Ermənistanda ictimai-siyasi müstəvidə yenidən vəziyyət gərginləşir. Buna səbəb revanşist qüvvələr tərəfindən atılan addımlar, təşkil edilən aksiyalardır. Noyabrın 8-də Ermənistan paytaxtının Azadlıq meydanında keçmiş ölkə prezidenti Robert Köçəryanın rəhbəri olduğu müxalif "Hayastan" blokunun mitinqində isə artıq ümummilli müqavimət prosesi formalaşdığı elan olunub.
"Hayastan" fraksiyasının üzvü İşxan Saqatelyan bu xüsusda qeyd edib: "Ermənistanın türkləşməsinə və yeni kapitulyasiyaya yol verməyəcək milli müqavimət hərəkatının əsası qoyulub. Müqavimət prosesi iki - xarici və daxili cəbhədə yeridiləcək. Xarici cəbhədə bütün dünyaya, xüsusilə düşmənlərimizə göstərməli və isbat etməliyik ki, Nikol Paşinyan erməni xalqının ümumiləşdirilmiş obrazı deyil və ona ölkəni yeni güzəştlərə aparmaq mandatı verilməyib. Bu hakimiyyət tərəfindən imzalanmış hər hansı antierməni sənəd bizim üçün qəbuledilməzdir. Daxili cəbhədə isə dövlətçiliyimiz və ölkəmiz üçün bütün dağıdıcı hallara müqavimət göstərəcəyik”. Müxalifət artıq "Ermənistanın xilası naminə vətəndaşların müqavimət hərəkatına" yazılması üçün İrəvanda bir neçə informasiya məntəqəsi açıb. Yaxın günlərdə rayonlarda da belə məntəqələrin açılması nəzərdə tutulur. Ermənistanın keçmiş prezidenti, “Hayastan” fraksiyasının başçısı Robert Köçəryan ölkə vətəndaşlarını indiki hakimiyyətin Azərbaycanla hər hansı sənəd imzalamasına yol verməməyə çağırıb. Onun fikrincə, belə bir sənədin imzalanmasında həm Ermənistana, həm də Qarabağa təhlükə var. Köçəryanın sözlərinə görə, sərhədlərin delimitasiyası və demarkasiyası, əslində Ermənistan tərəfindən Azərbaycanın ərazi bütövlüyünün tanınması deməkdir: "Bunun baş tutması Qarabağ məsələsinin tənzimlənməsinin sonu deməkdir. Bu o deməkdir ki, yeganə həll yolu qalır - Qarabağın Azərbaycanın tərkibində tanınması. Delimitasiya bundan başqa həll imkanı qoymur". Onun sözlərinə görə, delimitasiyadan sonra Azərbaycan istədiyi vaxt öz sərhədçilərini Ermənistanı Qarabağla birləşdirən yolda yerləşdirib, gömrük məntəqələrini qoyub, Gorus-Qafan yolunda olduğu kimi, bu yolda da hərəkətini tam nəzarəti altına götürə bilər: "Biz mübarizə edəcəyik və inanın, bu hakimiyyəti istər barrikadalarda, istər seçki yolu ilə - hansı yolla olursa olsun - qovacağıq". Köçəryan barrikadalarda - xalqın yanında, ön cərgədə olacağını bildirib. Maraqlıdır ki, aksiya iştirakçıları, Paşinyanla yanaşı, erməni xalqının bütün bəlalarına görə rusları günahlandırır və deyirlər ki, ermənilər və ruslar heç də dost xalq deyillər.
