Ermənistanın müdafiə nazirinin "günah keçisi" kimi qurban verilməsi sərhədlərdə baş verənlərə görə Paşinyan hakimiyyətini məsuliyyətdən yayındırmaq cəhdidir. Ancaq əbəs yerə. Neçə nazir dəyişsə də Ermənistan sərhədlərdə məlum hərəkətlərdən əl götürməyəcək. Bunu istəyən indiyə qədər əsasən Ermənistan hakimiyyətinin özü idi. İndi Ermənistanı sərhədlərdə bu işlərə sövq edən başqa oyunçular da fəallaşıblar…
Bu fikirləri özünün Facebook sosial hesabında “Bakı Xəbər” Media Qrupunun rəhbəri, politoloq Aydın Quliyev yazıb. Azərbayan-Ermənistan sərhədində son günlər artan gərginliyi şərh edən politoloq daha sonra yazır:
- Elə bilməyin ki, sərhədlərimizə basqının Türk zirvəsi ilə ard-arda baş verməsi təsadüfdür. Heç Ermənistan TŞ katibinin Naxçıvanla əlaqə kontekstində Laçın-Sisyan-Şahbuz yolundan danışması da təsadüf deyil. Putinin qısa fasilələrlə Makron və Rəisi ilə Qarabağı və Əfqanıstanı müzakirə etməsi də təsadüf deyil. Reallıqda Türk inteqrasiyası prosesində yeni qeyri-adi heç nə baş verməyib. Sadəcə, hələ gur-gur bəyanatlar var. Lakin Türk inteqrasiyası müzakirələri gücləndikcə, sanki kimsə bizə "Naxçıvanla əlaqə istəyirsənsə, buyur Laçın-Sisyan-Şahbuz yolundan istifadə et" demək istəyir. Başa düşmürsüz ki, sərhədlərdə Azərbaycana böyük təzyiqlər edilir ki, Qarabağın status məsələsini Zəngəzur dəhlizindən qabağa çıxarsınlar. Real Türk inteqrasiyasının qarşısını almağın həlledici yolu bu deyilmi? Zəngəzur dəhlizi açılmasa, Türk inteqrasiyası deyilən proses indiyə qədər olanlardan və deyilənlərdən o yana keçməyəcək. Azərbaycana təzyiq işinin içində Rusiya da var. İran da var. Fransa da var. Hədəf Zəngəzur dəhlizinin açılmasına imkan verməmək və Türk inteqrasiyasını dayandırmaqdır. Ermənistanın əli ilə Azərbaycana təzyiqi artırırlar. Əfqanıstandan dini radikalizmin ixracı ilə Orta Asiyanın türk dövlətlərinə təzyiq ediləcək. Suriyada isə Türkiyəni sıxmağa başlayacaqlar. Düzdür, Türkiyəni Suriyada sıxmaqla real bir nəticə hasil olası deyil. Ancaq burada bizim, Orta Asiyada isə türk dövlətlərinin sıxılması Türkiyə üçün həssas və zəif yerə çevrilə bilər. O zaman " bazarlıq" başlayacaq.
Yaxın vaxtlarda Əfqanıstandan Orta Asiya ölkələrinə yeni mürtəceliklərin nüfuz etməsini görəcəyik. “Taliban”ın İranla danışıq aparması, “Taliban”ın düşməni Əhməd Şahın bu işdə vasitəçilik etməsi, Əfqanıstan üçün İrandan enerji almaq razılaşmaları təsadüf deyil ki… Orta Asiya ölkələrinə Əfqanıstandan mürtəce axınları İran düzüb-qoşacaq.
Qayıdaq, Qarabağ cəbhəsinə. Şərq tərəfdaşlığının XİN başçılarının zirvəsində Ermənistanın naziri Azərbaycanı olmazın təcavüzlərdə suçlayanda Avropa komissarları ona heç də mane olmadılar, sözünü də kəsmədilər. Bunu da təsadüf saymayın. Minsk Qrupunun həmsədrləri də bəyanat verərək Dağlıq Qarabağ “münaqişəsinin həlli” üçün görülməli "vacib" işlərdən danışdılar. Halbuki, biz iddia edirik ki, münaqişə daha yoxdu. Bu da təsadüf deyil haa...
Vətən müharibəsində Azərbaycana "fora" verməklə Ermənistanı sıxdılar, indi də Ermənistanın əli ilə bizi sıxırlar…
Mümkündür ki, yaxın dönəmlərdə status müzakirələri müstəvisində yeni hadisələr olsun.
Reallıq isə odur ki, sərhəd döyüşlərini Ermənistan hələ davam etdirəcək. Həm də kəskinləşdirəcək....
