Qarabağın əhəmiyyətli hissəsinin və ətraf 7 rayonun işğaldan azad olunmasından bir il ötdü. Ötən bir ildə Qarabağın rus sülhməramlılarının nəzarətində qalan hissəsində ermənilərin miqrasiyası davam edir. O cümlədən, bəzi mülki ermənilər Azərbaycanla inteqrasiya olunmaq üçün müxtəlif cəhdlər edir, müəyyən təmaslar qurmağa çalışırlar.
Bütün bunlar da erməni separatçılarını narahat edir. Onlar bu prosesin qabağını almaq üçün iddia edirlər ki, guya Azərbaycan xüsusi xidmət orqanları sosial şəbəkələr vasitəsilə ermənilərə təsir göstərir, onları hədələyir və s. Əslində isə bu, uydurmadır. Məsələ tamam başqadır. Söhbət ondan gedir ki, son vaxtlar Azərbaycandakı sosial şəbəkələr, müəyyən internet televiziyaları Qarabağdakı ermənilərin fikirlərinə ciddi təsir göstərir. Bir növ oradakı ictimai rəyi dəyişir. Nəticədə ordakı ermənilər get-gedə anlamağa başlayırlar ki, bu cür qeyri-müəyyənliyin sonu yoxdur. Onlar Azərbaycan vətəndaşlığını qəbul etsələr daha yaxşı olar. Get-gedə oradakı ermənilər bu kimi məsələlərə daha həssas yanaşır və əhəmiyyətli reaksiyalar verirlər. Ona görə də bu tendensiyanın qarşısını almaq üçün separatçıların qondarma “xüsusi xidmət orqanı”, “prokurorluğu” belə bir yalan məlumat yayıb ki, guya Azərbaycan xüsusi xidmət orqanları Qarabağdakı erməniləri hədələyir. Əslində separatçıların məlum “qurumları” ordakı erməniləri şantaj edir. Onları, guya Azərbaycana işləməkdə ittiham etmək istəyir. Bəlli olur ki, separatçılar Azərbaycanın təbliğatından obyektiv nəticə çıxarmış erməniləri hədələməyə, şantaj etməyə başlayıblar.
“Qarabağdakı ermənilər bizim telekanalları izləyirlər və görürlər ki, necə sürətli bərpa-quruculuq işləri gedir”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmməlinin fikrincə, separatçılar məlum məsələlərlə bağlı ciddi xof içindədirlər: “Məsələ ondadır ki, separatçıların imkanları hər keçən gün daha da daralır. Orada iqtisadi vəziyyət daha da çətinləşir. Əgər 30 illik işğal dövründə bir belə böyük ərazilər ermənilərin nəzarəti altında idisə və onlar əhalinin sayını artıra bilmədilərsə, bundan sonra ümumiyyətlə onların hansısa şansı yoxdur. Ermənistan büdcəsindən dotasiya almaqla nəyəsə nail olmaq mümkün deyil. Ən azından, bunun perspektivi yoxdur. Müharibədən sonra Prezident İlham Əliyev dəfələrlə çıxışlarında bəyan etdi ki, Qarabağdakı etnik ermənilər Azərbaycan vətəndaşıdır. Azərbaycan onların reinteqrasiyası ilə bağlı tədbirlər görür. Təsadüfi deyil ki, oradakı bəzi ermənilər işlə bağlı Azərbaycan tərəfinə müraciət edir. Qarabağda Rusiya sülhməramlıları yerləşsə də, oradan ermənilərin köçünü əngəlləyə bilməyiblər. Qarabağdakı ermənilərin bir qismi Azərbaycan dilini yaxşı bilir. Onlar bizim telekanalları izləyirlər. Görürlər ki, necə sürətli bərpa-quruculuq işləri gedir. Ona görə də get-gedə onların Azərbaycana marağı artır. Bütün bunları separatçılar yaxşı bildikləri üçün həqiqətə uyğun olmayan informasiyalar yayırlar. Məqsəd reinteqrasiyanın qarşısını almaqdır. Bu cür təxribatlar ciddi nəticə verməyəcək”.
Bütün bunlara rəğmən, hərbi ekspert hesab edir ki, onlar prosesin qarşısını ala bilməyəcəklər.
Vidadi ORDAHALLI
