Rusiya sülhməramlıları Azərbaycanın Qarabağ bölgəsində yerləşdirilmələrinin ildönümünü qeyd edib. Erməni mediasının məlumatına görə, Rusiya sülhməramlılarının keçmiş komandanı, general-leytenant Rüstəm Muradov da bu məqsədlə Ermənistan üzərindən Qarabağa gedib.
Bildirilir ki, Rusiya Müdafiə Nazirliyi 200-ə yaxın medal buraxıb: “Onları Cənub Hərbi Dairəsinin komandirinin müavini Rüstəm Muradov gətirib. Medallar fərqlənən hərbçilərə verilib”.
Qeyd edək ki, Azərbaycanın Qarabağ bölgəsindəki Rusiya sülhməramlı kontingentinin ilk komandanı Rüstəm Muradov olub və onun missiyası sentyabrın 6-da başa çatıb. Sentyabrın 9-da Muradovun yerinə general-mayor Mixail Kosobokov təyin olunub.
Sentyabrın 25-də isə general-leytenant Gennadi Anaşkin Rusiya sülhməramlı kontingentinin komandanı vəzifəsinə təyin edilib.
Şuşada Zəfər bayramımızı atəşfəşanlıqla, böyük coşquyla qeyd edərkən Rusiyanın bu addımına hansı adı vermək olar? Rüstəm Muradov niyə məhz həmin gündə medal paylayır və Azərbaycan ərazisinə Ermənistan üzərindən gedir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Rüstəm Muradovun məhz deyilən zamanda Qarabağa gəlməsi təsadüfi deyil: “Bilirsiniz ki, həmin gündə Azərbaycan özünün Zəfər gününü böyük çoşqu ilə qeyd edirdi. Məsələn, Şuşadakı atəşfəşanlığı çox yaxında olan Xankəndidən aydın görə bilirdilər. Rusiya bu addımı ilə sanki Qarabağdakı separatçılara öz dəstəyini ifadə edib. Onların ruhdan düşməsinə imkan verməyəcəyini göstərmək istəyib. Muradov noyabrın 10-da rus sülhməramlı qüvvələrinin separatçılarla birgə Xankəndidə hazırladığı təntənəli tədbirdə iştirak edib və özü ilə gətirdiyi 200-dək medalla hərbçiləri təltif edib. Bunun adı, sadəcə rus hərbçilərini mükafatlandırmaq deyil, həm də Şuşadakı atəşfəşanlığı Xankəndidən içi yana-yana izləyən əzilmiş separatçı ermənilərə ürək-dirək verməkdir.
Rüstəm Muradovun fəaliyyəti bizim gözümüzün önündə olub. O, gəldiyi gündən erməni təəssübkeşliyini gizlətməyib, erməni hərbi canilərilə öpüşüb-qucaqlaşıb. Onun yenə də Qarabağa Azərbaycan yox, Ermənistan üzərindən gəlməsi tam qanun pozuntusudur. Ümumiyyətlə, rus hərbçiləri və digər rəsmi şəxslərinin Qarabağa gəliş-gedişinin Ermənistan vasitəsilə baş tutmasının arxasında hansı mesajların durduğunu anlamaq çətin deyil. Bununla Muradov təmsil etdiyi ölkənin imperiya maraqlarını gizlətmədiyini ortaya qoymuş olur. Noyabrın 8-də isə Ermənistanın müdafiə naziri Arşak Karapetyan Qarabağa səfər edib. Ermənistan rəsmi dairələri bu məlumatı təsdiqləyib. Sonuncu dəfə 10 ay əvvəl Ermənistanın sabiq xarici işlər naziri Ara Ayvazyan Qarabağa gəlmişdi və Azərbaycan tərəfi buna qəti etirazını bildirdi. Ondan sonra, demək olar ki, Paşinyan hökuməti hansısa yüksək rütbəli nümayəndəsini sözügedən ərazilərə göndərməyə cəsarət etmirdi. Görünən budur ki, Laçın dəhlizinə nəzarət edən Moskvanın razılığı və bəlkə də istəyilə belə qanunsuz səfərlər intensiv hal almağa başlayıb. Bütün bunlar bizə əsas verir ki, Laçın dəhlizi ilə bağlı nəzarətin gücləndirilməsini və xüsusilə də bizim əlaqədar qurumların həmin yerdə fəaliyyətinin təşkilini tələb edək və həyata keçirək”.
Məhəmmədəli QƏRİBLİ
