Prezident, Silahlı Qüvvələrin Ali Baş Komandanı İlham Əliyev Şuşada hərbçilər qarşısında çıxışı zamanı ərazilərin işğaıdan azad olunmasını üç əsas amillə əlaqələndirdi.
Ölkə başçısı bunları bir-bir sadalayaraq, ərazilərimizin işğaldan azad olunmasında oynadığı rolu qeyd edib: “Biz iqtisadiyyatı gücləndirməli idik və yaxşı başa düşürdük ki, buna nail olmasaq, biz düşməni torpaqlarımızdan qova bilməyəcəyik. İlk növbədə iqtisadi müstəqillik təmin edilməli idi. Çünki əgər biz asılı vəziyyətdə olsaydıq, hansısa başqa böyük dövlətlərdən asılı olsaydıq, heç vaxt bizə imkan verməzdilər ki, biz bu şərəfli missiyanı yerinə yetirək. Ona görə Prezident kimi ilk günlərdən iqtisadi müstəqilliyə hesablanmış bütün lazımi addımlar atıldı və qısa müddət ərzində biz buna nail olduq.
Biz Qarabağ həqiqətlərini, işğalla bağlı erməni vəhşiliyini dünya ictimaiyyətinə çatdıra bildik. Birinci Qarabağ müharibəsindən sonrakı ilk dövrdə biz buna nail ola bilməmişdik. Ona görə dünyada müharibə ilə bağlı, Ermənistan-Azərbaycan Dağlıq Qarabağ münaqişəsi ilə bağlı təhrif edilmiş təsəvvür var idi. Biz bunu aradan qaldırdıq. Gecə-gündüz çalışaraq dünya ictimaiyyətini məlumatlandırdıq, aparıcı beynəlxalq təşkilatlarda uğurlu iş apararaq bizə əl verən və həqiqəti əks etdirən qərar və qətnamələri qəbul etdirdik və bütün bu işlər bugünkü reallıq üçün hüquqi bazadır. Digər önəmli amil gənc nəslin tərbiyəsi ilə bağlı idi. Əgər bizim silahımız da, sursatımız da olsa, iqtisadiyyatımız da güclü olsa, beynəlxalq müstəvidə də uğur qazansaq, əgər bizim vətəndaşlar torpaq uğrunda, Vətən uğrunda öz gücünü göstərməsələr, qalan amillərin heç bir əhəmiyyəti olmayacaq. Bütün bu faktorların vəhdəti bizim Qələbəmizi şərtləndirdi”.
O baxımdan, sadalanan faktorların vəhdəti sayəsində əldə olunan qələbənin əhəmiyyətini ekspertlər necə dəyərləndirir?
“Güclü ordunun məhz vətənpərvər əsgərləri qələbəmizi tezləşdirdi”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, sadalanan 3 vacib amilin uğurlu vəhdəti ərazilərimizin işğaldan azad olunmasında həlledici rol oynadı: “Ulu Öndərimiz qeyd edirdi ki, iqtisadiyyatı güclü olan dövlət hər şeyə qadirdir. Bu baxımdan iqtisadiyyatın gücləndirilməsi bizim üçün strateji bir fakt kimi qarşıya qoyulmuş hədəflərdən idi. Ona görə də iqtisadiyyat güclü olanda digər sahələrdə uğur qazanmaq üçün baza yaranır. Hesab edirəm ki, iqtisadi inkişafın genişlənməsi olduqca vacib şərtlərdən biridir. Başqa bir vacib şərt Qarabağ həqiqətlərinin dünyaya çatdırılması idi. Fikrimcə, bu, önəmli stratji hədəflərdən biri idi. Çünki 90-cı illərdə bununla bağlı bir sıra problemlər var idi. Həmin dövrlərdə bununla bağlı bir sistemsizlik mövcud idi. Nəticədə ərazilərimiz işğal olundu və dünya ictimaiyyəti erməni işğalının fərqinə varmadı. Halbuki, o vaxt dünya bunu bilsəydi, Ermənistanın işğalı bu qədər genişlənə bilməzdi. Prezidentin fədakarlığı, gecə-gündüz fəaliyyəti sayəsində sistemsizlik aradan qaldırıldı. Dünyanın bir sıra aparıcı qurumları Qarabağla bağlı qətnamələr qəbul etdi. Bu da hüquqi müstəvidə imkanlarımızı artırdı. Ən nəhayət, gənclərin vətənpərvər ruhda böyüdülməsi ilə bağlı ciddi işlər görüldü. Çünki bu, doğrudan da çox önəmli məsələdir. Gənclərin milli vənənpərvərlik ruhunda böyüməsi bütövlükdə onların torpağa, millətə bağlılığının nümunəsini ortaya qoyur. Ona görə də bu üç faktor Azərbaycanın qələbəsini qaçılmaz reallığa çevirdi. Bu baxımdan hesab edirəm ki, sistemli siyasət sayəsində Azərbaycan ciddi uğurlara imza atmağı bacardı. Azərbaycanda güclü ordu yarandı. Güclü ordunun məhz vətənpərvər əsgərləri qələbəmizi tezləşdirdi”.
V. Rəhimzadə onu da qeyd etdi ki, bundan sonra artıq heç bir qüvvə Azərbaycana mane ola bilməz.
Vidadi ORDAHALLI
