Məlum olduğu kimi, ötən ay Ermənistanın paytaxtı İrəvanın mərkəzində anti-Rusiya fəaliyyəti və çağırışları ilə məşhur olan “Sasna tsrer” partiyasının yürüşü keçirilib. Yürüş zamanı Rusiyanın yüksək vəzifəli şəxsləri birbaşa təhqir olunub. Bundan əvvəl isə yenə ötən ay Rusiya prezidenti Vladimir Putinin portreti ermənilər tərəfindən təhqir olunub. Belə ki, Ermənistan ərazisində yerləşdirilən və üzərində Rusiya-Ermənistan dostluğunu simvolizə edən, hər iki ölkənin bayraqlarının və Putinin rəsmi olan bilborda yerli əhali tərəfindən rus dilində söyüş yazılıb. Bu da azmış kimi, ermənidilli sosial şəbəkə istifadəçiləri vandalizm aktını yüksək dəyərləndirərək bu hərəkəti edənlərə təriflər yağdırıblar.
Bütün bunlardan sonra noyabrın 9-da İrəvanda Rusiya ilə münasibətlərin pozulması tələbi ilə çoxminlik mitinq keçirilib. Mitinqin təşkilatçısı Ermənistanın Milli Demokrat Partiyası olub. Ermənistan Milli Demokrat Partiyası Şurasının üzvü Vahe Qasparyan Rusiyanın İrəvandakı səfirliyi qarşısında mikrofonla aşağıdakıları bildirib: “Ermənistan hər zaman Rusiya üçün “xırda pul” olub. Bu gün anlayırıq ki, Rusiya-Ermənistan dostluğu haqqında əfsanə birdəfəlik gözdən düşüb. Bundan sonra bu bizim üçün aksiomadır. Biz, erməni xalqı sizə Mixail Yuryeviç Lermontovun “Əlvida, kirli-paslı, çirkli Rusiya!” sözləri ilə cavab veririk”. Çoxminli mitinq iştirakçıları isə onu alqışlayıb. Ermənistanda bu yanaşma və mitinqin keçirilməsinə verilən icazə Rusiyada qəzəblə qarşılanıb. Rusiyalı teleaparıcı, ermənipərəst mövqeyi ilə seçilən Vladimir Solovyov bu fonda Ermənistan əleyhinə kəskin fikirlər söyləyib. Əvvəlcə erməni xalqını çox sevdiyini deyən Solovyov İrəvanda keçirilən mitinq zamanı Rusiyaya qarşı rus dilində sərt fikirlər səsləndirən Vahe Qasparyan adlı şəxsin sözlərinə hiddətlənib: “Paşinyan və Ermənistan rəhbərliyinə sualım var: Rusiyada bunu necə başa düşək? İkinci Qarabağ müharibəsi zamanı erməniləri əlində silah olan Qasparyan yox, Rusiya sülhməramlıları xilas etdi. Siz acı məğlubiyyətə uğradınız və qalib gəlmək şansınız yox idi. “Artsax”ı biz ayaqda saxladıq! Vahe Qasparyan niyə azadlıqdadır? Niyə Ermənistan rəhbərliyi, erməni cəmiyyəti, erməni ziyalıları buna reaksiya vermir? Niyə Rusiya vətəndaşları və Ermənistanı xilas edən rus sülhməramlılar bunu eşitməlidir? Və SOROS tör-töküntüsü, ABŞ-ın pulu ilə mövcud olan birisi bunları deyir. ABŞ-ın dünyada ikinci ən böyük səfirliyi Ermənistandadır”. Solovyov “onlar azlıqdadır”, “onları dəstəkləyən azdır” və digər bu kimi bəhanələri qətiyyətlə indidən rədd etdiyini də bildirib. O qeyd edib ki, necə ola bilər, Qasparyanın cavabı verilmir, əksinə, alqışlanır? Rusiyalı politoloq, Siyasi Araşdırmalar Mərkəzinin direktoru Sergey