“Əlvida, yuyulmamış Rusiya” - ermənilər Zaxarovanı, Lermontovu, 3+3-ü bir-birinə qatdı

Ramil Hüseynov: “Ermənilər yaxşı bilir ki, 6-lıq formatı reallaşsa revanş planları baş tutmayacaq”

img

Noyabrın 10-da Rusiya Xarici İşlər Nazirliyinin (XİN) rəsmi nümayəndəsi Mariya Zaxarova bəyan etdi ki, 3+3 formatı üzrə işlərin həyata keçirilməsinin vaxtı çatıb: “Biz hesab edirik ki, Azərbaycan, Gürcüstan, Türkiyə, Rusiya, Ermənistan və İranın iştirakı ilə 3+3 formatının işə salınması üzrə planları praktiki müstəviyə keçirməyin vaxtı çatıb. Biz o fikirdəyik ki, 3+3 formatı regionun bütün dövlətlərinin maraqlarına cavab verir”.

Qəribədir ki, Zaxarovanın məlum fikirləri ermənilərin hiddətinə səbəb olub. Ermənistanda bəlli mətbuat orqanları bunu Rusiyanın Ermənistana xəyanət etməsi kimi təqdim etməyə çalışır. Sözügedən məsələ ilə bağlı erməni mediası yazır: “Zaxarova həyasızcasına yalan danışır. Çünki “3+3” formatı Ermənistanın maraqlarına cavab verə bilməz. Və təkcə o deyil. Bizim milli maraqlarımız heç bir formata uyğun gəlmir. İstənilən yolla bizə “3+3” formulunu sırımağa çalışırlar. Hər gün bizə xəyanət edirlər. Sonra da təəccüblənirlər ki, Ermənistanda Lermontovun “Əlvida, yuyulmamış Rusiya” şeirinin sözləri ilə belə “strateji müttəfiq”lə bütün münasibətlərin kəsilməsini tələb edənlərin sayı artır”.

Görünən odur ki, Ermənistanda bəlli dairələr hər vasitə ilə geniş əməkdaşlıq formatının yaranmasına mane olmağa çalışır. Baxmayaraq ki, Ermənistanın xilası, iqtisadi baxımdan inkişafı bu formatdan keçir.

  • “...quduzlaşmış formada dirəniş göstərməyə çalışırlar”

Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, Ermənistanda Rusiyanın bu şəkildə hədəf alınması təkcə 6-lıq formatı ilə bağlı olan məsələ deyil: “Bu, sadəcə bir bəhanədir. Məsələnin mahiyyəti daha dərindir. Əvvəla, 90-cı illərdə ovaxtki Rusiya hakimiyyətinin yardımı ilə ərazilərimiz işğal olundu. 30 ilə yaxın ərazilərimiz işğal altında qaldı, amma bu dövr ərzində Ermənistan iqtisadi baxımdan Qarabağı dirçəldə bilmədi. Əksinə, sərvətlərini vəhşicəsinə istismar etdi. Bu dövr ərzində ermənilərdə belə bir təsəvvür yarandı ki, Rusiya bundan artıq onlara nəsə edə bilməz. O üzdən, iqtisadi inkişafla bağlı Qərbə meyllənməyə başladılar. Bunun bir səbəbi də erməni diasporunun böyük hissəsinin Qərbdə olması ilə bağlıdır. 2018-ci ildə “məxməri inqilabın” Ermənistanda baş tutmasının bir səbəbi də bununla bağlı idi. Erməni cəmiyyətində Rusiyaya qarşı antipatiya yetərincə formalaşmışdı. Heç şübhəsiz, Rusiya kifayət qədər bütün bu proseslərin fərqində idi. Məhz bu səbəbdən də 44 günlük müharibəyə mane olmadı. Kreml hesab edirdi ki, bu minvalla ermənilərə ciddi dərs vermiş olacaq. Nəticədə həm erməni cəmiyyəti ram ediləcək, həm də Rusiyapərəst qüvvələrin hakimiyyəti ələ keçirməsi tezləşəcək. Ancaq bəlli olduğu kimi, Moskvanın planları alınmadı. Əksinə, Rusiyaya qarşı olan aqressiya daha da gücləndi. Bunun nəticəsi idi ki, müharibədə məğlub olan Paşinyan seçkilərdə qalib gəldi. Kim nə deyir-desin, ermənilər ərazilərin işğal altından çıxmasını Rusiyaya bağışlamır. Ermənilər yaxşı bilir ki, 6-lıq formatı reallaşsa revanş planları baş tutmayacaq. Çünki ondan sonra tamamilə başqa reallıqlar yaranacaq. Bic ermənilər bütün bunların fərqindədir. Ona görə də quduzlaşmış formada dirəniş göstərməyə çalışırlar. Son günlər Ermənistanda silsilə anti-Rusiya aksiyalarının təşkilində bəzi Qərb dövlətlərinin də əli var. Rusiyanın orada təsir imkanları nə qədər güclü olsa da, Ermənistan uğrunda geosiyasi mübarizə bitməyib”.

Partiya sədri onu da qeyd etdi ki, sözügedən məsələlərdə Ermənistan sona qədər müqavimət göstərə bilməyəcək.

Vidadi ORDAHALLI

Son xəbərlər