Məlum olduğu kimi, Ermənistanın baş naziri Nikol Paşinyan noyabrın 15-də gözlənilmədən müdafiə naziri Arşak Karapetyanın vəzifəsindən azad edilməsi məsələsini ölkə prezidenti Armen Sarkisyanın qarşısında qaldırıb və onu istefaya göndərib. Bundan sonra Paşinyan sabiq nazirin əvəzinə yaxın silahdaşı və baş nazirin müavini vəzifəsini daşıyan, orduya, hərb sahəsinə heç bir aidiyyəti olmayan Suren Papikyanı təyin edib.
Paşinyan bu addımını Ermənistan Təhlükəsizlik Şurasının iclasında son günlər Azərbaycan-Ermənistan sərhədində baş verən və erməni ordusunun necə miskin durumda olduğunu bir daha üzə çıxaran hadisələrlə əlaqələndirib. Nazir vəzifəsinə təyin edilən və ordudan qətiyyən xəbərdar olmayan Suren Papikyan isə elə təyinatının ilk günündə ciddi səhvlərə yol verib. Hesab edilir ki, bu hal onun da tezliklə vurulmasını qaçılmaz edir. Məsələ burasındadır ki, təyinatın ertəsi gün Papikyan sərhəddə yeni insidentlər törədərək ölkəsinin üstünlüyünü təmin etmək niyyətinə düşüb. Bu fonda Ermənistan silahlı qüvvələrinin bölmələri dövlət sərhədinin Kəlbəcər və Laçın rayonları ərazisində ölkəmizə qarşı genişmiqyaslı təxribat törədib. Azərbaycan Müdafiə Nazirliyinin məlumatına görə, Ermənistanın hərbi birləşmələri dövlət sərhədinin bu istiqamətindəki yüksəklikləri ələ keçirmək və hərbi üstünlüyə nail olmaqla daha əlverişli mövqelərə yiyələnmək məqsədilə noyabrın 16-sı saat 11:00 radələrində qəfil hərbi əməliyyata başlayıb. Basarkeçər və Qarakilsə rayonlarında yerləşən sərhəd-döyüş mövqelərinə əlavə canlı qüvvə, hərbi və xüsusi texnika cəmləşdirən Ermənistan hərbi bölmələri Azərbaycan Ordusunun Kəlbəcər və Laçın rayonlarındakı döyüş postlarına hücum edib. Qarşı tərəf Azərbaycan ordusunun mövqelərini müxtəlif çaplı atıcı silahlar və qumbaraatanlardan intensiv atəşə tutaraq döyüş postlarımıza atəşlə zərər vurub. Ermənistan silahlı qüvvələrinin döyüş aktivliyinin qarşısını almaq məqsədilə Kəlbəcər və Laçın istiqamətində yerləşən birlik və qüvvələrimiz tərəfindən dərhal təxirəsalınmaz əməliyyat həyata keçirilib. Əvvəlcə qarşı tərəfin hərəkəti məhdudlaşdırılıb, onun qüvvə və vasitələrinə zərər vurulub. Görülmüş qəti tədbirlər nəticəsində erməni hərbçiləri tərksilah edilərək saxlanılıb, xeyli sayda müxtəlif çaplı silah və külli miqdarda sursat qənimət kimi ələ keçirilib. Genişmiqyaslı təxribat törətməklə qısa müddətli üstünlüyə nail olmaq istəyən Ermənistan hərbi bölmələrinin hücumu əməliyyat-taktiki baxımdan tam iflasa uğrayıb və növbəti dəfə rəsmi İrəvanın təxribat törətmək cəhdi uğursuzluqla nəticələnib. Təbii ki, erməni tərəfinin düşdüyü bu vəziyyət Suren Papikyana ciddi başağrısı olacaq. Ermənistanın “Joxovurd” qəzeti artıq hökumətdəki mənbələrinə istinadla Suren Papikyanın müdafiə naziri vəzifəsinə müvəqqəti təyin olunduğu yazıb. Qəzet bildirir ki, Paşinyan Papikyanı nazirlikdə nə baş verdiyini ayırd etmək üçün təyin edib: “Hökumətdəki mənbələrimizin məlumatına görə, Paşinyan Papikyanı bir məqsədlə təyin edib – hərbi idarədə nə baş verdiyini anlamaq üçün. Məsələ ondadır ki, nazirliyin daxilində didişmə gedir. Hərbi məmurlar bu və ya digər iş üçün məsuliyyəti bir-birinin üzərinə atmaqla, bir-birini rəhbərliyə satmaqla məşğuldur”. Qəzet yazır ki, Paşinyan Müdafiə Nazirliyini yaxşıca “silkələmək” niyyətindədir və nəticədə “çox kəllələrin gedəcəyi” gözlənilir. Bu sıraya Baş Qərargah rəisi Artak Davtyan, onun müavinləri və daha bir neçə general da daxildir. Amma sərhəddə baş verən son olaylar Papikyanın özünü də pis vəziyyətə salıb.
