Ermənistan Prezidenti Armen Sarkisyan “Arqumentı i faktı” qəzetinə müsahibəsində deyib ki, Rusiya sülhməramlıları Qarabağda "həmişəlik" qalmalıdırlar. O, Rusiya sülhməramlılarının fəaliyyətini qiymətləndirmək və onların Qarabağda qalması müddətinə dair sualı cavablandıraraq deyib: “Həmişəlik. Rusiya ordusu on illərlə, yüz illərlə bu ərazidədir. Onun burada olması son dərəcə vacibdir. Sülhməramlıların burada etdiklərinin həm regional siyasət, həm Qarabağın statusu və bu regionun gələcəyi üçün, sabah müharibə olmaması haqqında ehtimal olunan danışıqlar üçün böyük əhəmiyyəti var”.
Ermənistanın 2020-ci il Qarabağ müharibəsində məğlubiyyətinin səbəblərinə gəlincə, prezident Sarkisyan deyib ki, birinci müharibədə ermənilər silahlı qüvvələrin təşkili, Sovet ordusunda xidmət edən, Əfqanıstanda döyüşmüş ermənilərdən istifadə etməkdə Azərbaycandan 2-3 il irəlidə olub. Daha sonra isə, onun sözlərinə görə, birinci müharibədən sonrakı 26 il ərzində erməni tərəfi öz qələbəsini sabit sülhə çevirmək üçün böyük imkanından istifadə edə bilməyib: “İstifadə etmədik və ciddi geri qaldıq. Çünki Azərbaycan hələ Heydər Əliyevin rəhbərliyi zamanı anlayıb ki, neft kimi üstünlüyə malikdir. Və onu dünya bazarlarına çıxarmaq üçün hər şey etdi. Nəticədə ötən illər ərzində biz bütün üstünlüklərimizi itirdik”.
Göründüyü kimi, Ermənistan rəsmiləri hər vasitə ilə çalışırlar ki, Rusiya sülhməramlılarının Qarabağda qalması daimi olsun. Halbuki, Azərbaycan Rusiya sülhməramlılarının bölgədə yerləşdirilməsinin müvəqqəti olduğunu bəyan edib. Üstəlik, Azərbaycan tərəfi sülhməramlıların mandatı ilə bağlı hələlik heç bir sənəd imzalamayıb. 10 noyabr 2020-ci il tarixli üçtərəfli bəyannaməyə görə, Rusiya sülhməramlı kontingentinin bölgədə qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyətilə bağlı tərəflərdən hər hansı biri çıxış etməzsə, müddət avtomatik olaraq növbəti 5 ilə uzadılır. Ermənilər elə danışır ki, sanki hər şey onların istəyindən asılı olacaq. Ancaq müqavilənin şərtləri belə deyil. O baxımdan bütün bunları ekspertlər necə dəyərləndirir?
“Prezident Armen Sarkisyan bu fikirləri dilə gətirməklə Kremlə yarınmaq istəyir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Ermənistan rəsmilərinin belə bir arzu ilə yaşaması yeni deyil: “Nəinki Armen Sarkisyan, digər erməni rəsmiləri də sülhməramlıların daimi qalmasını istəyirlər. Hətta arada deyirlər ki, ATƏT-in Minsk Qrupu bu prosesi nizamlasın və lazım olsa həmsədr ölkələrin sülhməramlıları Qarabağa gəlsin. Yəni ermənilərdən nə desən gözləmək olar. Ermənistan prezidenti A.Sarkisyan bu fikirləri dilə gətirməklə Kremlə yarınmaq istəyir. Bununla öz mənfur niyyətlərini həyata keçirmək istəyirlər. Çünki yaxşı bilirlər ki, Azərbaycanla təkbətək üz-üzə qalsalar uduzacaqlar. Ona görə də hər vasitə ilə öz oyunlarını qurmaq istəyirlər. Bunlar anlamaq istəmir ki, Rusiya sülhməramlılarının Qarabağda qalması təkcə Ermənistandan asılı olan məsələ deyil. Bu, eyni zamanda Azərbaycandan asılı olan məsələdir. Azərbaycanın mövqeyi də getdikcə güclənir və şərtləri bizim ölkə diqtə edir. Bu isə o deməkdir ki, rus sülhməramlıları nəinki 2025-ci ildə, ola bilsin bundan da tez Qarabağı tərk etsin”.
Bu baxımdan partiya sədri hesab edir ki, erməni rəsmiləri xam xəyallara qapılmamalıdır.
Vidadi ORDAHALLI
