“İkinci Qarabağ savaşında göstərdiyimiz əzmkarlıq, iradə, rəşadət bizi böyük Zəfərə gətirib çıxardı”. Bu barədə Prezident İlham Əliyev İstanbulda Türkdilli Dövlətlərin Əməkdaşlıq Şurasının VIII Zirvə Görüşündə çıxışı zamanı bildirib.
Ölkə başçısının sözlərinə görə, müharibə vaxtı Türkiyənin dəstəyi şərəfli missiyamızı yerinə yetirməkdə bizə əlavə güc verdi: “Onu da bildirməliyəm ki, bunu hər kəs görür, bizə əlavə güc verən əziz qardaşım Rəcəb Tayyib Ərdoğanın müharibənin ilk saatlarından başlayaraq son dəqiqələrinə qədər bizə göstərdiyi dəstək və mənəvi dayaqdır. Çünki biz bu dəstəyi hiss edərək, onun sözlərinə qulaq asaraq özümüzü daha da güclü hiss etdik. Çünki hörmətli Cümhurbaşqanı demişdir ki, Azərbaycan bu savaşda tək deyil. Türkiyə Azərbaycanın yanındadır və hər zaman yanında olacaqdır və bu, bizə əlavə güc verdi. Bu, bəzi qüvvələri - Ermənistan himayədarlarını bu savaşdan kənarda tutdu və bizə imkan verdi ki, biz bu şərəfli missiyamızı yerinə yetirək”.
Göründüyü kimi, Türkiyə kimi böyük və güclü dövlətin Azərbaycana verdiyi siyasi-mənəvi dəstək, Ermənistanı himayə edən güc mərkəzlərinin prosesə müdaxilə etməsini önləyib. Bu da öz növbəsində Azərbaycanın müharibədə qələbəsini qaçılmaz etdi.
Məsələyə münasibət bildirən hərbi ekspert Ramil Məmmədlinin sözlərinə görə, ölkə başçısının səsləndirdiyi fikirlər tamamilə reallığı əks etdirir: “Düzdür, Azərbaycan resurslarına görə bütün mənalarda Ermənistandan üstün idi. Həm iqtisadi, həm də hərbi imkanları baxımından. Bütün bunları görməmək mümkün deyil. Ancaq o da var ki, ikili standartlar və müəyyən dairələrin himayəsi sayəsində Ermənistan uzun illər Azərbaycan ərazilərini işğal altında saxlaya bildi. Bunlar olmasaydı Ermənistan işğal siyasətini davam etdirə bilməzdi. Lakin bütün bunlara baxmayaraq, Prezident İlham Əliyevin rəhbərliyi sayəsində güclü ordu yaradıldı. Azərbaycan Ordusu dünyanın 50 güclü ordusu siyahısına düşdü. Ən müasir silah sistemləri alındı. Keçirilən müxtəlif hərbi təlimlər sayəsində ordunun döyüş qabiliyyəti artırıldı. Məlum idi ki, Ermənistan xoşluqla ərazilərimizi işğaldan azad etməsə, hərb yolu ilə bu iş görüləcək. Belə də oldu. Ancaq nəzərə almalıyıq ki, təkcə hərbi baxımdan üstün olmaq heç də hər zaman qələbə qazanmağı təmin etmir. Güclü siyasi dəstək də sözügedən məsələdə vacib faktorlardan biridir. Həqiqətən də müharibənin ilk günündən Türkiyənin Azərbaycanın yanında olması kənar müdaxilələrin qarşısını aldı. Hansı ki, belə bir risq var idi. Çünki Azərbaycanın güclü olmasını, öz ərazi bütövlüyünü təmin etməsini istəməyən dairələr var idi. Məhz Türkiyənin siyasi dəstəyi sayəsində onların müdaxilə planları baş tutmadı”.
Hərbi ekspert onu da qeyd etdi ki, bundan sonra heç vaxt Ermənistan öz mənfur niyyətlərini reallaşdıra bilməz.
Vidadi ORDAHALLI
