Avropa İttifaqının (Aİ) Cənubi Qafqaz üzrə xüsusi nümayəndəsi Toyvo Klaar ötən həftə Ermənistanla Azərbaycan arasında vəziyyətin gərginləşməsini şərh edib. Aİ rəsmisi bu barədə fikirlərini sosial şəbəkədə paylaşıb.O, ötən həftə Ermənistanla Azərbaycan arasında artan gərginlikdən narahat olduğunu bildirib: "Gərginliyi azaltmaq, səbəbləri aradan qaldırmaq və hərtərəfli nizamasalma nailiyyəti üzrə işə başlamaq lazımdır".
Daha əvvəl Azərbaycanın Müdafiə Nazirliyi bildirib ki, Ermənistan silahlı qüvvələrinin bölmələri dövlət sərhədinin Laçın rayonu sahəsində vəziyyəti gərginləşdirmək məqsədilə növbəti təxribata cəhd göstərib. Maraqlıdır, niyə AB Ermənistandan öhdəliklərini yerinə yetirməyi tələb etmir və yenə də məsuliyyəti eyniləşdirir?
Politoloq Yeganə Hacıyeva “Bakı-Xəbər”ə açıqlamasında bildirdi ki, biz Qarabağ münaqişəsinin mövcud olduğu dönəmdə Avropa Birliyindən obyektiv mövqe görmədik: “Avropa Birliyi konflikti qəribə tərzdə seyrçi kimi izləməklə, öz maraqlarını zərbə altına qoydu. Bunun nəticəsində AB uzun müddət ərzində Cənubi Qafqazda qazandığı üstünlükləri əldən vermiş oldu. Hazırda onlar bu səhvi düzəltmək üçün qətiyyətli addımlar atmağa hazırdırlar. Ancaq yenə də dəyərləndirmədə təhriflərə yol verirlər. Avropa Birliyinin bəzi institutlarına lobbi qrupları təsir edə bilir. Biz son açıqlamanı da növbəti yalnış mesaj sayırıq. Ədalət naminə deyək ki, AB 2017-2018-ci illərdə əlində olan bəzi təzyiq resurlarını anons etdi və Azərbaycan da bundan məharətlə istifadə edə bildi. Bu, Ermənistan hakimiyyətindəki korrupsiya sxemlərinin ifşa olunması idi. Bundan biz yetərincə istifadə etdik. Ümumi götürəndə isə, mövqelərində yanlışlar çoxdur. Toyvo Klaar özlərinin proseslərə cəlb edilməsini istəyir. Gərginliyin aradan qaldırılmasında yaxından iştirakda maraqlı olduğunu deyir. Məsələ bundadır ki, AB-nin regiona təsir imkanları çox azalıb. Daha əvvəl onlar öz mövqelərini ATƏT Minsk Qrupu formatı vasitəsilə möhkəmlədirdisə, hazırda bunu etmək mümkün deyil. Çünki Fransa kimi ölkə öz maraqlarını üstün tutduğu üçün həmin təsisatı da hörmətdən salmış oldu. Görünür, bunu dərk edən AB hansısa formada fəallığını artırmaq istəyir. AB rəhbərliyi bu mesajı Azərbaycan xarici işlər naziri Brüsseldə olduğu zaman verir. Bunu danışıqların bir mərhələsi kimi görmək istəyir və vəziyyətdən istifadə edib, prosesdə yer almağa çalışır. AB-dən ciddi nəsə gözləməyə dəyməz. Ermənistana konkret xəbərdarlıq etməmələrinin səbəbi aydındır. Çünki onlar Rusiyanın vasitəçiliyi ilə əldə olunan razılaşmanın işləməsində elə də maraqlı deyillər. Faktiki olaraq, Rusiya ATƏT-in Minsk Qrupunun digər üzvlərini pis vəziyyətdə qoymaqla tərəfləri bir masaya gətirdi. Buna görə də onlar zədələnmiş maraqlarını bərpa etməyə çalışırlar”.
Məhəmmədəli QƏRİBLİ
