ATƏT-in Minsk Qrupunun həmsədrləri (ABŞ-dan Endryu Şafer, Fransadan Bris Rökföy və Rusiyadan İqor Xovayev) regionda, o cümlədən Ermənistan-Azərbaycan sərhədində baş verən son insidentlərdən narahatlıqlarını ifadə ediblər.
Həmsədrlərin birgə bəyanatında deyilir: "Həmsədrlər tərəfləri gərginliyi azaltmaq üçün dərhal konkret addımlar atmağa çağırırlar. Həmsədrlər, həmçinin, tərəfləri təxribat xarakterli hərəkətlərdən çəkinməyə və 10 noyabr 2020-ci il tarixli bəyanat və digər birgə razılaşdırılmış atəşkəs sazişləri üzrə öhdəliklərini tam yerinə yetirməyə çağırırlar". Qeyd edilir ki, son zamanda gərginliyin artması Qarabağ münaqişəsi ilə bağlı və ya ondan irəli gələn bütün həll edilməmiş məsələlərin razılaşdırılmış, hərtərəfli və davamlı həllinin zəruriliyini vurğulayır.
Xatırladaq ki, noyabrın 13-ü və 14-də Ermənistan silahlı qüvvələri Azərbaycan ordusuna qarşı bir sıra təxribatlar həyata keçirib. Təxribatlar noyabrın 13-də Ermənistan vətəndaşının Azərbaycan Respublikasının Silahlı Qüvvələrinin N saylı hərbi hissəsinin və Rusiya Federasiyasının sülhməramlı kontingentinin hərbi qulluqçularının həyatını təhlükəyə atmaqla əl qumbarasını onların istiqamətində atmasından sonra törədilib. Bunun ardınca isə Ermənistan silahlı qüvvələri dövlət sərhədində təxribatlara əl atıb və hazırda da Laçın istiqamətindəki mövqelərimizi artilleriya və digər iri çaplı silahlardan atəşə tuturlar. Çox maraqlıdır ki, Azərbaycanın dəfələrlə təkidli tələblərinə və düzəlişlərinə baxmayaraq, həmsədrlər hələ də Qarabağ münaqişəsinin mövcudluğundan danışır və baş verən insidentlərlə bağlı yenə də məsuliyyəti eyniləşdirən mövqe ortaya qoyurlar. Həmsədrlərin bu mövqeyini nə dərəcədə obyektiv saymaq olar?
Politoloq Elşən Mustafayev “Bakı-Xəbər”ə bildirdi ki, Azərbaycan Minsk Qrupunun fəaliyyətilə bağlı dəfələrlə irad bildirib: “1992-ci ildə ATƏT Belarusun paytaxtı Minsk şəhərində Dağlıq Qarabağ probleminin həlli ilə bağlı 11 ölkədən ibarət sülh konfransı keçirmək üçün qrup yaratdı. Həmin qrup sonradan Minsk Qrupu adlandırıldı. 1997-ci ildə Minsk Qrupuna 3 ölkə həmsədrlik etdi. Ancaq hazırda ATƏT-in Minsk Qrupu formal olaraq mövcuddur və onun fəaliyyətsizliyi nəticəsində nələrin baş verdiyini bilirik. Azərbaycan öz gücünə ədaləti bərpa etdi və Qarabağ probleminin həllinə nail oldu. Ancaq biz görürük ki, Minsk Qrupu yenə də münaqişənin həll edilmədiyini deyir. Bununla heç də Ermənistanın üzərinə götürdüyü öhdəlikləri yerinə yetirmədiyini qabartmaq istəmir. Münaqişənin “həll edilmədiyi” fikrini qabartmaqla, daha çox, ermənilərə statusun verilməsinin zəruriliyini diqqətə çatdırır. Onların son bəyanatından qərəzləri yenə görünür. Yenə münaqişənin həll edilmədiyini deməklə yanaşı, törədilən son təxribatlarla da bağlı konkret mövqe ortaya qoymurlar. Açıq şəkildə demirlər ki, Ermənistan üzərinə götürdüyü öhdəlikləri yerinə yetirmir. Sərhədləri tanımaq istəmir. Bizim öz sərhədlərimiz çərçivəsində etdiyimiz manevrlərə onlar artilleriya atəşlərilə cavab verirlər. Bunları deməməklə həmsədrlər əvvəlki mahiyyətdə olduqlarını bir daha təsdiqləyirlər.
Azərbaycan özü beynəlxalq təşkilatların qətnamələrini yerinə yetirərək 44 günlük hərbi əməliyyatlar nəticəsində öz ərazi bütövlüyünü təmin etdi. Bu gün ATƏT-in Minsk Qrupunun fəaliyyətinə artıq ehtiyac yoxdur. Onun yenidən bərpası ancaq Ermənistan tərəfinin istəyidir. Onlar keçmişdə qalan “Dağlıq Qarabağ problemi”nin mövcudluğunu yada salmaq, Azərbaycanın ərazisində ancaq ermənilərdən ibarət ərazi yaratmaq istəyindədirlər. Amma bunlar baş verən deyil. Biz ermənilərə də bütün vətəndaşlar kimi bərabər hüquqlar tanıyırıq. Minsk Qrupu fəaliyyət göstərmək istəyirsə, ancaq postmünaqişə dövrünə dair təkliflər verə bilər. ATƏT-in Minsk Qrupu Azərbaycan-Ermənistan sərhədlərinin delimitasiyasına dair öz vasitəçiliyini yerinə yetirərsə, regionda birdəfəlik sülhün təmin edilməsi üçün Ermənistanı revanşizm niyyətlərindən əl çəkdirərsə, onda fəaliyyət göstərə bilər. Ancaq biz bu cəhdləri onların fəaliyyətində qətiyyən görmürük”.
Məhəmmədəli QƏRİBLİ
