Böyük Britaniyanın İcmalar Palatası qondarma “erməni soyqırımı” qanun layihəsini ilk oxunuşda qəbul edib. Bu barədə Böyük Britaniya Erməni Milli Komitəsi açıqlama yayıb.
Açıqlamada qeyd edilib ki, ikinci oxunuş 18 mart 2022-ci ildə olacaq. Qanun layihəsini mühafizəkar deputat Tim Lotton təqdim edib. Qanun layihəsində 3 əsas müddəa var: birincisi, 1915-1923-cü illərdə Osmanlı İmperiyasında və ona bitişik ərazilərdə ermənilərə qarşı törədilmiş kütləvi “qırğınların” rəsmən soyqırım kimi tanınması. İkincisi, soyqırım qurbanlarının, o cümlədən erməni xalqının xatirəsinin hər il yad edilməsi. Üçüncüsü isə, “erməni soyqırımı” ilə əlaqəli şəxslərlə bağlı ictimaiyyəti məlumatlandırmaq.
Məlumat üçün qeyd edək ki, layihə bundan sonra onun Lordlar Palatası tərəfindən qəbul edilməlidir.
İngilislərin belə bir addımı gözlənilməz oldu. Ən azından ona görə ki, Böyük Britaniya Türkiyə ilə yaxşı münasibətlərə malikdir. Bir sıra məsələlərdə İngiltərə Türkiyənin maraqlarını müdafiə edir. Üstəlik Böyük Britaniyada, digər ölkələrə baxanda, güclü erməni lobbisi yoxdur. O baxımdan, Böyük Britaniyanın İcmalar Palatasının qondarma “erməni soyqırımı” ilə bağlı bu addımı nə deməkdir?
“Görünür, Britaniya Türkiyədən nəyisə almaq istədiyindən, qondarma “erməni soyqırımı”ndan təzyiq vasitəsi kimi istifadə edir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, görünür, Böyük Britaniya Türkiyədən hansısa güzəşti qoparmaqdan ötrü qondarma “erməni soyqırımı”nı təzyiq aləti kimi istifadə edir: “Yoxsa İngiltərə niyə belə bir addım atsın ki? Böyük Britaniyanın son illər Türkiyə ilə münasibətləri inkişaf edirdi. O cümlədən, bu ölkənin Azərbaycanla münasibətləri yaxşıdır. Təsadüfi deyil ki, Azərbaycanda əsas neft hasilatçısı BP şirkətidir. Bununla yanaşı, ötən il BMT-də müharibə ilə əlaqədar Azərbaycana qarşı təxribat hazırlananda Böyük Britaniya ölkəmizi dəstəklədi. Bunlar hamısı müsbət haldır. Ancaq böyük siyasi xadim Uinston Çörçillin məşhur biq sözü var. O deyir ki, İngiltərənin daimi dostları yox, daimi maraqları var. Görünür, Böyük Britaniya Türkiyədən nəyisə almaq istədiyindən, qondarma “erməni soyqırımı”ndan təzyiq vasitəsi kimi istifadə edir. Bu siyasət əksər aparıcı Avropa ölkələrinə xasdır. Türkiyə nəyisə vermək istəməyəndə belə siyasətə əl atırlar. O baxımdan, baxaq görək Britaniya Türkiyədən nə istəyir. Ancaq bu, İngiltərənin ziyanına olacaq. Ona görə ki, Türkiyə böyük dövlətdir. Belə bir dövlətlə təzyiq dili ilə danışmaq zərərlidir”.
Professor onu da qeyd etdi ki, Avropa dövlətləri qondarma “soyqırımdan” təzyiq vasitəsi kimi istifadə etməyə son qoymalıdır.
Vidadi ORDAHALLI
