Son günlərin ən çox diqqət çəkən hadisələrindən biri Azərbaycan-Ermənistan sərhədində baş verən gərginlikdir. Bunun əsas günahkarı qismində isə yenə erməni tərəfi çıxış edir. Lakin baş verənlər nəticə etibarı ilə yenə ermənilərin özlərinin pis vəziyyətə düşməsi ilə müşaiyiət edilir.
Bu barədə danışmazdan öncə qeyd edək ki, Azərbaycanın Müdafiə Nazirliyi bazar günü Ermənistan silahlı qüvvələrinin Azərbaycan ərazilərini atəşə tutduğu barədə məlumat yayıb. Məlumatda qeyd olunur ki, Azərbaycan-Ermənistan dövlət sərhədinin Laçın rayonu sahəsində vəziyyəti gərginləşdirmək məqsədilə Ermənistan silahlı qüvvələrinin bölmələri növbəti təxribata cəhd göstərib: “Noyabrın 14-ü səhər saatlarından başlayaraq Ermənistan silahlı qüvvələrinin bir qrup şəxsi heyətinin və texnikasının Laçın rayonunun sərhədi istiqamətində cəmləşdirilməsi, o cümlədən təxribata hazırlığı bölmələrimiz tərəfindən müşahidə edilib. Ermənilərin növbəti təxribatının qarşısını almaq məqsədilə Azərbaycan Ordusunun bu istiqamətdə yerləşən bölmələri təxirəsalınmaz tədbirlər həyata keçirib. Əməliyyat şəraitinə uyğun olaraq ordumuzun bölmələri tərəfindən əvvəlcədən müəyyən edilmiş plana əsasən zəruri fəaliyyətlər icra olunub. Nəticədə qarşı tərəfin hərbi qulluqçuları ərazidən çəkilməyə məcbur edilib”. Məlumatda xatırladılır ki, ötən həftə də Ermənistan tərəfi dövlət sərhədinin Laçın istiqamətində 60 nəfər şəxsi heyəti yerləşdirməklə təxribat törətməyə cəhd göstərib və iflasa uğrayıb. Azərbaycanın Müdafiə Nazirliyi onu da bildirir ki, Ermənistanın hərbi-siyasi rəhbərliyi bu kimi hərbi avantüraya son qoymalıdır: “Bütün bunlar bir daha onu göstərir ki, Ermənistan tərəfi iki ölkənin dövlət sərhədinin danışıqlar yolu ilə delimitasiyası və demarkasiyasında maraqlı deyil". Nazirlik hesab edir ki, Ermənistan-Azərbaycan dövlət sərhədində yaradılan istənilən qarşıdurmanın nəticələrinə görə bütün məsuliyyət Ermənistanın hərbi-siyasi rəhbərliyinin üzərinə düşəcək. Bundan başqa, noyabrın 14-də yayılan başqa bir məlumatda qeyd olunur ki, Azərbaycan ordusunun Kəlbəcər rayonundakı mövqeləri müxtəlif növ silahlardan atəşə tutulub: "Ermənistan silahlı qüvvələrinin bölmələri noyabrın 13-ü axşam saatlarından etibarən noyabrın 14-ü səhər saatlarınadək Basarkeçər rayonunun Yuxarı Şorca, Zərkənd, Əzizli və Cermuk yaşayış məntəqələrində yerləşən mövqelərindən Kəlbəcər rayonunun Zəylik, Yellicə və İstisu yaşayış məntəqələrində yerləşən Azərbaycan Ordusunun mövqelərini snayper tüfəngi, qumbaraatan və müxtəlif çaplı atıcı silahlardan istifadə etməklə heç bir səbəb olmadan fasilələrlə intensiv atəşə tutub". Bundan başqa nazirlik, həmçinin, Rusiya sülhməramlılarının müvəqqəti nəzarətində olan ərazilərdən də Azərbaycan ordusunun mövqelərinə atəş açıldığını bildirir: "Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri