Azərbaycan Zəfər gününün ildönümünü qeyd edən andan başlayaraq, ermənilər həm Qarabağda, həm də dövlət sərhədində təxribatlara əl atmağa başladı.
8 Noyabr – Zəfər Günündə Şuşa ətrafında baş verdiyi iddia edilən insidentlə bağlı müxtəlif ehtimallar səslənir. Ermənistan MN 8 noyabr saat 15:00 radələrində Azərbaycan xüsusi təyinatlısının (yalnız bir əsgər olduğu iddia edilir) Şuşa-Laçın yolu istiqamətinə yaxınlaşdığı, “yerli əhalini qorxutmaq üçün” atəş açdığı, bu atəş nəticəsində ərazidə su borusunu təmir edən şəxslərdən birinin alnından aldığı güllə yarasından yerindəcə öldüyünü, digər 3 nəfərin isə yaralandığını bildirir.
Ermənistanın rəsmi mənbələrinə görə, su borusunu “təmir edən” şəxslərin hamısı 22-30 yaş civarında olub.
Görünən budur ki, Ermənistan ordusu Zəfər Günü ilə bağlı təxribat həyata keçirmək istəyib və buna görə də Şuşa yaxınlığına diversiya qrupu göndərib. Diversantlar maskalanmaq üçün “çilingər” obrazına giriblər və guya su borusunu təmir etmək görüntüsü yaradıblar. Azərbaycan kəşfiyyatı isə düşmənin təxribatı haqda əvvəlcədən məlumat əldə edib və xüsusi təyinatlılar diversiya qrupunu “qarşılayıblar”.
Ermənistan silahlı qüvvələri Laçın rayonu ərazisində Qaragöl istiqamətində təxribata əl atıblar. Müdafiə Nazirliyinin yaydığı məlumata görə, noyabrın 9-u günorta saatlarında Ermənistan silahlı qüvvələrinin 60-a yaxın şəxsi heyəti iki hərbi yük avtomobilində Laçın rayonunun Qaragöl gölü istiqamətində hərəkət edərək, Azərbaycan Ordusunun mövqelərinə aparan yol üzərində yerləşiblər. Qəsdən hərbi qarşıdurma yaratmaq məqsədilə erməni tərəfi metal konstruksiyalardan hazırlanmış səbətlərdən istifadə etməklə Azərbaycan Ordusunun sərhədin bu sahəsindəki mövqelərarası yolunu bağlayaraq ərazidə möhkəmlənməyə çalışıb. Azərbaycan Ordusunun bu istiqamətdə yerləşən bölmələri qısa müddət ərzində əlavə şəxsi heyət və döyüş texnikasını əraziyə cəmləşdirməklə təxirəsalınmaz tədbirlər həyata keçirib. Görülmüş tədbirlər nəticəsində 60-a yaxın erməni hərbçisi mühasirəyə alınıb, onların bütün hərəkətləri məhdudlaşdırılıb və səhər saatlarında Rusiya tərəfinin xahişini nəzərə alaraq, Azərbaycan hərbçiləri onların geri dönməsinə şərait yaradıb.
Azərbaycanın Zəfər gününü qeyd etdiyi vaxtda ermənilər bu təxribatları hansı məqsədlə ediblər?
Politoloq Əhəd Məmmədli “Bakı-Xəbər”ə açıqlamasında bildirdi ki, hər detalı öz adı ilə çağırmaq lazımdır: “Erməni kimdir ki, təxribat da törətsin? Onlarda həmin güc də qalmayıb. Bütün bunlar Rusiyanın dəstəyi ilə baş tutur. Rusiya həmin ərazini Abxaziya və Osetiyanın, Dnestryanının gününə salmaq istəyir. Biz bunun açıq siqnalını görürük. Prosesin qarşısını almasaq, həmin separatçı ərazilərin taleyini Qarabağ da yaşaya bilər.
Baxın, 7 noyabrda Ermənistan müdafiə naziri Aqarşak Karapetyanın Laçın dəhlizindən istifadə edərək Azərbaycan ərazisinə qanunsuz gəlməsi, burdakı “döyüş mövqelərinə” baxış keçirməsi, rus sülhməramlılarının məsuliyyət zonasındakı qanunsuz erməni hərbi birliklərinin “hərbi hissəsində” olması və əsgərlərə medal paylaması nə deməkdir? Ermənistan müdafiə naziri uzun müddət heç bir Ermənistan rəsmisinin gəlməyə cəsarət etmədiyi Azərbaycanın rus sülhməramlılarının nəzarəti altında olan ərazilərinə hansı səbəbdən məhz Zəfər Günü ərəfəsində gəlir? Bütün bu addımlar rus sülhməramlılarının icazəsi olmadan baş tuta bilərmi? Şuşa yaxınlığında su borusunun təmirinə ehtiyac yarandığı halda prosedura görə rus sülhməramlılarına məlumat verilməli və Azərbaycan Ordusunun razılığından sonra o əraziyə çilingərlər yalnız rus sülhməramlılarının müşayiəti ilə gəlməli idi. Ancaq rus sülhməramlılarına heç bir müraciət daxil olmayıb, əraziyə yaxınlaşan erməniləri də rus sülhməramlıları müşayiət etməyib.
Bütün bunlar isə bir daha təsdiqləyir ki, Şuşa yaxınlığında heç bir boru təmiri məsələsi olmayıb, gələnlər erməni diversiya qrupu olub. Azərbaycan Rusiya qarşısında məsələni açıq qoymalıdır ki, bundan sonra bizim icazəmiz olmadan Laçın dəhlizindən bir quş belə uçsa, biz üçtərəfli müqavilədən çıxacağıq. Rusiya bunu gözü önünə alırsa, buyursun. Əks təqdirdə biz rusların nəzarəti altında olan ərazilərimizi itirmək təhlükəsi ilə üzləşəcəyik”.
Məhəmmədəli QƏRİBLİ