Etiraz hərəkatının liderlərindən biri rusların Cənubi Qafqaz ərazisinə daxil olduğu ilk günlərdən erməni kilsələrinin fəaliyyətinin qadağan olunduğunu deyib: “Erməni məktəbləri bağlanırdı. Rus çar qoşunları erməni üsyançılarını tərksilah edirdi. Ermənistanı təslim edib, Qars və Moskva müqavilələri bağlayıb. Erməni və rus xalqları arasında heç vaxt dostluq olmayıb. Ermənistan həmişə Rusiya üçün alver obyekti olub. Ona görə də Rusiya-Ermənistan dostluğu mifi birdəfəlik ifşa olunub. Biz erməni xalqı sizə Mixail Yuryeviç Lermontovun sözləri ilə cavab veririk: “Əlvida, yuyulmamış Rusiya”. Mitinq təşkilatçıları xalqı hakimiyyət dəyişikliyi uğrunda mübarizəyə" çağırıblar: "Məğlubiyyət partiyası əminamanlıq və inkişaf gətirə bilməz, məğlubiyyət simvolu olan hakimiyyət ölkə maraqlarının layiqli təmsilçisi ola bilməz. Öz şəxsi maraqları və vəzifə naminə minlərlə insanı ölümə göndərən insan dövlətimizə rəhbərlik edə bilməz". Belə vəziyyətdə Qarabağın işğaldan azad olunmuş ərazilərində - Hadrut və Şuşada yaşamış ermənilər Ermənistan hökumətindən onlara qaçqın statusu verilməsini tələb edir. “Aysor” nəşri bildirir ki, həmin ərazilərdən gedən ermənilər İrəvanın Respublika meydanından başlayan və Fransanın Ermənistandakı səfirliyinin binası qarşısında davam edən etiraz aksiyası keçiriblər. “Şuşadan məcburi köçkün düşmüş erməni əhalisi” ictimai təşkilatının üzvü Aşot Arutyunyan bildirib: “Bir il əvvəl üçtərəfli bəyanat imzalanıb ki, bu, xalq üçün qəbuledilməzdir, lakin biz bu sənədin bəndlərini rəhbər tutsaq, orda qaçqınların geri qayıtması barədə yazılıb. İndi doğma hökumətimiz bizi qaçqın kimi tanımırsa, bu qayıdış necə davam edəcək? Razılaşmada qeyd edilir ki, məcburi köçkünlər və qaçqınlar Qarabağ ərazisinə qayıtmalıdır. Amma bizə heç bir qaçqın statusu verilmir”. Aksiya iştirakçıları Azərbaycanla dinc yanaşı yaşama məsələsinə də toxunaraq, bunun mümkün olmadığını vurğulayıblar. Hadrutdan olan erməni İra Tamrazyan qeyd edib: “Biz Azərbaycanın yürütdüyü siyasətlə bağlı dünya ictimaiyyətinə müraciət edirik. Türklə dostluq mümkün deyil. Tarix göstərdi ki, türklə barış olmaz. Siyasi mənada bir-birinə deyirlər: biz dost olmalıyıq, yəqin ki, bu bir oyundur. Əslində, bunu iddia edənlər də bilir ki, bu mümkün deyil”. Ekspertlər qeyd edir ki, bu aksiya da revanşist qüvvələrin işidir və onlar Azərbaycanla razılığa qarşıdır. Lakin Azərbaycan postmüharibə dövründə ən yüksək səviyyədə bəyan edib ki, Ermənistanda baş qaldıran istənilən revanşist qüvvəyə ən sərt şəkildə cavab veriləcək. Bu şəraitdə Azərbaycanın əməkdaşlıq təklifləri, 2020-ci il noyabrın 10-da və 2021-ci il yanvarın 11-də imzalanmış üçtərəfli bəyanatlar əsasında bu istiqamətdə atdığı addımlar Ermənistan üçün müstəsna əhəmiyyət kəsb edir. Lakin Ermənistanda Azərbaycanın postmüharibə dövründə əməkdaşlıq niyyətini hələ də layiqincə qiymətləndirməyib, revanşist mövqedən çıxış edən qüvvələr mövcuddur. Belə qüvvələr sırasında “Qarabağ klanı” daha çox seçilir. Klanın təmsilçilərindən olan Ermənistanın sabiq prezidenti Robert Köçəryan bu mənada indi daha çox seçilir. Lakin bu zaman Robert Köçəryan və revanşist mövqedən çıxış edən digər qüvvələr unudur ki, Azərbaycan İkinci Qarabağ müharibəsində öz ərazi bütövlüyünü bərpa edib və buna müqavimət göstərməyə çalışan Ermənistan ordusu darmadağın edilib. Bu fonda Ermənistanın revanş üçün nə ordusu, nə də digər imkanları var. O üzdən ermənilərin istənilən təxribat cəhdi də bundan sonra düşmənin məhvi ilə nəticələnəcək.
Samirə SƏFƏROVA
