Noyabrın 16-da Azərbaycan-Ermənistan sərhədində Ermənistanın təxribatı nəticəsində baş verən döyüş əməliyyatlarına görə məsuliyyətin bu ölkənin hərbi-siyasi rəhbərliyinin üzərinə düşdüyü şübhəsizdir. Təxribatçı Ermənistan rəhbərliyi yenə də yalandan hay-küy salıb beynəlxalq aləmə müraciət etdi, Azərbaycanı “işğalçı” kimi qələmə verməyə başladı.
Ermənistanın beynəlxalq çağırışlarında qorxaqlıq, acizlik, yazıqlıq, yaltaqlıq əlamətləri özünü açıq göstərdi. Təbii ki, burada təəccüblü heç nə yoxdur, çünki bu, Ermənistana xas siyasətdir. Məsələ burasındadır ki, Ermənistan bu dəfə də beynəlxalq aləmi “timsah göz yaşları”na inandıra bilmədi və yalançı hay-küyü heç bir effekt vermədi. Çünki Azərbaycan dövləti operativ qaydada beynəlxalq ictimaiyyətin diqqətinə real vəziyyəti çatdıraraq həqiqəti bir daha bəyan etdi.
Noyabrın 16-da Ermənistanın baş naziri N.Paşinyanın zəng vurmadığı ölkə qalmadı, yenə də öz şakərinə sadiq qalaraq dünyanı bezdirdi, amma istədiyi reaksiyanı ala bilmədi. Hətta Rusiya da ona üz vermədi. Belə olduqda Ermənistan özünün şantaj variantlarını işə saldı. Ermənistan Təhlükəsizlik Şurasının katibi Armen Qriqoryan açıqlaması ilə Ermənistanın Rusiyanı şantaj etdiyini açıq şəkildə ortaya qoyub:“Rusiya və KTMT Ermənistana kömək etməsə, Paşinyan hökuməti hərbi yardım üçün xarici qurumlara müraciət etmək hüququnu özündə saxlayır”.
“Ermənistan Rusiyanı şantaj edir ki, o Ermənistana hərbi yardım etməsə…”
Tanınmış politoloq Mehman İsmayılov “Bakı-Xəbər”ə şərhində bildirdi ki, Ermənistan TŞ-nın katibi Armen Qriqoryanın Rusiya və KTMT məsələyə müdaxilə etməyəcəyi təqdirdə Paşinyan hökumətinin digər beynəlxalq tərəfdaşlara müraciət hüququnu özündə saxlaması barədə açıqlaması Rusiyanı şantaj etməyə xidmət edir. “Ümumiyyətə, Ermənistanın rəhbərliyi provokasiya və avantüra ilə məşğul olur. Azərbaycanın sərhədlərini pozmaq, bizim hərbi postlarımıza Ermənistanın hücum etməsi provokasiyadır, avantüradır. Baş verənlər Ermənistanın hərbi-siyasi rəhbərliyinin çiyninə qoyulmalı olan beynəlxalq cinayətdir. Bu, Ermənistanın hərbi-siyasi rəhbərliyinin həyata keçirdiyi avantüradır və hərbi cinayətdir. Ermənistan konflikt, münaqişə situasiyası yaratmaq variantını irəli atır. Ermənistanın hərbi-siyasi rəhbərliyi düşünür ki, bu avantüranın nəticəsində “qələbə çalsa” içəridəki rəqiblərinin hamısını məhv etmək üçün əlinə gözəl şans keçəcək. İkinci variant isə odur ki, “qalib gələ bilsəm, Azərbaycanı bütün dünyanın qarşısında qara rəngdə göstərməyə və Ermənistanı hər zaman haqsız yerə müdafiə edən qüvvələri köməyə çağırmağa nail olmaq üçün əlimə şans keçəcək”. Ermənistan niyə bu avantüraya gəldi? Təbii ki, Azərbaycan ordusu şəhidlər versə də, Ermənistanın terrorçu silahlı qüvvələrinə kəskin reaksiya verdi, onların əlində olan üç strateji yüksəkliyi əllərundən aldı, hərbi qənimətlər əldə etdi, əsirlər götürdü, 15-dən yuxarı erməni hərbçisini məhv etdi və sair. Bundan sonra Ermənistan yalandan səs-küy qaldırmağa, beynəlxalq ictimaiyyəti çaşdıran fikirlər səsləndirməyə, müxtəlif ölkələrə, dövlətlərə müraciətlər etməyə başladılar. Məqsəd də o idi ki, öz yalanlarına beynəlxalq aləmi inandırıb Azərbaycanın qınanmasına nail olsunlar. Ermənistan Minsk Qrupunun həmsədrlik institutunu, ABŞ-ı, BMT Təhlükəsizlik Şurasını və Kollektiv Müqaviləsi Təşkilatını bu təxribata cəlb etməyə cəhd etdi”.
M.İsmayılov qeyd etdi ki, amma Ermənistan bu qurumların heç birini öz təxribatlarına şərik edə bilmədi, çünki Azərbaycan çox operativ şəkildə bütün beynəlxalq qurumları, xarici dövlətləri məlumatlandırmışdı.
M.İsmayılovun sözlərinə görə, Ermənistan bütün hallarda Rusiyanı tərəf kimi yaratmaq istədiyi münaqişəli vəziyyətə cəlb etmək istəyir, Rusiya buna əhəmiyyət vermədiyi üçün açıq şantaja keçir. “Ermənistan indi də Rusiya ilə Ermənistan arasında 1997-ci ildə bağlanan və Boris Yeltsinlə Levon Ter-Petrosyanın imzaladığı ikitərəfli müqavilədən yapışır. Ermənistan istəyir ki, Rusiyanı münaqişəyə çəksinlər və onu yaratmaq istədikləri münaqişənin bir tərəfinə çevirsinlər. Təbii ki, Ermənistan Təhlükəsizlik Şurasının katibinin açıqlaması birbaşa Rusiyanı şantaj etməkdir. Ermənistan Rusiyanı şantaj edir ki, Ermənistana hərbi yardım etməsə Ermənistan başqa ölkələrdən hərbi yardım almaq imkanını işə salacaq. Bu isə Rusiyanın şantaj edilməsinə yönəlib, bu, vəziyyəti destabilizə etməkdir, aranı qarışdırmaqdır, xaos yaratmaqdır. Çünki Ermənistan bir il müddətində üçtərəfli bəyanata görə üzərinə düşən bir dənə də olsun vəzifəni yerinə yetirməyib”- deyə M.İsmayılov qeyd etdi.
İradə SARIYEVA
