Xəbər verildiyi kimi, Ermənistan ordusunun Azərbaycanla sərhədin Laçın istiqamətində əl atdığı və daha sonra erməni tərəfi üçün rüsvayçılıqla başa çatan növbəti təxribatının ardınca baş nazir Nikol Paşinyan müdafiə naziri Arşak Karapetyanı vəzifəsindən azad edib. Və onun yerinə keçmiş tarix müəllimi, baş nazirin müavini, yəni hərbi sahəyə aidiyyəti olmayan mülki şəxs Suren Papikyan təyin edilib.
Baş nazir Nikol Paşinyan Təhlükəsizlik Şurasının iclasında təsdiq etdi ki, onun Karapetyanı işdən azad etməsi Azərbaycanla sərhəddə baş verənlərə görədir. Suren Papikyan Nikol Paşinyan hakimiyyətə gəldikdən sonra müdafiə naziri postuna təyin olunan sayca 4-jü şəxsdir. Başqa sözlə, Paşinyan hakimiyyətdə olduğu təxminən 3 ildən bir qədər artıq müddətdə orta hesabla hər ilə bir müdafiə naziri dəyişib. Və onların hər üçü öz karyerasını rüsvayçılıqla sona çatdırıb. Üstəlik, Papikyan Paşinyanın bu bir ildə təyin etdiyi üçüncü müdafiə naziridir. Göründüyü kimi, bir tərəfdən Ermənistan hərbi sahədə təcavüzlər həyata keçirir, digər tərəfdən isə mülki şəxsi müdafiə naziri təyin edir. Bununla Ermənistan rəhbərliyi nə demək istəyir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, son zamanlar ermənillərin fəallaşmasını görürük: “Bununla onlar bir daha sülhə sadiq olmadıqlarını sübut etmiş olurlar. Xüsusilə də bu təxribatların İstanbulda keçirilən türkdilli ölkələrin sammitindən sonraya təsadüf etməsi məqsədli sayılır. Məsələnin görünən tərəfi budur ki, Paşinyanın məğlubiyyəti “Qarabağ klanı”nın Ermənistanda aktivləşməsinə səbəb olub. Paşinyan ard-arda təyin etdiyi müdafiə nazirlərini vəzifədən uzaqlaşdırır. Bunu ordunun uğursuzluqları və səhv addımları ilə də əlaqələndirmək olar. Artıq vəziyyət o həddə çatıb ki, Azərbaycan ordusu erməni əsgərlərini heç bir silahdan istifadə etmədən, sürü halında qovub postlardan çıxarır. Bütün bunlar göstərir ki, Paşinyanın öz ordusuna, onun döyüşgən ruhuna inamı qalmayıb. Vəziyyət o yerə çatıb ki, Paşinyan generalitet içərisindən özünə etibarlı olan bir adamı tapıb ordunun başına qoya bilmir. Çünki ordunun böyük bir hissəsi köhnə hakimiyyətin təsiri altından çıxmayıb. Təbiidir ki, Ermənistan atdığı bütün addımlarla bağlı öz havadarlarını məlumatlandırır. Faktiki olaraq, Ermənistan sülh prosesini öz təxrinatları ilə pozur. Bunun da günahını bizim üstümüzə atmağa çalışır. Onların bu addımları ölüm ayağında olan xəstənin həyatla son mübarizəsini xatırladır. Müharibə başa çatsa da, Ermənistan sülhə meyl göstərmir. Terror və təxribat yolunu seçməklə onlar nəyəsə nail ola bilməyəcək. Ermənistan mülki şəxsi müdafiə naziri təyin etməklə, özünü dünyaya bir qədər sülhpərvər kimi göstərmək istəyir. Sanki belə bir ab-hava yaradır ki, onların müharibə etmək fikri yoxdur, buna görə də bir müəllimi müdafiə naziri qoyurlar. Bu cür “yumşalmanın” arxasında isə özlərinin təxribatlarını davam etdirməyi düşünürlər. Kimin nazir təyin olunması heç nəyi dəyişmir. Ermənistan ordusu elə vəziyyətdədir ki, dünyanın ən məşhur sərkərdələri gəlsə belə, onları xilas etməyə qadir olmayacaq. Bunun üçün onlar silahı yerə qoyub, bölgədə sülhün təmin olunmasına töhfələrini verməlidirlər”.
Məhəmmədəli QƏRİBLİ
