Ermənistan rəhbərliyinin son sərhəd təxribatlarının özləri üçün növbəti rüsvayçı hərbi məğlubiyyətə çevrilməsi bir daha sübut etdi ki, Azərbaycanın regional sülh siyasəti doğru yoldadır.
Azərbaycan ordusunun erməni təxribatlarına layiqli cavabı göstərdi ki, Ermənistan şəksiz pozucu rol oynayır və Azərbaycan Prezidentinin yekun sülh sazişi imzalamaq təkliflərini ardıcıl şəkildə sabotaj edir. Azərbaycan Prezidentinin sərhədlərin dəqiqləşdirilməsi və ərazi bütövlüyünün qeyd-şərtsiz tanınması barədə çağırışlarının Ermənistan tərəfindən davamlı rədd edilməsi bölgədə yaranmış gərgin vəziyyətin yeganə mənbəyidir. Vətən müharibəsindən sonrakı bir ildə Prezident Əliyev bütün beynəlxalq və daxili tribunalarda Ermənistanı sülh sazişi imzalamağa dəvət edir. Azərbaycan Prezidenti Ermənistanın yekun sülh sazişinə məcbur edilməsini möhkəm regional sülhün müstəsna həlledici şərti kimi bəyan edib. Təəssüf ki, Azərbaycan Prezidentinin delimitasiya və sülh sazişi barədə çağırışlarının həyata keçirilməsi üçün beynəlxalq birlik Ermənistana lazımi təzyiqi göstərmədi.
Ermənistanın sülh sazişinə vadar edilməsi istiqamətində beynəlxalq güclərin yol verdiyi səhvlər Vətən müharibəsinə qədərki dövrdə beynəlxalq vasitəçilərin səhvlərinin başqa şəkildə davam etdirilməsidir. Bu ilk növbədə həmsədr ölkələrə aiddir. Həmsədrlər uzun illər Ermənistanla prinsipsiz davrandılar, onu Azərbaycan torpaqlarından çıxmağa vadar etmədilər .Onlar indi də sülh sazişi məsələsində Ermənistanın nazı ilə oynamaqla eyni səhvi təkrar edirlər.
Ermənistan ordusunun Kəlbəcər, Laçın və digər istiqamətlərdə son təxribatlarına bəzi beynəlxalq reaksiyalar da sübut edir ki, Azərbaycanın sülh sazişi və delimitasiya danışıqları barədə apardığı siyasət kursu başa düşülür və dəstəklənir. Avroittifaq Şurasının prezidentinin İlham Əliyevə telefon zəngi, ABŞ, Rusiya, Fransa, İtaliya və başqa ölkələrdən gələn rəsmi reaksiyalar sübut edir ki, Azərbaycan real vəziyyəti beynəlxalq rəsmi dairələrə və ictimaiyyətə yetərincə çatdıra bilib. Narahatlıq ifadə edən beynəlxalq dairələrin bununla bərabər həm də delimitasiya danışıqlarının zəruriliyini vurğulaması Ermənistanın böyük təzyiq altında olduğunu göstərir.
Ermənistanın son təxribatlarına beynəlxalq reaksiyalar həm Azərbaycanın haqlı siyasət apardığını sübut edir, həm də Ermənistanı ifşa edir.
Ermənistanın sərhəd təxribatlarından beynəlxalq sui-istifadə cəhdlərinin də fiaskoya uğraması son hadisələrdə aşkar görünən təzahürlərdən biridir. Aciz və yazıq görkəmdə müəyyən beynəlxalq instansiyalardan kömək istəyi iflasa uğrayan Ermənistan hətta açıq şantaj əməllərinə baş vurmaqdan da çəkinmədi. Ermənistan TŞ-nin katibinin Rusiyanın ünvanına açıq hədələri Kreml dairələri tərəfindən yəqin yetərincə təhlil ediləcək. TŞ katibi Armen Qriqoryan KTMT-dən lazımi reaksiya almadıqları halda başqa ünvanlara müraciət etmək hüququna malik olduqlarını söyləməklə əslində Rusiya və KTMT-yə potensial xəyanət mövqeyində olduqlarını aydın şəkildə ortaya qoydu.
Ermənistanın təxribatları və şantaj taktikaları bir daha sübut edir ki, Azərbaycan Prezidentinin sülh sazişi təklifinin alternativi yoxdur. Beynəlxalq birlik vaxt itirmədən Ermənistanı Azərbaycanın ərazi bütövlüyünü tanımağa, saziş imzalamağa və delimitasiya danışıqlarına başlamağa məcbur etməlidir.
Aydın QULİYEV