Muxtarkənd yaşayış məntəqəsi tərəfdən bölmələrimizin mövqelərini müxtəlif çaplı silahlardan istifadə etməklə heç bir səbəb olmadan fasilələrlə intensiv atəşə tutub". Məlumatda vurğulanır ki, qarşı tərəfin təxribatlarının, həmçinin döyüş mövqelərinin gücləndirilməsi məqsədilə apardıqları mühəndis işlərinin qarşısını almaq məqsədilə Azərbaycan ordusunun bölmələri tərəfindən adekvat tədbirlər görülüb. Sosial şəbəkələrdə yayılan videolardan isə bəlli olur ki, təxribatlar erməni tərəfinə baha başa gəlib. Azərbaycan ordusu yenə erməniləri tərksilah edərək qovub. Ümumiyyətlə, bu görüntülər bir daha nümayiş etdirir ki, erməni ordusu böyük vahimə və qorxu içindədir. Bu fonda Azərbaycan ordusunun yaxınlaşması ilə onlar dərhal qorxuya düşür, təslim olmağa üstünlük verir. Bunu ermənilərin son təxribatları fonunda yayılan videogörüntülər də təsdiq edir. Beləliklə, sərhəddə erməni hərbçilərinin dəfələrlə törətdiyi təxribatların nəticəsi olaraq, noyabrın 14-də Azərbaycan hərbçiləri ermənilərin postlarını ələ keçirib. Ermənilər silah-sursatlarını, texnikalarını, bir hər şeylərini ataraq ərazidən qaçıblar. Digər bir məlumatda qeyd olunur ki, Ermənistan silahlı qüvvələrinin zabiti və üç erməni hərbçisi onlara yaxınlaşan azərbaycanlı hərbçiləri görüb qaçmağa çalışıblar. Onlar tələsik avtomobilə minib ərazini tərk etmək istəyiblər. Lakin avtomobil Qaragöl gölü ərazisində batıb, ermənilər canlarını batmaqdan güclə qurtarıblar.
Hesab edilir ki, növbəti təxribatlar Ermənistana daha baha başa gələcək. Baş verənlər Ermənistanda da ciddi təşvişə səbəb olub. Ermənistan parlamentində “Mənim şərəfim” partiyasını təmsil edən deputat Tiqran Abramyan bildirib ki, artıq gərginlik pik həddə çatıb və Ermənistan Müdafiə Nazirliyi bunu cəmiyyətdən gizlətməkdə çətinlik çəkir: “Sərhədin şərq hissəsində olan gərginlik artıq Müdafiə Nazirliyi tərəfindən təsdiqləndi. Biz qeyri-rəsmi mənbələr vasitəsilə sərhəddən xoşagəlməz hadisələr haqqında məlumat alırıq. Əldə etdiyimiz məlumatların hamısı bəd xəbərlərdir. Müdafiə Nazirliyinə məsləhət görürəm ki, doğru informasiyanı cəmiyyətdən gizlətməsin və xalqımız sərhəddə olan hadisələr haqqında dolğun məlumatlandırılsın. Bu həm hakimiyyət üçün, həm də xalq üçün xeyirlidir. Ən azından, panikanın qarşısını alın. Yoxsa mənfi nəticələrlə üzləşəcəyik”. Ermənistanın keçmiş müdafiə naziri Seyran Ohanyan isə məsələyə özünəməxsus tərzdə don geyindirməyə çalışıb: “Ankara və Bakı Zəngəzur dəhlizinin açılması üçün Ermənistana təzyiq edir. Bakı və Ankara Zəngəzur dəhlizinin açılması üçün Ermənistanın müxtəlif məntəqələrində irəliləmək istəyirlər. Ermənistan hakimiyyəti isə mövcud vəziyyətdən ləyaqətlə çıxmaq üçün bunun qarşılığında heç bir tədbir görmür. Bütün məğlubiyyəti canla-başla qəbul edirlər”.
Nahid SALAYEV
