Azərbaycan Gorus-Qafan yolunun öz ərazisindən keçən hissəsində gömrük postları və sərhəd prosedurlarını həyata keçirəcək nəzarət-buraxılış məntəqəsi quracaq. Bununla bağlı məlumatı Ermənistan Təhlükəsizlik Şurasının katibi Armen Qriqoryan Ermənistanın İctimai Televiziyasına müsahibəsində təsdiqləyib.
Armen Qriqoryanın sözlərinə görə, Azərbaycan tərəfi Ermənistanı məlumatlandırıb ki, noyabrın 10-dan 11-nə keçən gecədən başlayaraq Gorus-Qafan yolunda sərhəd və gömrük nəzarəti həyata keçirməyə başlayacaq. O bildirib ki, Azərbaycan bu məqsədlə nəzarət-buraxılış məntəqəsi quraşdıracaq. Onun sözlərinə görə, Ermənistan tərəfi də, həmçinin müvafiq addımlar atacaq və sözügedən yolda gömrük və sərhəd nəzarət məntəqələri yerləşdirəcək. Qriqoryan əlavə edib ki, Ermənistan artıq bu işə başlayıb. Qeyd edək ki, Gorus-Qafan yolunda bundan qabaq Daxili İşlər Nazirliyinin postu qurulmuşdu. Bu yolun nəzarətə götürülməsi bizim üçün çox vacibdir. Həmin yerdə gömrük nəzarəti mütləq həyata keçirilməliydi və oldu. Çünki həmin yolda yükdaşıma işləri daha çox gedir. İrandan Ermənistana əsas yükdaşıma yoludur. Azərbaycan belə bir praktikanı Laçın dəhlizinə də tətbiq edə bilərmi? Nəzərə alsaq ki, hazırda bu dəhlizdən ermənilər daha çox təxribatçı məqsədlər üçün istifadə edirlər.
Politoloq İlqar Vəlizadə “Bakı-Xəbər”ə açıqlamasında bildirdi ki, Laçın dəhlizi ilə bağlı vəziyyət bir qədər fərqlidir: “İmzalanan birgə bəyanatda həmin dəhlizin humanitar məqsədlər üçün istifadə ediləcəyi qeyd olunub. Bu səbəbdən də ora nəzarət Rusiyanın sülhməramlılarına tapşırılıb. Bu baxımdan da burada yanaşma bir qədər fərqlidir. Əslində bu proses sərhədlərin tam dəqiqləşməsindən sonra həyata keçirilə bilər. Bunu etmək bizim səlahiyətimizdədir. Beynəlxalq praktikada da belə hallar var və müəyyən normalar çərçivəsində tənzimlənir. Sərhədimizin istənilən yerinə gömrük postu qoymaq bizim səlahiyyətimizə aid olan məsələdir. Buna görə kimsə bizə irad tuta bilməz. Bizim sərhədimizdən, yollarımızdan istifadə olunursa, deməli, rüsum da ödənilməlidir, gömrük də olmalıdır. Laçın dəhlizinə biz humanitar məqsədlər üçün icazə vermişik. Ancaq son günlər görürük ki, həmin dəhlizdən tam başqa məqsədlərlə istifadə edilir. Əgər Ermənistanın müdafiə naziri həmin dəhlizdən maneəsiz keçib, gedib Qarabağdakı qanunsuz silahlı dəstələrə hərbi təlim keçirsə, bunun harası humanitar dəhliz oldu? Bu bizə tam əsas verir ki, ciddi xəbərdarlıq edək. Qaydalara əməl edilməyəcəyi təqdirdə, gediş-gəlişi tam məhdudlaşdıra bilərik. Bu baxımdan da, lazım gəlsə, daha ciddi məhdudlaşırıı tədbirlərə əl atmağa məcbur olacağıq”.
Məhəmmədəli QƏRİBLİ