Ermənistanın “Past” qəzeti də yazr ki, məsələ tək nazir dəyişikliyi ilə yekunlaşmayacaq, ümumilikdə nazirlik və Baş Qərargah rəhbərliyində radikal dəyişikliklər ediləcək. O da qeyd olunur ki, indiki halda sərhəddə yeni uğursuzluq Papikyanın da taleyini sual altına alıb, eyni zamanda müxalifətin Paşinyan hakimiyyətinə qarşı yeni arqumentlər əldə etməsinə səbəb olub. Yeri gəlmişkən qeyd edək ki, noyabrın 16-da Ermənistanda iki müxalifət fraksiyası parlamentin iclasını boykot etdiyini açıqlayıb. Onlar hakimiyyətyönlü çoxluğu sərhəddəki vəziyyətin müzakirəsini önləmək cəhdində suçlayıblar. Məsələ burasındadır ki, “Hayastan” və “Şərəf duyuram” fraksiyaları parlamentin iclasında bazar ertəsi Azərbaycanla sərhəddə yaranmış durumun müzakirəsini istəyiblər. Parlamentin spikeri Alen Simonyan isə müxalifətin müzakirə ilə bağlı xahişini rədd edib. Bu səbəbdən müxaliflər parlamentin işini boykot edib. Amma “Qraparak” qəzeti yazır ki, bu vəziyyətdə müxalifət heç nə əldə edə bilməyəcək: "Çünki Rusiya erməni müxalifətini Paşinyana təzyiq göstərməkdən çəkindirməyə çalışır. Onlar Rusiyanın müxtəlif kanalları ilə Ermənistan müxalifətini razı salmağa çalışırlar ki, sərhədlər müəyyən edilmədən, güc yolu ilə və insan tələfatı bahasına ərazilərdən imtina etmək istəmirlərsə, Nikol Paşinyana təzyiqləri dayandırsınlar. Rusiyanın yüksək dairələrinə yaxın mənbəmiz bildirib ki, Ermənistanın baş naziri Nikol Paşinyanın noyabrın 9-da keçirilməli olan görüşdən və ya videokonfransdan imtina etməsi Azərbaycan tərəfini məsələnin güc yolu ilə həllinə sövq edib. Paşinyan erməni cəmiyyətinin güclü təzyiqi ilə təmasdan imtina edib. Bir qayda olaraq, təhlükə görəndə o geri çəkilir, çünki Ermənistanın ictimai dairələrində səs-küy yaranır ki, sənədin imzalanması hakimiyyət dəyişikliyinə səbəb ola bilər. Paşinyan sonradan “satqın” adlandırılmaması üçün görüşdən imtina etməyi və Azərbaycan Prezidenti İlham Əliyevə məsələləri güc yolu ilə həll etməyə imkan verməyi seçib. Rusiya emissarları, o cümlədən Rusiyanın Ermənistandakı səfiri müxtəlif dairələrin nümayəndələri ilə görüşlər keçirir və onları hüquqi prosesə müdaxilə etməməyə, sənədli demarkasiyaya icazə verməyə inandırır. Yəni Rusiya, bir növ, bu yolla Ermənistanı dəstəkləyə bilsin. Üstəlik, bu halda nə müharibə, nə itki, nə də ərazilərin qanunsuz işğalı olacaq. Azərbaycanlılar isə bacardığı yerdən soxulacaq və torpaqlarımızı ələ keçirəcək”.
Bir daha qeyd edək ki, Azərbaycan hərbçiləri ölkəmizin suveren ərazilərində xidməti vəzifələrini yerinə yetirir.
Samirə SƏFƏROVA
