44 günlük müharibə bir ildir ki, başa çatıb. Bu bir il müddətində, demək olar ki, hər gün Ermənistanın təxribatları ilə qarşılaşırıq. Erməni terrorçuları hər fürsətdən istifadə edib bizə qarşı terror cinayətləri törədirlər. Noyabrın 13-də üç hərbiçimizin yaralanması ilə nəticələnən terror olayı da bu qəbildəndir. Bu cinayəti Ermənistan Respublikasının vətəndaşı, 1975-ci il təvəllüdlü Norayr Mirzoyan törədib. Bu barədə Baş Prokuroluq və Daxili İşlər Nazirliyi birgə məlumat yayıb.
Birgə məlumatda bildirilir ki, 13 noyabr 2021-ci il tarixdə saat 07:12-də Azərbaycan Respublikasının Xankəndi şəhərindən Xankəndi-Laçın şosse yolu ilə 48-MN-048 ER dövlət qeydiyyat nişanlı “Mercedes Benz” markalı avtomobillə Laçın şəhəri istiqamətində hərəkətdə olan Ermənistan Respublikasının vətəndaşı, 1975-ci il təvəllüdlü Norayr Mirzoyan və qeyriləri cinayətkar birlik halında “RQD-5” markalı əl qumbarası və digər odlu silah, partlayıcı maddələr əldə edib gəzdirməklə Azərbaycan Respublikasının ərazisində terror aktı törətmək, habelə qəsdən adam öldürmək məqsədilə idarə etdiyi avtomobildən düşüb Şuşa şəhərinin Daşaltı kəndinin yaxınlığında xidmət aparan Azərbaycan Respublikasının Silahlı Qüvvələrinin N saylı hərbi hissəsinin və Rusiya Federasiyasının sülhməramlı kontingentinin hərbi qulluqçularının həyatını təhlükəyə atmaqla əl qumbarasını onların istiqamətində atıb, nəticədə müddətdən artıq həqiqi hərbi xidmət hərbi qulluqçusu, çavuş Hafiz Nəsibova və digərlərinə (cəmi üç nəfərə) müxtəlif dərəcəli bədən xəsarətləri yetirməklə milli düşmənçilik niyyətilə qəsdən öldürülmələrinə cəhd edib.
Azərbaycan Respublikası Baş Prokuroru tərəfindən fakta görə Cinayət Məcəlləsinin 29, 120.2.1 (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürməyə cəhd), 29, 120.2.3, (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürməyə cəhd), 29, 120.2.4 ( xüsusi amansızlıqla və ya ümumi təhlükəli üsulla adam öldürməyə cəhd), 214.2.3 (terrorçuluq-odlu silahdan və silah qismində istifadə olunan predmetlərdən istifadə etməklə törədildikdə), 228.3 (qanunsuz olaraq odlu silah, partlayıcı maddə əldə etmə, başqasına vermə, satma, saxlama, daşıma və gəzdirmə mütəşəkkil dəstə tərəfindən törədildikdə) və digər maddələri ilə cinayət işi başlanmaqla istintaqın aparılması Baş Prokurorluğun İstintaq idarəsinə həvalə edilib...
Qeyd edək ki, Şuşa yaxınlığında əl qumbarası ilə təxribat törədərək üç azərbaycanlı hərbçinin yaralanmasına səbəb olan 1975-ci il təvəllüdlü terrorçu Norayr Mirzoyan sülhməramlılar tərəfindən Ermənistana təhvil verilib.
Rusiyalı sülhməramlılar qumbara ilə 3 hərbçimizi yaralayan erməni terrorçunu niyə Ermənistana təhvil verdi?
