Ermənistanın baş naziri Nikol Paşinyan Təhlükəsizlik Şurasının iclasında iddia edib ki, "noyabrın 14-də Azərbaycan qoşunları ölkə ərazisinə daxil olub". Məhz bu səbəbdən müdafiə naziri Arşak Karapetyan işdən çıxarılıb. Ermənistan teleqram kanallarının məlumatına görə, Azərbaycan Silahlı Qüvvələri ermənilərin dörd postunu tutub və texnikanı ələ keçirirərək, erməni hərbçiləri bu mövqelərdən çıxarıblar.
Həmin mənbələrin məlumatına görə, ermənilərin Cermuk istiqamətində üç, Qaragöl ərazisində bir postu tərk edilib. Ermənilər yük maşınlarını və bir BMP-ni orada qoyublar. Bu mövqelər Laçın və Ermənistanın Sünik vilayəti sərhədindədir.
Azərbaycan Müdafiə Nazirliyi baş verənləri şərh etməyib. Ancaq qeyd edək ki, iki ölkə arasında hələlik sərhədlər müəyyənləşməyib. 30 illik işğal dövründə isə Ermənistan Azərbaycanla sərhədi özü istədiyi kimi müəyyən edib, postlarını Azərbaycana aid ərazilərdə qurub. İndi müzəffər ordumuz tərəfindən həmin postlardan ermənilər qovulur. Yəni əslində, Azərbaycana məxsus ərazilər ermənilərdən təmizlənir. Çox maraqlıdır, Laçın istiqamətində daha hansı hadisə baş verib ki, Ermənistan rəhbərliyi müdafiə nazirinin istefaya göndərilməsini bu amillə izah edir?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, əslində həmin istiqamətdə ciddi nəsə baş verməyib: “Ermənilər məlumatı təhrif edərək verirlər. Ən əsası isə, bizim onların ərazisinə müdaxilə etməyimizə dair rəy formalaşdırmağa çalışırlar. Sadəcə, biz ermənilərin diversiya qruplarını öz ərazilərmizdən çıxarmışıq. Sərhədin bizə aid olan hissəsində möhkəmlənmişik. Ermənistan bir dövlət kimi daima terroru dəstəkləyib. Həmin xislətlərini yenidən ortaya qoyurlar. Bugünlərdə Şuşa yaxınlığında baş verən terror hadisəsindən bunu aydın sezmək olur. Tarixən onların terror təşkilatları olub. Görünür, həmin örnəyi yenidən tətbiq etmək istəyirlər. Həmin təşkilatların ideoloji hədəfi budur ki, bizim və Türkiyənin ərazisində “böyük Ermənistan” yaratsınlar. Bu səbəbdən də, Azərbaycan ordusunun 44 günlük müharibədə əldə etdiyi zəfəri qəbul etmək istəmirlər. Çünki saxta ideyaları fiaskoya uğrayıb. Toplum şok vəziyyətindədir, nə etdiyini özü də bilmir. Prezidentin qeyd etdiyi kimi, biz nəinki XXI, hətta XXII əsrin də müharibəsinə hazır olmalıyıq. Laçın istiqamətində baş verənlərin izahı sadədir. Ermənistan 30 illik işğaldan sonra bizim öz ərazilərimizə sahib çıxmağımızı həzm edə bilmir. Hesab edirəm ki, onların bu məkri heç vaxt səngiyən deyil. Çünki həmin millət bizimlə əzəli düşmənçilik aparıb. Biz öz ərazilərimizdə möhkəmlənməyi davam etdirməliyik. Onların terror, təxribatlarına layiqli cavab verməliyik. Hazırda bizim ordumuz bir nömrəli döyüş hazırlığı səviyyəsindədir. Ali Baş Komandanın bir əmri bəsdir ki, erməni tör-töküntlüərini oradan tam çıxaraq. Azərbaycan ordusu beynəlxalq hüququn tanıdığı əraziləri çərçivəsində manevr edir və bu, erməniləri qıçıqlandırır. Müdafiə nazirinin istefaya göndərilməsinin başlıca səbəbi budur ki, o, siyasi rəhbərliyin tapşırdığı təxribatları layiqincə yerinə yetirə bilməyib. Onları belə buraxmaq olmaz. Azərbaycan daha radikal və sərt addımlar atmalıdır. Üçtərəfli razılıq əldə olunub, Ernənistan isə buna əməl etmir. Belədirsə, biz öz ərazilərimizdə təmizləmə aparmağa başlamalıyıq”.
Məhəmmədəli QƏRİBLİ
