Rusiya sülhməramlılarının nəzarəti altında olan ərazilərimizə qanunsuz səfər edənlərin ardı-arası heç cür kəsilmək bilmir. Azərbaycan dövlətinə qarşı açıq düşmənçilik edən və dövlət qurumlarımız tərəfindən rəsmən axtarışa verilən bəzi şəxslərin də Qarabağda peyda olması təəssüf və narazılıq doğurur.
Yayılan məlumatala görə, Azərbaycanın axtarışa verdiyi bloger, “Wargonzo” layihəsinin yaradıcısı Semyon Peqov yenə Qarabağa gəlib.
S.Peqov sülhməramlı qüvvələrin müvəqqəti nəzarəti altında olan ərazilərdə olub, həmçinin, Əsgəran qəsəbəsinin Ağdamla qonşu olan hissəsində qanunsuz xidmət aparan qanunsuz erməni hərbi birləşmələrinin üzvləri ilə görüşüb, onlarla şəkil çəkdirib.
Qeyd edək ki, Peqovla bağlı 2020-ci ilin noyabrında Azərbaycan Baş prokuroru tərəfindən Cinayət Məcəlləsinin 214-2 (terrorçuluğa açıq çağırışlar), 281.1 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və istintaqın aparılması Baş Prokurorluğun İstintaq İdarəsinə tapşırılıb.
Azərbaycan tərəfin axtarışa verdiyi Peqovu sülhməramlılar Qarabağa niyə buraxıb? Azərbaycan Peqovu sülhməramlılardan tələb edə bilərmi?
“Sülhməramlıların yaratdığı şərait nəticəsində Azərbaycanın rəsmən axtarışa verdiyi bir təxribatçının, antiazərbaycançının yenidən Qarabağda peyda olması…”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, müvəqqəti olaraq Rusiya sülhməramlılarının nəzarətində olan ərazilərdə son günlərdə xoşagəlməz proseslər gedir, orada qanuna zidd olaraq abidələr, büstlər qoyulur, kilsə tikilir, Azərbaycana düşmən münasibət bəsləyən Peqov kimilərinin qeyri-qanini səfərlərinə şərait yaradılır. “Bütün bu baş verənlər bizdə ciddi narahatlıq doğurur. Rusiya rəhbərliyi bununla nə demək istəyir? Həmin əraziləri “özününküləşdirir”, həmin ərazilərə “tam nəzarət etdiyini” göstərmək, yaxud bu ərazilərdən çıxmaq istəmədiyini Azərbaycana nümayiş etdirmək istəyir? Bu məsələlərin kökündə nə dayanır? İlk baxışdan görsənir ki, Azərbaycan-Rusiya münasibətləri qaydasındadır, danışıqlar gedir, Azərbaycanın mövqeyi nəzərə alınır, Ermənistanın güzəştə getdiyi görüntüsü də yaradılır. İstər Zəngəzur dəhlizi, istərsə də digər məsələlərlə bağlı, təbii ki, Rusiyanın təzyiqi altında Ermənistanın geri çəkildiyi hiss olunur. Bir tərəfdən biz bu prosesləri müşahidə edirik. Digər tərəfdən isə, deyək ki, Rusiyanın idarəçiliyi, təşəbbüsü ilə xoşagəlməz prosesləri də görürük. O cümlədən, Azərbaycanın axtarışa verdiyi təxribatçı, erməni “quyruğu” Peqovun rusiyalı sülhməramlıların müvəqqəti olaraq nəzarətində olan ərazilərimizə səfəri də bizi çox narahat edir. Peqov İkinci Qarabağ müharibəsinin gedişində Azərbaycana qarşı cinayət hərəkətləri törədib, anti-Azərbaycan cəbhəsində dayanıb, yalan, iftira, təxribat xarakterli məlumatlar yayıb. Müharibənin gedişi ilə bağlı qəsdən beynəlxalq ictimai rəyi yanlış istiqamətdə formalaşdırmağa çalışıb. O, Azərbaycana qarşı başqa cinayətlər də törədirdi. Azərbaycana qarşı həyata keçirdiyi cinayətlərə görə Peqov barəsində Azərbaycan hüquq-mühafizə orqanlarında cinayət işi qaldırılıb və o, beynəlxalq axtarışa verilib. Sülhməramlıların yaratdığı şərait nəticəsində Azərbaycanın rəsmən axtarışa verdiyi bir təxribatçının, antiazərbaycançının yenidən Qarabağda peyda olması, burada sərbəst hərəkət etməsinin özü təhlükəli məqamlardan xəbər verir. Bununla bağlı Azərbaycanın Rusiya qarşısında rəsmi mövqeyi olmalıdır. Çünki Peqov Rusiya vətəndaşıdır. Azərbaycanın Baş Prokurorluğunun da bu cinayətkarla bağlı rəsmi qərarı var. Peqovun əməlləri və sülhməramlıların cinayətkarın səfərinə göz yumması, şərait yaratması Rusiya rəhbərliyinin diqqətinə çatdırılmalıdır”.
A.Nağı hesab edir ki, Azərbaycanın tələbilə Peqov dərhal Qarabağdan uzaqlaşdırılmalıdır, digər tərəfdən isə, Rusiya doğrudan da Azərbaycanla müttəfiqlik əlaqələrinə əməl edirsə, öz üzərinə düşəni etməlidir: “Hesab edirəm ki, Rusiya özü Peqovun Azərbaycan hüquq-mühafizə orqanlarına təhvil verilməsinə təşəbbüs göstərməlidir. Azərbaycan bu istiqamətdə həm hüquqi müstəvidə, həm də siyasi dialoq müstəvisində ləngimədən işlərini görməlidir. Peqov cinayətkardır, onun bu şəkildə Azərbaycan torpağında peyda olması, “meydan sulaması” mənfi bir haldır. Bu oradakı qanunsuz erməni silahlı dəstələrinə də bir işarədir. Peqov orada nə iş görəcək, o orada təkcə informasiya təxribatı ilə məşğul olacaq, yoxsa terrorçu-separatçı qanunsuz erməni silahlı dəstələri arasında əlaqələrin gücləndirilməsi ilə məşğul olacaq? Bütün hallarda Peqov təhlükəli cinayətkardır və tutularaq Azərbaycana təhvil verilməlidir”.
A.Nağının sözlərinə görə, Azərbaycan Peqov məsələsini çox sərt şəkildə qoymalıdır. A.Nağı deyir ki, proseslərin gedişində Azərbaycan müəyyən düzəlişlərə nail olmalıdır. A.Nağı hesab edir ki, Rusiyanın maraqları, istəyi aydındır, o, bölgədə hansısa formada möhkəmlənməyə çalışır. “Rusiya, hətta ermənilərin dili ilə indidən belə tezis səsləndirir ki, Rusiya sülhməramlıları bölgədə həmişəlik qalmalıdır və sair. Əslində isə Rusiya sülhməramlılarının orada qalmasına heç bir ehtiyac yoxdur”-deyə A.Nağı qeyd etdi.
İradə SARIYEVA
