44 günlük Vətən müharibəsində Azərbaycanın parlaq qələbəsinin birinci ildönümündə - Zəfər Günündə dünyanın çox az sayda ölkəsinin rəhbərlərindən təbriklər aldıq. Nəzərə çarpan vacib məqam budur ki, bu təbriklərin sayı bizə digər əlamətdar bayramlarda ünvanlananlardan qat-qat azdır.
Məsələn, qonşumuz və separatizmdən əziyyət çəkən Gürcüstandan, strateji müttəfiqimiz sayılan və hazırda faktiki olaraq separatçı təzahürlər səbəbindən müharibə şəraitində olan Ukraynadan və yaxın münasibətlərimiz olduğu digər MDB ölkələrindən Zəfər Günü ilə bağlı təbrik almadıq. Faktiki olaraq, həmin ölkələrlə diplomatik münasibətlərimiz normal vəziyyətdədirsə, bizə bu əlamətdar günlə bağlı ünvanlanan təbriklərin azlığını nə ilə izah edə bilərik?
Politoloq Yeganə Hacıyeva “Bakı-Xəbər”ə açıqlamasında bildirdi ki, əldə etdiyimiz Zəfərin birinci ildönümündə Azərbaycanı həqiqətən də məhdud sayda ölkə başçısı təbrik etdi: “Türkiyə, Belarus, Qazaxıstan və bir neçə başqa ölkə rəhbərlərinin təbrikini gördük. Bunu 28 May və başqa ənənəvi bayramlarda bizə ünvanlanan təbrik sayı ilə müqayisədə çox az saymaq olar. Lakin bunun da səbəbləri var. Birincisi, bu, əlamətdar günü ilk olaraq qeyd etməyimizlə bağlıdır. Yəni digər milli bayramlarımız kimi o qədər də məşhurlaşmayıb. Rəsmi görüşlərdə protokollara hələ geniş şəkildə salınmayıb. İkinci səbəb bizim 44 günlük müharibədə əldə etdiyimiz nailiyyətlər, yaratdığımız yeni reallıqlardan məmnun olmayanların mövcudluğu ilə bağlıdır. Məsələn, İran kimi qonşu və müsəlman ölkəsi belə bir təbriki etmədi. Əslində bunu etməliydilər. Çünki iki ölkə arasında gərginləşən və hazırda normal məcraya salınmasına çalışılan münasibətlərin fonunda belə bir təbrikin olması yaxşı jest sayıla bilərdi. Ancaq tam tərsini gördük. Bəzi MDB ölkələri isə Ermənistanla münasibətlərə xələl gəlməməsi üçün belə addım atıblar. Bəzi ölkələr isə Ermənistanla açıq şəkildə xristian həmrəyliyi nümayiş etdirib. Bizimlə ortaq problemləri olan, yəni uzun müddət separatizmdən əziyyət çəkən Gürcüstan və Ukrayna da bizi zəfər münasibətilə təbrik etmədi. Ən azından, Ukrayna təbrik ünvanlamalıydı. Çünki hazırda həmin separatçı meyllərə görə müharibə ərəfəsindədir. Bu işdə xüsusi yük Azərbaycanın Xarici İşlər Nazirliyi və müxtəlif ölkələrdəki səfirliklərimizin üzərinə düşür. Görsənən budur ki, bəzi səfirliklərimiz mövcud olduğu ölkələrdə bu istiqamətdə lazımi səviyyədə təbliğat apara bilməyiblər. Belə təəssürat yaranır ki, yalnız Prezident çıxış edib hansısa göstərişləri verəndən sonra bir hərəkətlilik yaranır. Etiraf etmək lazımdır ki, bizim bəzi strukturlarımız haqlı olduğumuz məsələdə belə təşəbbüskarlıq ortaya qoymur. Əlamətdar günümüzlə bağlı müxtəlif ölkə rəhbərlərindən nisbətən az sayda təbrik almağımızın səbəbləri sadalanan məsələlərlə bağlıdır”.
Məhəmmədəli QƏRİBLİ
