BMT-nin insan haqları komitəsi Ermənistanda sərbəst toplaşma azadlıqlarının əsassız məhdudlaşdırılması, dinc nümayişlərə polis müdaxiləsi və nümayişçilərin qanunsuz olaraq uzunmüddətli saxlanmasından narahatlığını ifadə edib.
Komitənin sözügedən məsələ ilə bağlı bəyanatında bildirilir ki, BMT ekspertləri Ermənistana aksiyalar zamanı polisin sayını azaltmağı və həddən artıq güc tətbiq olunaraq həbslərin həyata keçirilməsi barədə faktları araşdırmağı tövsiyə edib. Komitə Ermənistanı daxili qanunvericiliyin BMT-nin hüquq-mühafizə orqanları tərəfindən güc və odlu silahın tətbiq olunması üzrə Əsas Prinsiplərinə tam uyğunlaşdırılmasını təmin etməyə çağırıb. Məhkəmə hakimiyyətinin asılılığına gəldikdə, komitə icra və qanunverici hakimiyyətin hakim və prokurorların təyinatı və azad edilməsi prosesinə təsirindən narahatdır. Komitə Ermənistan hökumətinə hakim və prokurorları istənilən təzyiq formasından və müdaxilədən qorumağı və onların təhlükəsizliyini təmin etməyi tövsiyə edib.
Göründüyü kimi, hətta BMT Ermənistanda insan haqlarının pozulması ilə bağlı xəbərdarlıq edir, öz narahatlığını ifadə edir. Ancaq nədənsə, insan haqlarının müdafiasi ilə məşğul olan hüquq müdafiə təşkilatlarının səsi çıxmır. Sanki “Human Rights Watch”, “Freedom House” və digər bu kimi təşkilatların bunlardan xəbəri yoxdur. Bu bir daha həmin təşkilatların ikili standartlardan çıxış etdiklərini ortaya qoyur.
“Ermənistanda baş verən bütün pozuntulara ya yumşaq yanaşırlar, ya da bunu görməzdən gəlirlər”
Məsələyə münasibət bildirən ekspert Azər Həsrətin fikrincə, bütün bunlar həmin təşkilaların necə riyakar olduqlarını ortaya qoyur: “Ermənistanda baş verən hadisələri 15-20 il bundan əvvəl olduğu kimi gizlədə bilmirlər. İnternetin, sosial medianın yayılmadığı dövrlərdə Ermənistanda insan haqları ilə bağlı daha dəhşətli hadisələr yaşanırdı. Ancaq nə “Human Rights Watch”, nə də “Freedom House” və “Artikl-19” təşkilatları bunun üzərinə getmirdilər. Ermənistanda yaşananlara biganə yanaşırdılar. Eyni zamanda, jurnalistləri müdafiə edən təşkilatlar da bütün bunları görməzdən gəlirdi. Ən yaxşı halda, daha yumşaq münasibət bildirirdilər. Ancaq indi vəziyyət tamam fərqlidir. Elə bir dövr gəlib ki, heç bir ölkənin daxilində baş verənləri gizlətmək mümkün olmur. Xüsusən də ictimai yerlərdə baş verən hadisələri. Ona görə də BMT-nin müvafiq qurumu bununla bağlı narahatlığını ifadə edir, amma insan hüquqlarından danışan təşkilatlar bunu susqunluqla izləyir. Əslində isə bu ilk dəfə deyil baş verir. Zaman-zaman bunun şahidi olmuşuq. Ancaq son illər belə ikili yanaşmaların sayı daha da artıb. Ermənistanda baş verən bütün pozuntulara ya yumşaq yanaşırlar, ya da bunu görməzdən gəlirlər. Bu minvalla az qala utanmadan Ermənistanı azad bir ölkə kimi təqdim etmək istəyirlər. Təbii ki, bütün bunlar birtərəfli, qərəzli yanaşmanın əyani göstəricisidir. Biz bundan o qədər də narahat olmuruq. Ona görə ki, “Human Rights Watch”, “Freedom House” təşkilatları bununla özlərini bütün dünyanın gözü qarşısında biabır edirlər. Eyni zamanda bizim illərdir həmin təşkilatların qərəzli olması ilə bağlı səsləndirdiyimiz fikirlər öz təsdiqini tapır”.
Bu baxımdan ekspert hesab edir ki, bu cür ikili yanaşmalarla həmin təşkilatlar özünü daha çox hörmətdən salır və onlara olan etimad azalır.
Vidadi ORDAHALLI
