Noyabrın 11-nə keçən gecə İrəvanda baş vermiş qanlı qarşıdurma və nəticədə erməni eks-deputatın və kriminal avtoritetin güllələndiyi ilə bağlı bəzi təfərrüatlar məlum olub. Erməni KİV-ləri bildirir ki, ilk atəşi güllələnən Nikol Paşinyanın yaxın adamlarından biri olan kriminal avtoritet Artur Kazaryan açıb.
Qeyd edilir ki, noyabrın 11-də axşam Artur Kazaryan (“Kanakertsi Tuy”) öz tərəfdaşları ilə birlikdə, tapança və avtomatlarla silahlanaraq keçmiş deputat Artuş Simonyanın evinə gediblər. Bu səfərin səbəbi məlum deyil. Evdəki “razborkanın” nəticəsi isə 4 ölü, 4 yaralı olub. Öldürülənlər “Kanakertsi Tuy” və həmin Simonyan özü, habelə Araik Xaçatryan və Artur Boroyan olublar.
Bildirilir ki, Simonyanın oğullarından biri Vladimir Simonyan yaralanıb. İlk atəşi də məhz onun açdığı deyilir. Həmin atəşlə “Kanakertsi Tuy” öldürülüb. Məlumatlara görə, qanlı toqquşmada tərəflərdən biri Arayik Arutyunyanın bağışladığı silahdan istifadə edib. Separatçıların rəhbərinin bağışladığı silahlardan İrəvanda qanlı döyüşlərdə istifadə edilməsi ilk dəfə deyil.
Bundan əvvəl Ermənistan deputatının qardaşı Xaçatur Sukiasyan da Amiryan küçəsində məişət zəminində yaranmış münaqişədə Arutyunyanın hədiyyə etdiyi silahdan atəş açıb. O zaman itki olmayıb.
Baş verən bu hadisə Ermənistan rəhbərliyinin və Qarabağdakı separatçı “lider”lərin həm də kriminal mahiyyətini açıb ortaya qoymurmu?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, hazırda Ermənistan cəmiyyətini Arayik Arutyunyan hansı xidmətlərinə görə kriminal avtoritetə silah hədiyyə etməsi və respublikanın baş nazirini kriminal dairələrlə nə bağlayır sualları maraqlandırır: “Kriminal “razborkada” adları hallanan bir tərəfin Paşinyanla çox yaxın münasibətdə olduğu deyilir. Hətta son seçkilərdə həmin dairələrin Paşinyana ciddi dəstək verdiyi qeyd olunur. Tərəflərdən birinin istifadə etdiyi silahın Arayik Arutyunyan tərəfdən hədiyyə edilməsi göstərir ki, rəqiblərdən biri “Qarabağ klanı”na, digəri isə Paşinyana yaxın olub. Deməli, siyasətdəki qütbləşmə, özünü Ermənistandakı kriminal dairələrlə də biruzə verməyə başlayıb. Bu da Ermənistan siyasi dairələrinin və rəhbərliyinin kriminal elementlərlə yaxın əlaqə və iş birliyində olduğuna bir sübut sayılır. Paşinyandan əvvəlki hakimiyyət də qanuni oğrularla sıx əlaqədə olub. Ermənistanın hakim hərbi-cinayətkar rejimi və vaxtilə onun başında duran Serj Sarkisyanın postsovet məkanındakı kriminal dairələrlə sıx əlaqəsi olması barədə çox yazılıb.
Serj Sarkisyan və onun cinayətkar dəstəsi məhz kriminal dəstlərin dəstəyi ilə Ermənistanda siyasi olimpin zirvələrini “fəth” etməli olub və uzun illər hakimiyyətdə oturub. Bundan əlavə, Avropa ölkələrində həbs edilən bir neçə erməni kriminal avtoritetdə Ermənistan XİN-in təqdim etdiyi diplomatik pasport aşkarlanmışdı. Bütün bu faktlar bir daha sübut edir ki, Ermənistanın bütün rəhbərləri terrorçu-kriminal dairələrlə sıx iş birliyində fəaliyyət göstəriblər və bu hazırda da davam edir”.
Məhəmmədəli QƏRİBLİ
