Azərbaycan hərb arsenalını gələn il ərzində də ən müasir silahlarla tğchiz etməyi planlaşdırır. Bunun üçün gələn ilin dövlət büdcəsindən əhəmiyyətli miqdarda vəsait ayrılacaq. Bununla bağlı maliyyə naziri Samir Şərifov noyabrın 10-da Milli Məclisin İqtisadi siyasət, sənaye və sahibkarlıq komitəsinin iclasında gələn ilin dövlət büdcəsi zərfinə daxil olan sənədlərin müzakirəsi zamanı maraqlı açıqlamalar verib.
Nazir açıqlaması zamanı yeni hərbi texnika alışı üçün ayrılan pulların miqdarını da açıqlayıb: "Azərbaycan prezidenti, Müzəffər Ali Baş Komandan İlham Əliyevin tapşırığına uyğun olaraq, düşmənin kapituliyasiyasından dərhal sonra Vətən müharibəsi zamanı istifadə və çıxdaş olunmuş silah və sursatların, hərbi texnikaların yenilənməsi, o cümlədən bir sıra hərbi texnika və avadanlıqların ehtiyatlarının yaradılması və bərpası üçün gələn ilin dövlət büdcəsindən əlavə olaraq 500 milyon manat vəsait ayrılıb. Bununla da xüsusi müdafiə təyinatlı xərclər 2 milyard 100 milyon manata çatdırılıb”. Azərbaycanən yeni hərbi texnika alışına böyük pullar sərf etməsi, həmişəki kimi, Ermənistanda ciddi təşvişə səbəb olmaqdadır. Erməni siyasi şərhçi Razmik Akopcanyan bildirir ki, Bakı faktiki olaraq güc mövqeyini əldən vermək istəmir və buna görə, müharibədə qalib gəlməsinə baxmayaraq, ordusunu gücləndirməkdə davam edir. Bunun isə konkret məqsədləri var: “Məsələn, Zəngəzur dəhlizini Azərbaycan, lazım gələrsə, güc yolu ilə açmağa hazır olduğunu bildirir. Düzdür, Zəngəzur dəhlizi sualı artıq müzarikirə masasından çıxarılıb, çünki bu məsələ ilə bağlı hər bir şeydə razılığa gəlinib. Bir şey ki, söz-söhbət deyil, artıq praktiki-real işlərə start verilib. Zəngəzur dəhlizi 2022-ci ildə artıq tam olaraq eksplutasiyaya da verilə bilər. Siz bir Bakının Qarabağda etdiklərinə baxın: bir neçə aya hava limanı...Hazırda əsas danışıqlar sərhədlərin delimitasiya və demarkasiyası məsələsi ilə bağlı gedir. “Danışıqlar gedir” deyəndə, Ermənistanın bu danışıqlarda, demək olar ki, heç bir rolu olmur. Bakı, Ankara və Moskva danışıqlar aparır, İrəvana isə nəticələrlə barışmaq qalır. Bu arada Azərbaycan İsraildən yeni partiya silah sifariş edib. “I-Derby ER” raketləri (MiQ-21, MiQ-29, F-16C/D, F-5, Miraj, JAS-39 Gripen qırıcıları üçün) yaxın zamanlarda Azərbaycan Silahlı Qüvvələrinin arsenalında olacaq. Yəni Bakı İrəvana barmaq silkələyir ki, özünü düz apar”.
Xatırladaq ki, Azərbaycan MiQ-29 qırıcıları üçün İsrailin “hava-hava” raketlərini alıb.Söhbət məhz “I-Derby ER” aviasiya raketindən gedir. Məlumatlara əsasən, raket artıq ordumuzun arsenalına daxil edilib. “I-Derby ER” “Derby” raketlərinin təkmilləşdirilmiş və tam modernləşdirilmiş versiyasıdır. “I-Derby ER” orta mənzillidir, 100 km-likdəki hədəfi dəqiqliklə məvh etmək gücündədir. İsrailin “İsrael Hayom” qəzeti də bir müddət əvvl belə məlumat yaymışdı ki, Azərbaycan İsraildən daha 2 milyard dollarlıq silah alacaq. Nəşr bu yöndə danışıqlar getdiyini qeyd edib, Azərbaycan Müdafiə Nazirliyinin təyyarələrinin İsrail aeroportlarına tez-tez endiyini, onların müxtəlif tipli döyüş sursatları, o cümlədən ballistik raketlər daşıdığını yazıb. O da bildirilir ki, Azərbaycanda İsrailin hərbi sənaye şirkətləri öz mərkəzlərini açıblar. Bundan başqa İsrail şirkətləri təhlükəsizlikdən tutmuş, kənd təsərrüfatına qədər bütün sferalarda təmsil olunublar, azad edilmiş ərazilərdə tikinti işlərində iştirak edirlər. İndi belə hesab edilir ki, gələn il ərzində Azərbaycanın İsraildən daha çox silah alması gözlənilir.
Azərbaycan, bundan başqa Türkiyə, Pakistan, Rusiyadan da silah idxalını artırmağı düşünür. Məlumata əsasən, Türkiyə Azərbaycana kəşfiyyat və zərbə təyinatlı pilotsuz uçuş aparatlarından “Anka”nı və ya peyk idarəetməli “Anka-S” variantını ixrac etməyə hazırdır. “Anka” 24 saat havada uça bilir. Bu pilotsuz uçuş aparatı gecə və gündüz, istənilən hava şərtlərində nəzarət, sabit və ya hərəkətli hədəfi aşkarlama, müəyyənetmə, təqib məqsədli, real zamanlı görüntü kəşfiyyatı vəzifələrini yerinə yetirir. Digər pilotsuz uçuş aparatlarından fərqli olaraq, “Anka-S” PUA-larının fəaliyyətinə "Türksat" peyklərinin əhatə dairəsinə daxil olan istənilən nöqtədən, hava şəraitindən asılı olmayaraq, asanlıqla nəzarət edilə bilər. Yeni partiya “Bayraktar TB2” PUA-larını idxalının da davam etməsi gözlənilir. Bundan başqa, Pakistanın “Block 3” modifikasiyalı JF-17 qırıcılarının yaxın tezlikdə ordumuzun arsenalında peyda olacağı gözlənilir. Arsenalında “hava-hava” və “hava-yer” raketləri olan JF-17 qırıcısı 100 kilometr uzaqlıqda yerləşən hədəfləri vura bilir. Müasir qırıcılar orta və kiçik hündürlüklərdə kompüterləşmiş uçuşu idarə etmək və yüksək manevr bacarığına malikdir. Yaxın məsafəli döyüşlər üçün heç də pis xüsusiyyətlərə malik olmayan JF-17 kifayət qədər yüksək sürətlə hərəkət edə bilir. Lakin Azərbaycanı təkcə “JF-17 Thunder” qırıcıları maraqlandırmır. Azərbaycan Pakistandan digər hərbi texnologiya, silahlar və müdafiə təyinatlı digər məhsullar idxal etməkdə maraqlıdır. Rusiyanın yeni hərbi texnologiyaları da Azəraycanın diqqət mərkəzində yer alır.
Tahir TAĞIYEV
