Yayılan məlumatlara görə, Rusiya Müdafiə Nazirliyi Qarabağdakı Rusiya sülhməramlı kontingentinin noyabrın 13-dəki fəaliyyəti ilə bağlı hesabatı açıqlayıb.
Məlumatlara görə, hesabatda minatəmizləmə əməliyyatlarından bəhs edilsə də, həmin gün Şuşada təxribat törətmiş 1975-ci il təvəllüdlü terrorçu Norayr Mirzoyanın Ermənistana təhvil verilməsi ilə bağlı heç bir məlumat qeyd edilməyib.
N.Mirzoyanın Azərbaycan hərbçilərinə qarşı terror törətməsi və onun Ermənistana təhvil verilməsi faktı hesabatda niyə qeyd edilməyib?
“Bu, həmin ölkənin erməni terrorunu dəstəkləməsi kimi anlaşıla bilər”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, Rusiya sülhməramlıların fəaliyyəti müxtəlif suallar doğurur. “Burada bir məsələ aydındır ki, Rusiya fürsətdən istifadə edib Qarabağın bir hissəsində möhkəmlənməyə çalışır. Rusiyanın son zamanlar sərgilədiyi bütün hərəkətlər belə düşünməyə əsas verir. Xüsusilə də orada bir abidə qoyulub və Rusiya sülhməramlıları “xilaskar” kimi təsvir olunur. Rusiyanın özünü ermənilərin xilaskarı kimi təqdim etməsi qətiyyən qəbuledilən deyil. Ermənilər işğalçıdır, separatçıdır, Rusiya işğalçının, separatçının xilaskarı kimi regiona gəlib? Bu, cavabı olmayan sualdır. Buna Rusiya aydınlıq gətirməlidir. Amma müşahidələr də, proseslər də, rəsmi və qeyri-rəsmi məlumatlar da onu göstərir ki, Rusiya regionda möhkəmlənə bilməyəcək. Azərbaycan Türkiyə ilə birgə öz siyasi xəttini ardıcıl olaraq davam etdirir. Bəzi qeyri-rəsmi məlumatlara görə, Azərbaycan artıq Xankəndi, Xocalı və Ağdərədə öz hakimiyyətini bərpa etmək prosesinə başlayıb. Bu, 10 noyabr bəyannaməsində də aydın şəkildə göstərilib ki, həmin ərazilər Azərbaycan ərzisidir və Azərbaycan o ərazilərdə haqqını, suveren hüququnu bərpa etməlidir. Bu sənədi Ermənistan rəhbərliyi də öz imzası ilə təsdiq edib.
Proses gedir, bu qarşısıalınmaz prosesdir. Rusiya nə isə etmək istəyir, onların kölgəsində də ermənilər nə isə etmək istəyir. Şuşa ətrafında üç hərbçimizin yaralanması ilə nəticələnən terror aktı da müəyyən qədər gözlənilən idi. Çünki terror, terrorçuluq ermənilərin mahiyyətindən irəli gəlir. Terroru 100 il əvvəl meydana gətirən toplulardan biri ermənilər olub. Eyni zamanda bu gün Ermənistanda terrorizm dövlət səviyyəsində himayə olunur”.
A.Nağı hesab edir ki, hazırda Ermənistanda terrorçular dövlət səviyyəsində qəhrəmanlaşdırılır, bu illərdir belədir. O qeyd etdi ki, bu gün də Ermənistanda terrorçu Mirzoyanı qəhrəmanlaşdırmağa çalışırlar.
Azərbaycana qarşı olan terror aktlarının qarşısını almaqda hər zaman israrlı olduğumuzu deyən A.Nağının sözlərinə görə, Azərbaycanın terrora, terrorçulara qarşı mübarizəsinə güc verən amillərdən biri dünyanın terrora qarşı mübarizə aparmasıdır. “Azərbaycan ermənilərin terrorçu davranışları ilə bağlı bütün faktları dünyaya, beynəlxalq təşkilatlara təqdim etməlidir. Rusiyanın Müdafiə Nazirliyinin məlum hesabatında Mirzoyanın törətdiyi cinayətin və qanuna zidd olaraq onun Ermənistana təhvil verilməsinin qeyd olunmaması bu ölkənin erməni terrorunu dəstəkləməsi kimi anlaşıla bilər. Bu barədə də çox ciddi şübhələr var. Rusiya sülhməramlılarının bu qeyri-qanuni addımının hesabata salınmaması, Mirzoyan məsələsinə toxunulmaması burada xeyli şübhəli məqamların olmasını düşünməyə rəvac verir. Azərbaycan dünyaya baş verənləri, Rusiya sülhməramlılarının davranışlarını olduğu kimi çatdırmalıdır. O terrorçu nə üçün Azərbaycan tərəfə verilmədi? O, Azərbaycan tərəfə verilməli idi, çünki həmin ərazi Azərbaycan ərazisi idi. Azərbaycan ərazisində cinayət törədilib və həmin cinayətin də araşdırılması Azərbaycan hüquq-mühafizə orqanlarının səlahiyyətindədir. Rusiya bununla açıq şəkildə o terror hadisəsini dəstəklədiyini və ona şərik olduğunu göstərdi. Bəlkə də bu terror məkrli niyyətlərinin həyata keçirilməsi üçün rus sülhmamlılarının özləri tərəfindən təşkil olunub? Belə şübhəli suallar da yox deyil. Digər tərəfdən, hesabat hazırlayırlar və bir çox məsələlər kimi Mirzoyan məsələsi də orada əks olunmur. Niyə? Onlar ancaq minatəmizləməni salırlar hesabata, reallığı göstərmirlər, ermənilərin atəşkəsi pozduğunu, terror hadisələri törətdiklərini qeyd etmirlər. Qanunsuz erməni silahlı dəstələri Azərbaycana qarşı təxribat xarakterli hərəkətlər edir, Azərbaycan hərbçilərinə atəş açırlar. Bunların əksəriyyəti Rusiya Müdafiə Nazirliyinin hesabatlarında öz əksini tapmır... Bəzən görürsən ki, həmin hesabatlarda qanuna zidd olaraq “Dağlıq Qarabağ Respublikası” ifadəsini işlədirlər, bu cür təxribatlara yol verirlər. Bütün bunlar göstərir ki, Rusiya məsələlərə birtərəfli yanaşır”-deyə A.Nağı vurğuladı.
İradə SARIYEVA