“Bu ziyanlı addımı atmaqla da Rusiya sülhməramlılarının gərginlik yaratmağa cəhd etdiyi aşkardır”
Müasir İnkişaf Birliyinin sədri, politoloq Mübariz Göyüşlü bizimlə söhbətində bildirdi ki, halbuki, qanunla Mirzoyan Azərbaycana təhvil verilməli idi. M.Göyüşlü qeyd etdi ki, həmin terrorçu terror cinayətini Azərbaycan ərazisində azərbaycanlı hərbçilərə qarşı qəsdən törədib, məqsədi onları öldürmək olub, bu baxımdan Mirzoyan Azərbaycana təslim edilməli idi. Mirzoyanın törətdiyi terror aktı ilə əlaqədar artıq Azərbaycan hüquq-mühafizə orqanları tərəfindən bir neçə maddə üzrə cinayət işi açıldığını deyən M.Göyüşlünün sözlərinə görə, sülhməramlılarin işi onu Azərbaycana təhvil vermək idi, amma nümayişkaranə şəkildə onu geriyə Ermənistna təhvil verdilər. Sülhməramlıların bu davranışının onların missiyasına və Azərbaycan qanunlarına zidd olduğunu deyən M.Göyüşlü hesab edir ki, sülhməramlıların bu addımı bütün mənalarda zərərlidir və bu, terrorçuları növbəti terror cəhdlərinə ilhamlandıra bilər. “Müharibə bitdikdən sonra bölgədə yerləşdirilən Rusiya sülhməramlılarının bu bir il ərzindəki fəaliyyəti Azərbaycan cəmiyyətində, ictimaiyyətində belə bir rəy formalaşdırıb ki, onlar sülhməramlı deyil, rusməramlıdır, hətta bir sıra məqamda erməniməramlıdırlar. Bir ildir ki, onlar sülhməramlı adı altında müvəqqəti olaraq bölgədə yerləşdiriliblər, amma öz missiyalarını yerinə yetirmək əvəzinə yalnız erməniləri müdafiə etməklə, erməni terrorçularını qorumaqla məşğul olurlar. Bu da rusiyalı sülhməramlıların fəaliyyəti ilə bağlı çox ciddi narazılıqalar yaradır, onlara etimadı zədələyir. Sülhməramlıların oradakı əsas işi silahlı erməni terrorçularını, qanunsuz silahlı dəstələri zərərsizləşdirmək, azərbaycanlı əhalinin ora köçürülməsinə dəstək olmalıdır, burada azərbaycanlılarla ermənilərin dinc və rahat yaşamalarına çalışmalıdır. Eyni zamanda ermənilərin Azərbaycan qanunlarına tabe olmalarını və Azərbaycan vətəndaşları olaraq yaşamalarını təmin etmək, onları buna hazırlamaq da sülhməramlıların missiyasına daxildir. Rus sülhməramlıları orada qanunsuz silahlı birləşmələrin, terrorçuların, separatçıların zərərli fəaliyyətinin qarşısını almaq əvəzinə bunun əksini edir, biz daha ziyanlı halların şahidi oluruq. Biz onların separatçı dəstəsinin başçısı Araik Artinyunyanı müdafiə etdiklərini, qoruduqlarını görürük”.
M.Göyüşlünün fikrincə, sülhməramlılar Qarabağdakı separatçı tör-töküntüsünü müdafiə etməklə, sanki onları yeni terror aktlarına həvəsləndirirlər. Mirzoyanın Ermənistana təhvil verilməsinə gəlincə, M.Göyüşlü bildirdi ki, Rusiya sülhməramlıları bu məsələdə özlərini əsl erməniməramlı kimi aparıblar: “Erməni terrorçunun atdığı qumbara ilə üç hərbçimizin yaralanması hadidəsi də ermənilərin separatçılıqdan, terrordan əl çəkmək istəmədiyini göstərir. Bu açıq-aşkar göstərir, hətta bu məqamlar olayla bağlı bütün video kadrlarda da var ki, sülhməramlılar öz üzərlərinə düşən vəzifəni lazımı şəkildə icra etmək istəmirlər. Rusiyalı sülhməramlılar terrorçu Mirzoyanı Azərbaycana təhvil verməli idilər, amma onu nümayişkaranə şəkildə Ermənistana təhvil verdilər. Rus sülhməramlılar üç azərbaycanlı hərbçiyə qarşı terror cinayəti törədən Mirzoyanı geri verməklə erməniməramlı olduqlarını bir daha sübut etdilər. Eyni zamanda da öz etimad və etibarlarını ciddi şəkildə zədələdilər”.
M.Göyüşlünün fikrincə, bu şəkildə davam edərsə, sülhməramlıların 5 illik müddəti başa çatdıqdan sonra burada qalmalarının vaxtı yenidən uzadılmaya bilər, əslində, heç uzadılmamalıdır da. O hesab edir ki, Bakı sülhməramlıların Azərbaycan torpaqlarından çıxarılması ilə bağlı məsələ qaldıra bilər. “Üçtərəfli bəyanatın şərtlərinə görə, tərəflərdən biri istəməyəcəyi təqdirdə Rusiya sülhməramlıları bölgəni tərk edə bilər. Yəni Azərbaycan 5 il müddəti başa çatdıqdan sonra onların burada qalmasına etiraz edə bilər. Çox təəssüflər olsun ki, biz ATƏT-in Minsk Qrupunun həmsədri olan və tərəflər arasında barışdırıcı mövqe tutmalı olan Rusiyanın sülhməramlılarının barışdırıcılıqla yox, qızışdircılıqla məşğul olduğunu, gərginlik yaratmağa xidmət etdiklərini görürük. Bu ziyanlı addımı atmaqla da Rusiya sülhməramlılarının gərginlik yaratmağa cəhd etdiyi aşkardır. Sülhməramlılar Azərbaycan ərazisində terror törədən cinayətkarı Azərbaycanın hüquq-mühafizə orqanlarına təhvil versəydilər öz tərəfsizliklərini göstərərdilər, amma atdıqları addımla ermənipərəstliklərini göstərdilər ”-deyə M.Göyüşlü qeyd etdi.
İradə SARIYEVA
