Məlum olduğu kimi, son günlar Ermənistan sistematik olaraq təxribatlar törətməkdədir. İstər Ermənistanın Azərbaycanla həmsərhəd olan bəzi ərazilərində, istərsə də Qarabağın sülhməramlıların nəzarətində olan ərazilərində ermənilərin törətdiyi təxribatlar səngimək bilmir.
Xüsusən də Laçın və Kəlbəcərin Ermənistanla həmsərhəd hissəsində təxribatlar daha çox baş verir. Ermənistan ordusunun əsgərləri gah qanunsuz şəkildə mövqelərini irəli çəkməyə cəhd edir, gah da sərhədyanı ərazilərdə yol infrastrukturunun tikintisi ilə məşğul olan texnikalarımızı atəşə tuturlar. Noyabrın 14-ü səhər saatlarından başlayaraq Ermənistan silahlı qüvvələrinin bir qrup şəxsi heyətinin və texnikasının Laçın rayonunun sərhədi istiqamətində cəmləşdirilməsi, o cümlədən təxribata hazırlığı müşahidə edilib. Ermənilərin növbəti təxribatının qarşısını almaq məqsədilə Azərbaycan Ordusunun bu istiqamətdə yerləşən bölmələri təxirəsalınmaz tədbirlər həyata keçirib. Nəticədə qarşı tərəfin hərbi qulluqçuları ərazidən çəkilməyə məcbur edilib. Bundan əvvəl də bənzər təxribat cəhdləri oldu, amma düşmən öz niyyətlərini həyata keçirə bilmədi.
“Ermənistan son günlər törətdiyi təxribatlardan diqqəti yayındırmaqdan ötrü bu cür kampaniya aparır”
Məsələnin təəccüb doğuran tərəfi odur ki, bütün bu təxribatların fonunda erməni mediası tamamilə fərqli görüntü yaratmağa çalışır. Son hadisələr fonunda təbliğat əsasən onun üzərində köklənib ki, guya Azərbaycan Ermənistanın şərq hissəsində hücum əməliyyatları həyata keçirir. Ermənistan belə saxta məlumatlar üzərində təbliğat kampaniyası aparmaqla nə etmək istəyir?
Məsələyə münasibət bildirən hərbi ekspert Azad İsazadənin fikrincə, erməni tərəfi 30 il əvvəlki taktikanı yenidən işə salmağa çalışır: “Ermənilər 1988-ci ildən bəri bu taktikadan istifadə edirlər. Atəş açırlar, lokal müstəvidə hücumlar təşkil edirlər, sonra da deyirlər ki, azərbaycanlılar birinci başladı, bizi qırdılar və s. Məsələ ondadır ki, belə halları yoxlamaq mümkün deyil. Yəni atəşi birinci kim başlayıb. Nəticədə beynəlxalq ictimaiyyət görür ki, tərəflər bir-birini ittiham edir. Ermənistan son günlər törətdiyi təxribatlardan diqqəti yayındırmaqdan ötrü bu cür kampaniya aparır. Əsas məsələ ondadır ki, Laçın, Kəlbəcər və Qubadlı rayonlarının Ermənistanla sərhədi delimitasiya olunmayıb. Ermənistanın şərq hissəsinin haradan başladığını demək mümkün deyil. Çünki Ermənistan delimitasiyanı bəhanə edərək sərhədləri tanımır. Üstəlik, delimitasiya işlərinin aparılmasından da imtina edirlər. Bütün bunlardan çıxış edərək belə bir saxta rəy formalaşdırırlar ki, guya Azərbaycan Ermənistana hücum edir. Bax, Ermənistanın hiləgər gedişlərinin kökündə dayanan əsas məsələ budur. Ancaq Azərbaycan sovet dövründəki xəritələrə əsasən öz sərhədlərini möhkəmləndirir. Bir sözlə, Ermənistan məqsədyönlü şəkildə delimitasiyadan yayınaraq vəziyyəti mürəkkəbləşdirməyə çalışır”.
Buna rəğmən ekspert hesab edir ki, Ermənistanın bu kimi pozucu fəaliyyətinin perspektivi yoxdur.
Vidai ORDAHALLI
