Ötən gün Ermənistanın baş naziri Nikol Paşinyan Qafan şəhərinə baş çəkib. Erməni KİV-i xəbər verir ki, Paşinyan hakim “Vətəndaş müqaviləsi” partiyasından Qafan meri postuna namizəd David Danielyanın atasının yasında iştirak etmək üçün Qafana gedib.
Qeyd edək ki, Gorus-Qafan yolunun bir hissəsi hazırda Azərbaycanın nəzarətindədir, yolun Qubadlıdan keçən 22 kilometrlik hissəsində Azərbaycanın sərhəd və polis postları qoyulub, amma Ermənistan nömrə nişanlı avtomobillər hələlik bu yoldan istifadə edə bilir.
Bəs Paşinyan Qafana getmək üçün Azərbaycan ərazisindən keçibmi?
Erməni mediası yazır ki, Paşinyan Qafana Ermənistanı İrana birləşdirən və bir hissəsi Qubadlıdan keçən əsas yolla deyil, Tatev kəndindən keçən və hazırda təmir işləri aparılan alternativ qrunt yolla gedib.
Maraqlıdır, bir vaxtlar Azərbaycanın işğal altında olan ərazilərinə səfər edib, hətta orada yallı belə gedən Paşinyan indi Azərbaycan hərbçilərinin qorxusundan nəzərdə tutulan məntəqəyə asfalt örtüyü olmayan yolla getməyə belə üstünlük verir. Paşinyanın bu addımına hansı qiyməti vermək olar?
“Bir vaxtlar öz daxili yollarını bərpa etməyi unudub Qarabağa yol çəkmək strategiyasını seçən ölkə, indi…”
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, Paşinyanın mənzil başına çatmaq üçün hansı yolu seçdiyi ciddi önəm daşıyır: “Bunun bir adı var: Azərbaycanın yaratdığı reallıqlarla hesablaşmaq. Bəli, bir vaxtlar heç bir beynəlxalq konvensiyaya məhəl qoymayan Paşinyan, hətta “Cıdır düzü”ndə belə yallı getməkdən çəkinmirdi. Ötən il 44 günlük İkinci Qarabağ müharibəsi nəticəsində Azərbaycan Ermənistanın işğalında olan ərazilərin böyük bir hissəsini geri qaytardıqdan sonra Zəngəzur bölgəsində sovet dövrünün sərhədlərinə əsasən Gorus-Qafan magistralının ərazisindən keçən 21 kilometrlik hissəsinə nəzarətini bərpa edib.
Həmin dövrdən yolun bu hissəsində Azərbaycanın müvafiq orqanları ölkəyə daxil olan İran yük maşınlarından rüsum tələb etməyə başladı. Nəticədə Ermənistana yük daşıyan iranlı sürücülər üç dəfə rüsum verməyə məcbur oldular: bir dəfə Ermənistan sərhədini keçəndə, iki dəfə də Azərbaycan ərazisinə daxil olanda və geri qayıdanda. Ermənistanın Gorus və Qafan məntəqələrini birləşdirən bu yol İranla Ermənistan arasındakı dövlətlərarası magistralın bir hissəsidir.
Yaranmış vəziyyətdən çıxmaq üçün Ermənistan hökuməti hazırda mövcud olan və bir hissəsi Azərbaycan ərazisindən keçən Gorus-Qafan yoluna paralel yeni Gorus-Qafan yolu tikmək qərarına gəlib. Bu yol tamamilə Ermənistan ərazisindən keçəcək və Azərbaycan sərhədi ilə kəsişməyəcək.
Əslində yol yenidən salınmır, Sisian kəndindən Qafan istiqamətində gedən M2 dövlətlərarası yol var, amma bu yolun bəzi hissələri bərbaddır, istifadə zamanı çətinliklər yaradır. Təxminən 81 kilometrlik bu yolun Gorus-Tatev hissəsi indi də bütün növ sərnişin və yük nəqliyyat vasitələri üçün yararlıdır və hazırda orada təmir işləri aparılır.
43 kilometr təşkil edən Tatev-Qafan yolunun tikintisinə dövlət büdcəsindən təxminən 11 milyon dollar, Sünik vilayətində yolların tikintisi və təmir işlərinə isə ümumilikdə 18 milyon dollar ayrılıb. Yolun Tatev-Ağvani 12,5 kilometrlik hissəsində yolsalma işləri ötən ildən başlanıb və artıq istifadəyə verilə bilər. İşlərin tam olaraq bu ilin sonunda yekunlaşacağı gözlənilir. Belə-belə reallıqları qəbul edirlər. Bir vaxtlar öz daxili yollarını bərpa etməyi unudub Qarabağa yol çəkmək strategiyasını seçən ölkə, indi zəruri olanı etmək məcburiyyətində qalıb”.
Məhəmmədəli QƏRİBLİ
