Azərbaycanın Zəfərə gedən yolu çoxillik dərin və hərtətəfli hazırlıq prosesindən keçdi. Qarabağ Zəfərinə hazırlıq prosesi Azərbaycanın bütün dövlət və ictimai resurslarını vahid rəhbərlik altında səfərbər edərək güclü axına çevirə bildi.
44 günlük müharibənin hər günündə həyata keçirilən əməliyyatlar bir daha sübut etdi ki, hərbi, siyasi, iqtisadi hazırlıqlar illər boyu dəqiq aparılıb. Dünya müharibələr tarixində az sayda faktlar tapmaq olar ki, çox böyük hərbi- siyasi hədəf naminə bütün resursları məqsədyönlü şəkildə toparlamaq bir Liderə bu dərəcədə nəsib olsun. İlham Əliyev Zəfərə aparan yolda dünya tarixinin tək- tək şəxsiyyətlərinin bacara bildiyi nümunəni yaratdı.
Cəmi 1 il əvvələ qədər mümkün olduğu halda bütün qonşu dövlətlərdən ərazi qoparmaq xəyalları quran Ermənistanın kapitulyasiyanı imzalamağa məcbur edilməsi unikal və təsirli tarixi hadisədir. Azərbaycan lideri Ermənistana bütün erməniçiliyin tarixi ərzində görmədiyi məğlubiyyətin acısını yaşatdı. Tarixdə ermənilərin burnunun ovulduğu bir neçə məqam olub. Onlar hər dəfə aldıqları zərbənin məsuliyyətini əks tərəflərin üstünə ataraq məğlub və əzilmiş vəziyyətdən nisbətən güclənmiş şəkildə çıxmağa müvəffəq olublar. İlham Əliyevin Ermənistana yaşatdığı məğlubiyyət isə elə bir analoqsuz hadisədir ki, Ermənistan bundan sonra daha heç vaxt kiməsə təcavüz etmək həddinə qədər özünü düzəldə bilməyəcək. Ermənilər Azərbaycandan və onun liderindən heç vaxt görmədiyi sarsıdıcı zərbəni aldı.
10 noyabr sənədinin xüsusilə Zəngəzur dəhlizinə açdığı perspektivin əhəmiyyəti daha böyükdür. 90-cı illərin əvvəllərində Ermənistan Naxçıvanı blokadaya salaraq sonra onu özünə ilgaq etmək üçün Mehri yolunu əbədi olaraq bağladığını düşünmüşdü. Lakin Azərbaycan Prezidenti məqsədyönlü siyasət nəticəsində ermənilərin Mehri yolunu əbədi bağlı saxlamaq planlarını alt-üst etdi. Prezident Əliyev daha geniş geosiyasi hədəf və məkanı əhatə edən Zəngəzur dəhlizini aktual beynəlxaıq müzakirəyə gətirməklə Ermənistana daha bir ağır zərbə vurdu.
Ermənistanın əbədi bağlı saxlamaq istədiyi Mehri yoluna qarşı İlham Əliyev daha möhtəşəm Zəngəzur dəhlizi planını çıxardı.
Aydın QULİYEV
