildiyi təsdiqlənir. Ermənistan parlamentinin “Hayastan” fraksiyasının deputatı Aqnessa Xamoyan da qeyd edir ki, vəziyyət ölkəsi üçün təhlükəli məcradadır: “Mənzərə 44 günlük müharibənin mənzərəsinə çox bənzərdir”. Xamoyan bildirib ki, onda 27 sentyabr səhərini yaşadıqları kimi bir təəssürat yaranıb: “Məndə elə təəssürat var ki, biz 27 sentyabr səhərini yaşayırıq. Və belə bir təəssürat var ki, eyni ssenari səhnələşdirilir, yenə ərazilər itirəcəyik, yenə ölənlərimiz və yaralılarımız olacaq, yeni kapitulyasiya aktı imzalanacaq”. Rusiyalı politoloq Maksim Şevçenko isə qeyd edir ki, yeni təxribatlar olarsa, Ermənistan həqiqətən də yeni itkilərlə üzləşəcək: “Müharibə başlayacağı təqdirdə Ermənistan Zəngəzuru da itirə bilər. Bu qarşıdurmalar 2020-ci il müharibəsindən sonrakı siyasi prosesin başa çatmamasının nəticəsidir. Mən əminəm ki, erməni cəmiyyətinin daxilində revanş arzusu, məğlubiyyət acısı və gəlib onları xilas edəcək xarici müttəfiq arzusu var. Nasist Almaniyası məğlub olmağa başlayanda, artıq 1943-cü ildə onların müqəddəratı həll olunmuşdu. Amma yenə də onlar sonadək ümid edirdi ki, Stalinlə Ruzveltin arası dəyəcək, hansısa möcüzə silah peyda olacaq. Təxribatçılara müqavimət göstəmək lazımdır, amma eyni zamanda sülh prosesi yolu ilə addımlamaq, o cümlədən erməni cəmiyyətinə bu yolu getməkdə kömək etmək də lazımdır". Şevçenko hesab edir ki, Ermənistan müharibə başlayacağı təqdirdə çox şey itirə bilər: "Azərbaycan bu iki gündə açıq şəkildə göstərdi ki, erməni tərəfinin "hay-küyü" Ermənistanın Zəngəzuru itirə biləcəyinə də gətirib çıxara bilər. Ermənistan hesab edir ki, Rusiya Azərbaycanın üzərinə gedəcək. Bu, sadəlövh hesabdır. Bu, həm də cinayətkar hesabdır, belə ki, Rusiyanı regiondakı maraqların daxilinə cəlb edir. Rusiya müdaxilə etməyəcək, Ermənistana görə döyüşməyəcək".
Tahir TAĞIYEV
