Rusiya sülhməramlıların Azərbaycandan icazə almadan özbaşına Xocalıda rus-pravoslav kilsəsi inşa etməsi ölkə ictimaiyyətində ciddi narazılıq yaradıb.
“TASS”ın yaydığı məlumata görə, açılış mərasimində Rusiyanın Cənub Hərbi Dairəsi komandanının müavini, Qarabağdakı sülhməramlı sayılan kontingentin ilk komandanı, general-leytenant Rüstəm Muradov və Rusiyanın Qarabağdakı sülhməramlı sayılan kontingentinin hazırkı komandanı, general-leytenant Gennadi Anaşkin də iştirak edib.
“Təəssüf ki, Qarabağda heç bir rus kilsəsi salamat qalmayıb. Sovet hakimiyyəti illərində hamısı bolşeviklər tərəfindən dağıdılıb və buna görə də İsanın mövludu şərəfinə ucaldılan Rus Pravoslav Kilsəsi dini, tarixi əhəmiyyət kəsb edir”. Bunu “Xankəndi rus icmasının sədri” Aleksandr Bodrov deyib.
Sözügedən kilsənin də tikintisinə rəsmi Bakı hər hansı bir icazə verməyib. Ekspertlər deyir ki, Qarabağda rus icması yoxdur, bu halda orada bu ibadətgahın tikintisi təəccüblü və müəmmalı məsələdir.
Bir çox ekspertlərin fikrincə, 28 il əvvəl ermənilər tərəfindən Azərbaycan vətəndaşlarına qarşı Rusiyanın 366-cı alayının dəstəyi ilə kütləvi soyqırım həyata keçirilmiş Xocalı rayonu ərazisində xristian pravoslav kilsəsinin tikintisi mənəvi cəhətdən düzgün deyil, bu yolverilməzdir.
“…Rus-pravoslav kilsəsinin inşası birbaşa ermənilərin xüsusi məkrli planı əsasında həyata keçirilib”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Rusiya sülhməramlılarının Xocalıda pravoslav kilsəsi acmasını nə anlamaq, nə də qəbul etmək olar. Azərbaycan dövlətinin icazəsi olmadan bu addımı atan rusiyalı sülhməramlılarının özbaşnalıq etdiyini deyən Q.Hacıyevin sözlərinə görə, hazırda nə Xocalıda, nə də Xankəndidə rus icması var, orada ruslar yaşamır və bu baxımdan, kilsənin açılması heç cür anlaşılan deyil. “Rusiya sülhməramlıları ermənilərin toruna düşüblər. O hiyləgərlik yoxdur ki, onu ermənilər bacarmasın. Ermənilər hər cür dolaşıq məsələlər yaradırlar. Xocalıda bir nəfər də olsun erməni yaşamayıb, indi orada istədiklərini edirlər. Xocalı tarixən Azərbaycan türklərinin yaşadığı yer olub. Xocalıda heç zaman nə erməni abidələri, kilsələri, nə də rus-pravoslav kilsəsi olub. Ermənilər orada son 30 ildə kilsə tikiblər. Xocalıda rus pravoslav kilsələrinin tikilməsi bir təxribatdır və bu, Azərbaycanın humanistliyindən, tolerantlığından sui-istifadədir. Azərbaycan tolerant ölkədir, Xocalı da Azərbaycan şəhəridir, bizim tarixi yurd yerlərimizdən biridir. Rusiya müvəqqəti olaraq sülhməramlıların nəzarəti altında olan ərazilərimizdə nə isə inşa etmək istəyirdisə, onu separatçılarla əl-ələ verib etməli deyildi, bunu Azərbaycan dövlətinin rəsmi icazəsi ilə etməlidir. Mən inanıram ki, Xocalıda rus-pravoslav kilsəsinin inşası birbaşa ermənilərin xüsusi məkrli planı əsasında həyata keçirilib. Xankəndidə rus icması nə gəzir ki, hansısa bir adam ortaya çıxıb qondarma “Xankəndi rus icması” adından danışır, açıqlama verir”.
Q.Hacıyevin sözlərinə görə, Xocalı Azərbaycanın tam nəzarətinə keçdikdən sonra separatçı tör-töküntülərinin özlərinin və onlara havadarlıq edənlərin bütün qanunsuz əməllərinə hüquqi qiymət veriləcək. “Xocalıda rus- pravoslav kilsəsinin inşası ermənilərin məkrli məqsədlərinə xidmət edir. Bu gün Azərbaycan haqlı olaraq erməniləri bizim abidələrə, dini-tarixi sərvətlərimizə qarşı vandalizm törətməkdə ittiham edir. Ermənilər Azərbaycan xalqının məscidlərini, alban kilsələrini, tarixi-arxeoloji abidələrini dağıdıb, dini məbədlərini məhv edib, onlar Qarabağda həm müsəlman, həm də xristian abidələrinə divan tutublar. Azərbaycanın 44 günlük Vətən müharibəsində qazandığı zəfərin birinci ildönümündə həyata keçirilən kilsə təxribatı həm ermənilərin, həm də Rusiya sülhməramlılarının mahiyyətini ortaya qoyur. Amma bütün hallarda, baş verənlərə görə Rusiyanın bir izahı olmalıdır. Biz heç bir zaman qeyri-dinlərə mənfi münasibət göstərməmişik, bizdə başqa dinlərə böyük sayğı, dözümlülük var, bunu deməyə ehtiyac yoxdur. Bu faktdır. Azərbaycanın tolerantlığından sui-istifadə edərək din pərdəsi altında təxribat törədilməsini, qanunlarımıza hörmətsizlik edilməsini, sayğısızlığı qəbul etmək olmaz”-deyə Q.Hacıyev vurğuladı.
İradə SARIYEVA