Markov da qeyd edir ki, İrəvanda Rusiya əleyhinə çıxışlar Moskvada böyük hiddət doğurur: “Rusiyanın düşmənçilik münasibətində ittiham edildiyi bu cür çıxışlar yalandır. Rus əsgəri yüz minlərlə erməninin xilaskarıdır. Bu səbəbdən, İrəvanda Rusiyaya edilən hücumlar böhtandır”. Onun fikrincə, bu, Ermənistanın nankorluğundan xəbər verir: “Azərbaycan, Rusiya və Ermənistan liderlərinin üçtərəfli bəyanatı rəsmi İrəvan üçün çox ağrılıdır. Bu bəyanat Ermənistanın 44 günlük müharibədə məğlubiyyətini rəsmiləşdirir. Kapitulyasiya ağır, lakin ən yaxşı çıxış yoludur. O, minlərlə insanın məhv olmasından daha yaxşıdır. Çünki onsuz da Azərbaycan bu əraziləri azad etdi”. Onun sözlərinə görə, ermənilərin ambisiyalarının silahlı qüvvələrindən çox olması məğlubiyyətə gətirib çıxardı: “Bəyanatın imzalanmasında Rusiyanın vasitəçiliyi isə minlərlə əsgərin həyatını xilas etmiş oldu. Lakin ermənilər nankorluq edib bunu başa düşmür”.
Rusiyalı politoloq İqor Korotçenko isə qeyd edir ki, Ermənistana münasibətdə Rusiyanın heç bir illüziyası olmamalıdır: “Ermənistan sadəcə tərəfdaşlardan biridir. Formal şəkildə müttəfiq, reallıqda isə situativ tərəfdaşdır. Buna görə də Rusiya Ermənistanla münasibətləri müstəsna halda öz maraqlarına istinadən qurmalıdır. Ermənistanın maraqları Rusiya üçün hətta ikinci də yox, üçüncü dərəcəli olmalıdır. Biz Ermənistanda baş verənləri bu ölkədəki siyasi elitanın Rusiyaya münasibətləri prizmasından nəzərdən keçiririk. Qardaş xristian xalqı barədə bütün ifadələri qoy daxili siyasətdə istifadə üçün saxlasınlar. Rusiyanın Ermənistanla bütün əlaqələri, o cümlədən də iqtisadi sahədə, praqmatizmə söykənməlidir – qaza görə bazar qiymətləri, verilən kreditlərə görə bazar şərtləri. Ermənistana kreditlər müstəsna halda onun qızıl-valyuta ehtiyatlarının girov qoyulması şərtilə verilməlidir. Əgər kreditləri qaytara və ya bağlaya bilmirsə, həmin kreditləri qızıl-valyuta ehtiyatları vasitəsilə ödəməlidir. Moskvanın sərt mövqeyi olmalıdır, rusofobları yedirtdiyimiz yetər. Ermənistanda isə rusofobiyanın növbəti yüksəlişi baş verir. Sözdən başqa heç nə verməyən Ermənistan Rusiyanın resurslarını sormaq istəyir. Ermənistan özü heç nə etməyə qadir deyil. Hərbi əməliyyatlar səhnəsinin və yeni növ silahların, hərbi texnikanın yaranması nəticəsində Ermənistan Rusiya üçün əvvəlki strateji əhəmiyyətini itirib”. Beləliklə, ermənilər ilk imkan düşən kimi Rusiyaya arxa çevirib, onların mövcudluğunu təmin edən bir ölkəni düşmən gözündə görür. Ekspertlərə görə, bütün hallarda, Ermənistanda Rusiyaya qarşı aparılan təbliğat onlara edilən yaxşılıqlara görə heç vaxt minnətdar olmağı bacarmayan bir toplumun xarakterik xüsusiyyətlərinin göstərəcisi kimi dəyərləndirilməlidir.
Samirə SƏFƏROVA
