“Ermənistan milli qvardiyası” adlı təşkilat Şuşa şəhəri yaxınlığında azərbaycanlı hərbçilərə qumbara atan erməni terrorçu Norayr Mirzoyana 1000 dollar verəcək. Bu barədə adı çəkilən təşkilatın Facebook səhifəsində bildirilib.
“Ermənistan milli qvardiyası” Norayr Mirzoyana 1000 dollar verəcək və əlavə təşəbbüslə çıxış edəcək”, - deyə təşkilat bəyan edib. Qurum Norayr Mirzoyanı “mübarizə lideri” adlandıraraq, “onu tək qoymamaq hamımızın borcudur”, - deyə Ermənistana çağırış edib. Xatırladaq ki, noyabrın 13-də erməni terrorçu Norayr Mirzoyan Şuşa yaxınlığında təxribat törədib. Rəsmi məlumata əsasən, avtomobillə Laçın şəhəri istiqamətində hərəkətdə olan N.Mirzoyan Şuşa şəhərinin Daşaltı kəndi yaxınlığında maşından düşüb və orada xidmət aparan Azərbaycan Silahlı Qüvvələrinin əsgərlərinə doğru əl qumbarası atıb. Hadisə nəticəsində üç azərbaycanlı hərbçi xəsarət alıb. Maraqlıdır ki, Ermənistan rəsmi dairələri də həmin hərəkəti pisləyən açıqlama verməyib. Bütün bunlar Ermənistanın Qarabağda gizli terror hərəkatına başlamasını şərtləndirən amil sayıla bilərmi? Azərbaycanın antiterror addımlarına başlamasına əsas varmı?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, erməni terrorçusunun Şuşa ətrafında postumuza qumbara atması bir sıra detalları yenidən üzə çıxarmış oldu: “Budur, Rusiya sülhməramlı qüvvələrinin məsuliyyətsizliyi və ikibaşlı oyunu, erməniləri himayə etməsi və separatçıların yanında olması. Bu artıq daha açıq şəkildə özünü ifadə etdi, hər kəsdə mənqiti bir sual yaranır: necə ola bilər ki, Rusiyanın sülhməramlı qüvvələrinin müvəqqəti yerləşdiyi ərazidən Ermənistanın silahlı qüvvələrinin tör-töküntüləri Şuşa istiqamətində təxribatlar törədir, mövqelərimizi atəşə tutur və sülhməramlılar bununla bağlı hər hansı bir addım atmır? Hətta həmin terrorçunu həbs edib, ermənilərin özünə veriblər”.
Ekspertin sözlərinə görə, Rusiya sülhməramlıları buna aydınlıq gətirməlidir: “Bu olduqca təəccüblüdür və cavabı veriləcək ciddi bir sualdır. Rusiya sülhməramlı qüvvələrinə erməni separatçılarının vurmuş olduğu ağır zərbədir, onlara yüksək səviyyədə etinasızlıqdır, onları sülhməramlı qüvvə kimi tanımamasıdır. Ermənistanın reaksiyasından görünür ki, onlar bu cür addımları təqdir edir. Hətta terrorçuya mükafat təyin etməklə, gələcəkdə bu cür təxribatların intensiv xarakter daşıyacağını bəyan edirlər. Azərbaycan Silahlı Qüvvələri, hər zaman dediyimiz kimi, yüksək hazırlıq imkanlarına malikdir və düşmənin təxribatlarının qarşısını vaxtında və lazımı səviyyədə alınmasına qadirdi.
2020-ci ilin noyabr ayında bağlanmış bəyanata uyğun olaraq Rusiya Federasiyasının sülhməramlılarının müvəqqəti yerləşmiş olduğu Azərbaycan ərazilərindən erməni silahlı qüvvələrinin tör-töküntüləri dərhal tərksilah olunub çıxarılmalıdır. Müqavimət göstərənlər isə ya həbs edilməli, ya da yerində məhv olunmalıdır. Bunun artıq başqa variantı görünmür. Ona görə də mənə belə gəlir ki, bu cür təxribatlar davam edərsə, Azərbaycan Silahlı Qüvvələri antiterror əməliyyatı aparmaq məcburiyyətində qalacaq və əlbəttə, nə Ermənistan, nə də onları himayə edən qüvvələrin bununla bağlı Azərbaycana qarşı xoşagəlməz fikir ifadə etməyə haqqı çatacaq. Tamailə əminik ki, bizim qəhrəman övladlarımız 44 günlük Vətən müharibəsində olduğu kimi, bundan sonra da torpaqlarımızın riyakar düşməndən təmizlənməsi prosesində özünün sayıqlığını və peşəkarlığını nümayiş etdirəcək”.
Məhəmmədəli QƏRİBLİ
