Ermənistanın imzaladığı kapitulyasiyanın bir ilinin tamamında Azərbaycanın keçirdiyi Zəfər tədbirləri zamanı məğlub ölkənin təxribatçı addımlarını müşahidə etdik. Qarşı tərəf ardıcıl olaraq iki gündə Şuşa ətrafında və Kəlbəcərdə təxribat törətməklə yaxın vaxtlarda keçirilməsi planlaşdırılan üçtərəfli görüşdə əlini gücləndirmək və hazırki mərhələni dalana dirəmək istəyir.
Eyni zamanda, bütün törədilən təxribatlar onların daxili siyasəti üçün olduqca vacibdir. Çünki Ermənistanda daxili siyasətdə və orduda keçmiş Qarabağ klanından olan şəxslər məsələnin birdəfəlik həllini istəmir. Ancaq Paşinyanın Zəngəzurla bağlı açıqlamalarını, cənab Rəcəb Tayyib Ərdoğanla görüşmək üçün etdiyi cəhdləri müsbət addım kimi qəbul edilirdi. Paşinyan dünyaya danışıqlara öz istəkləri ilə deyil, Türkiyə və Azərbaycanın təzyiqi ilə getdikləri görüntüsü vermək istəyir. Ona görə rəsmi İrəvan da bilərəkdən belə təxribatlara əl atır. Qeyd edək ki, məhz həmin ərəfədə Ermənistan müdafiə nazirinin də Qarabağa qanunsuz səfəri reallaşdı. Azərbaycan Müdafiə Nazirliyi Ermənistan müdafiə naziri Arşak Karapetyanın Dağlıq Qarabağa səfərini pisləyən bəyanatla çıxış edib.
Ermənistan Müdafiə Nazirliyinin noyabrın 8-də yaydığı məlumata görə, Arşak Karapetyan Dağlıq Qarabağa iki günlük səfər edib.
Nazirliyin yaydığı videoda Ermənistan müdafiə nazirinin avtomobil kortejinin Rusiya sülhməramlılarının nəzarət etdiyi Ermənistan-Azərbaycan sərhədindəki postdan yoxlama aparılmadan keçdiyi, Laçın dəhlizi vasitəsilə Xankəndiyə getdiyi əskini tapıb. Nazir Karapetyan ermənilərin yaşadığı Xankəndidə hərbçilərlə görüşüb, erməni hərbçilərinin olduğu müşahidə məntəqəsindən Azərbaycan hərbçilərinin yerləşdiyi mövqelərə baxıb, hərbçilərə mükafatlar təqdim edib və Qarabağdakı erməni hərbi-siyasi “rəhbərlik”lə görüşüb.
Azərbaycan Müdafiə Nazirliyinin bəyanatında deyilir ki, Ermənistanın müdafiə naziri Arşak Karapetyan Rusiya sülhməramlılarının müvəqqəti olaraq yerləşdirildiyi Azərbaycan ərazilərinə qanunsuz səfər edib. Maraqlıdır ki, ermənilərin törətdiyi bu təxribatlarla bağlı Rusiya sülhməramlıları heç bir məlumat və bəyanat yaymır. Bunun səbəbi nə ilə bağlıdır?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, hazırda Qarabağda müxtəlif təxribatlar törədilir: “Rus sülhməramlıları fəaliyyətlərinin ilkin mərhələsində öz vəzifələrini yerinə yetirsələr də, təəssüf ki, hazırda biz bunu görə bilmirik. Qarabağda separatçıların tör-töküntüləri hələ də qalmaqdadır, ora qanunsuz yüklərin və erməni silahlı birləşmələrinin gətirilməsinə, müxtəlif Ermənistan rəsmilərinin qanunsuz səfərlərinə göz yumulur. Ermənilərin Zəfər günündə və ondan sonra törətdiyi açıq təxribatla bağlı sülhməramlılar heç bir açıqlama vermir. Rusiya qarşısında konkret məsələ qaldırmaq lazımdır, yaxud da Rusiya bir dəstə separatçının öhdəsindən gələ bilmədiyi haqqında Azərbaycana məlumat verməlidir. Əgər Rusiya öz vəzifələrini yerinə yetirə bilmirsə, Azərbaycanın bütün sözügedən məsələləri həyata keçirmək üçün lazımi qədər gücü və təcrübəsi var. Ancaq biz tam fərqli mənzərə görürük. Rusiya sülhməramlıları Ermənistanın müdafiə nazirini müşayiət edib Qarabağa gətirirlərsə, deməli, ruslar ermənilərə açıq dəstək verir. Faktiki olaraq, biz Rusiyanın üzərinə götürdüyü öhdəlikləri yerinə yetirə bilməməsinin şahidi oluruq. Məhz rus sülhməramlılarının fəaliyyətsizliyi ucbatından bu gün biz ermənilərin açıq təxribatı ilə rastlaşırıq. Hesab edirəm ki, artıq Azərbaycanın öz ərazilərində antiterror əməliyyatlarına start verməsinin vaxtı çatıb. Çünki sülhməramlılar faktiki olaraq separatçılarla əlbir fəaliyyət ortaya qoyur”.
Məhəmmədəli QƏRİBLİ
