Qırğızıstan uzun illər Qarabağ məsələsində olduqca məsafəli siyasət yeridərək tərəfsiz mövqedən çıxış edib. Sözügedən məsələdə hansısa mövqe sərgiləməyib. Baxmayaraq ki, Qırğızıstan türkdilli dövlətlərdən biridir.
Ancaq ötən il Azərbaycanın müharibədə əldə etdiyi şanlı qələbə vəziyyəti dəyişdi. Məsələ ondadır ki, noyabrın 8-də Qırğızıstanın Xarici İşlər Nazirliyi “Twitter” hesabında Azərbaycanı BMT qətnamələrinə uyğun öz ərazi bütövlüyünü təmin etməsi ilə bağlı təbrik edib. Məhz Qırğızıstanın bununla bağlı rəsmi mövqe ortaya qoyması ermənilərə od qoyub. Ermənistan tərəfi Avrasiya İqtisadi İttifaqınn, KTMT-nin üzvü olan Qırğızıstanın belə addım atmasını heç cür həzm edə bilmir. Nə cür hiddətləniblərsə, erməni mətbuatı buna görə qırğızları açıq şəkildə təhqir etməkdən və aşağılamaqdan çəkinməyib: “Qırğızıstanın bizim müttəfiqimiz olmasına baxmayaraq, açıq şəkildə erməni xalqını və Ermənistanı təhqir edən hiyləsinə dözməliyikmi? Fikir verin - keçmiş sovet məkanının ən geridə qalmış respublikalarından biri olan, əhalisi dünən eşşəkdən düşüb maşına minən Qırğızıstanın Xarici İşlər Nazirliyi qədim erməni xalqının və Ermənistanın üzünə açıq-aşkar tüpürür”.
Bütün bunlar bir daha onu göstərir ki, Ermənistanla çox yaxın əlaqələrə malik olan dövlətlər belə, erməni işğalını qəbul etmir və bununla bağlı ortaya hansısa mövqe qoyurlar.
“Ermənilər elə başa düşürlər ki, Qırğızıstanla bir ittifaqda olmaqla, bu dövlət ermənilərin...”
Məsələyə münasibət bildirən AMİP-in sədr müavini Afsəddin Nəbiyevin fikrincə, Orta Asiyanın türkdilli dövlətlərinin bununla bağlı ortaya konkret mövqe qoyması çox müsbət haldır: “Düzdür, Qazaxıstanın bununla bağlı aydın mövqedən çıxış etdiyi məlumdur. Ancaq Qırğızıstanın açıq mövqe sərgiləməsi bir ilk oldu. Ümumilikdə, 8 noyabr Zəfər Gününü xalqımız böyük coşqu ilə qeyd etdi. Bu, xalqımız üçün elə əlamətdar gündür ki, hər il bu günün əhəmiyyəti daha çox hiss olunacaq. Ancaq görünən odur ki, dünyanın əksər böyük dövlətləri ikili standartları dovlətin xarici siyasətinin "prioritet"ləri modelinə çeviriblər. Son 30 ildə, demək olar ki, biz dost və düşmənimizi çox yaxşı tanıyırıq. Beynəlxalq hüquqdan dünyaya "dərs verən dövlətlər", nədənsə, BMT-nin məlum qətnamələrini öz gücü hesabına təmin edən dövlətimizi quru sözlərlə təbrik etməkdən belə çəkindilər. Təbii ki, Azərbaycanla dostluq münasibətləri yüksək səviyyədə olan dövlətlər xalqımızı Zəfər Günü münasibətilə təbrik etdilər. Türkdilli dövlətlərə xüsusilə təşəkkür edirik ki, hər biri Azərbaycan xalqını təbrik etdi. Türk Şurası dövlətləri artıq siyasi səhnədə birlik modeli nümayiş etdirərək böyük iqdisadi gücə çevrilməkdədirlər. Erməni siyasi dairələri ümumiyyətlə dövlətçilik təfəkkürünə sahib deyillər. Çünki ermənilərin heç vaxt dövlətçilik ənənələri olmayıb. Onlar hələ də dərk etmirlər ki, Qırğızıstan qədim xalq olaraq böyük mədəniyyətə, dövlətçiliyə sahib olan bir dövlətdir. Azərbaycanla onu qədim tellər bir-birinə bağlayır. Eyni dilə, soykökə bağlılığımız var. Ermənilər elə başa düşürlər ki, Qırğızıstanla bir ittifaqda olmaqla, bu dövlət ermənilərin faşist ssiyasətinə göz yumaraq Ermənistanı dəstəkləməlidir. Bu əsla mümkün deyil. Qırğızıstan xalqının çox qədim dövlətçilik ənənələri var. Eyni zamanda sülhü, ədaləti hər zaman dəstəkləyən bir dövlətdir. Ermənilər özlərinə baxıb utanc keçirmək əvəzinə, qədim xalq olan, bizə dost-qardaş dövlət olan Qırğızıstanı aşağılamaqdan belə çəkinmir. Ona görə də, vaxtılə yaranmış bu ittifaqda Rusiyanın təzyiqilə məcburən Qırğızıstanın yer alması haqlı suallar doğurur. Türk Şurası gücləndikcə bu məsələ də öz həllini tapacaq. Çox yaxın illərdə öz siyasətini faşizm ideyaları ilə bürüyən Ermənistan tamamilə təklənmiş vəziyyətdə olacaq. Onunla bir ittifaqı bölüşməyi hansı dövlət istəyər ki? Məncə, Rusiyadan başqa heç bir dövlət Ermənistanla bir ittifaqda olmaq istəməz”.
Sədr müavini onu da qeyd etdi ki, Rusiya daim ermənilərdən maşa kimi istifadə etsin deyə, bu ittifaqı saxlayır.
Vidadi ORDAHALLI
