Məlum olduğu kimi, bugünlərdə Fransanın xarici işlər naziri Jan-İv le Drian Azərbaycanın xarici işlər naziri Ceyhun Bayramov və Ermənistanın xarici işlər naziri Ararat Mirzoyanla görüşüb. Bu barədə Fransanın Xarici İşlər Nazirliyi məlumat yayıb.
Öncə fransalı nazir həmkarlarını ayrı-ayrılıqda qəbul edib. Daha sonra görüş üç nazir arasında baş tutub.
Görüş zamanı Fransa diplomatiyasının rəhbəri ölkəsinin Cənubi Qafqazda uzunmüddətli sülhün bərqərar olması naminə tərəflər arasında dialoqun intensivləşməsinə yardım etmək istəyini bir daha vurğulayıb.
Nazir həmkarları ilə siyasi səviyyədə danışıqları davam etdirməyə hazır olduğunu təsdiqləyib. Ermənistanın xarici işlər naziri Ararat Mirzoyanın ATƏT-in Minsk Qrupunun həmsədrləri İqor Xovayev (Rusiya), Endryu Şafer (ABŞ) və Bris Rokfeylə (Fransa) noyabrın 10-da Parisdə “Qarabağ münaqişəsi”nin nizamlanması imkanlarını müzakirə etdiyi bildirilir. Qeyd olunur ki, iclas iştirakçıları Qarabağ münaqişəsinin həlli ilə bağlı məsələlərin geniş spektrini müzakirə ediblər. Ararat Mirzoyan vurğulayıb ki, Qarabağ münaqişəsinin hərtərəfli həlli yalnız sülh yolu ilə, ATƏT-in Minsk Qrupu həmsədrlərinin mandatına uyğun olaraq mümkündür. Ararat Mirzoyanın Fransanın xarici işlər naziri ilə görüşündə yenə Minsk Qrupu həmsədrlərinin prosesə müdaxiləsinin zəruriliyi vurğulanıb. Göründüyü kimi, Fransa yenə də Ermənistanla Minsk Qrupu sövdələşməsinə dair müzakirələri aktiv şəkildə davam etdirir.
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistan–Azərbaycan Dağlıq Qarabağ münaqişəsinin tənzimlənməsi məqsədilə təsis edilən ATƏT-in Minsk Qrupu yarandığı gündən münaqişənin həlli yolunda heç bir səmərəli təşəbbüs göstərmədi: “Azərbaycan bu illər ərzində ATƏT-in Minsk Qrupunun həmsədrlərindən ədalətli mövqe, işğalçıya təsir və təzyiq, işğala son qoyulması üçün əməli fəaliyyət gözlədi. Amma bunların nəinki heç biri olmadı, hətta Ermənistana BMT qətnamələrinin yerinə yetirilməsi ilə bağlı, azacıq da olsa, beynəlxalq təzyiq belə göstərilmədi. Həmsədrlər Ermənistana təzyiq göstərmək, beynəlxalq hüquqdan irəli gələn müvafiq sanksiya rejimlərini tətbiq etmək əvəzinə, faktiki olaraq Ermənistanın işğalçılıq siyasətinə göz yumdular. ATƏT-in Minsk Qrupu 28 il ərzində münaqişənin hərbi həll yolunu inkar edərək Ermənistanın işğalçılıq siyasəti nəticəsində yaradılmış status-kvonu Azərbaycana qəbul etdirməyə və münaqişəni diplomatik-siyasi yollarla nizamlamağa uğursuz cəhdlər etdi. Nəticədə, etimadı itirən bu qurumun fəaliyyətsizliyi problemin sülh yolu ilə deyil, hərbi əməliyyatlarla həllinə gətirib çıxardı. 2020-ci il sentyabrın 27-də Azərbaycan Ordusu əks-hücum əməliyyatına başlayaraq, işğal altındakı torpaqlarını azad etdi.
Fransa həmin qrupun həmsədri olsa da, açıq şəkildə Ermənistanı müdafiə edir. Bu gün Ermənistanın müdafiəsinə qalxan, erməni lobbisinin əlində alətə çevrilən dövlətlər və siyasi mərkəzlər yaxşı anlayırlar ki, status məsələsini ortaya atmaqla Azərbaycana təsir edə bilmələri qeyri-mümkündür. İndi müharibə bitib, münaqişə həll olunub, bu baş verənlər haqda danışılası heç bir məsələ qalmayıb. Artıq Azərbaycanın həyatında yeni dövr - quruculuq, torpaqlarımızın bərpası dövrü başlanıb. Ona görə də, Minsk Qrupunun fəaliyyətini bərpa etmək istəyirlər ki, münaqişənin hələ tam həll edilmədiyinə dair görüntü yaratsınlar”.
Məhəmmədəli QƏRİBLİ
