Rusiya, Azərbaycan və Ermənistan liderləri – Vladimir Putin, İlham Əliyev və Nikol Paşinyanın noyabrın 9-da Soçi şəhərində görüşəcəyi ilə bağlı yayılan xəbərlər özünü doğrultmadı. Qeyd edək ki, bu məlumatı daha çox erməni və rus mediası dövriyyəyə buraxırdı. Bu barədə Azərbaycan tərəfindən heç bir rəsmi açıqlama yox idi. Məlumatı yayan mənbələr hətta iddia edirdi ki, sözügedən görüşdə tərəflər arasında sülh müqaviləsi də imzalana bilər. Anonsu verilən görüşün baş tutmamasının səbəbini nə ilə izah etmək olar?
“Ermənistan konstruktivlik nümayiş etdirmədiyi üçün Azərbaycan görüş xatirinə görüşdən imtina edə bilər”
Politoloq Əhəd Məmmədli “Bakı-Xəbər”ə açıqlamasında bildirdi ki, noyabr ayının 9-da Vladimir Putin, İlham Əliyev və Nikol Paşinyan arasında üçtərəfli görüşün baş tutmaması ilə bağlı bir sıra mülahizələr irəli sürmək olar: “Sülh müqaviləsinin belə tezliklə imzalanması gözlənilmirdi. Çünki hələ də tam razılaşdırılmayan məsələlər var. Qarabağdakı qanunsuz erməni hərbçiləri tərksilah ediləndən, separatçıların “Artsax” adlandırdığı ərazilər Azərbaycan qanunvericiliyinə keçəndən, sərhədlər tam dəqiqləşəndən sonra sülh müqaviləsi imzalana bilər. Görünən budur ki, ermənilərin Azərbaycan vətəndaşı kimi yaşamağa uyğunlaşdırılması üçün sülhməramlıların bir müddət də sözügedən zonada qalacağı gözlənilir. Hazırda əsas müzakirə olunan məsələ Zəngəzur dəhlizinin açılmasıdır. Çünki Ermənistanın baş naziri Nikol Paşinyan da MDB Dövlət Başçıları Şurasının onlayn iclasında Azərbaycanla Naxçıvanı birləşdirəcək avtomobil və dəmir yollarının açılacağını elan edib. İcrasına start veriləcəyu gözlənilən digər məsələ isə sərhədlərin delimitasiya və demarkasiyasıdır. Hər iki bəndin icrasına təxminən 1 il zaman sərf olunsa, 2022-ci ildə Qarabağdakı qanunsuz erməni hərbi birləşmələrinin tərksilah olunması prosesinə də start verilə bilər. Çünki Rusiyanın regionda mövcudluğu separatçılardan asılı deyil. Onsuz da sülhməramlılar Qarabağda kənd təsərrüfatı ilə məşğul olan ermənilərin təhlükəsizliyini təmin edir və bu bəhanə onların bölgədə uzunmüddətli mövcudluğuna yetərlidir. Mümkündür ki, Azərbaycan tərəfinin bu danışıqlarda iştirakla bağlı ön şərti olub. Birincisi, sərhədlərin delimitasiya və demarkasiyası, ikincisi Zəngəzur dəhlizinin açılması, üçüncüsü isə qarşılıqlı olaraq ərazi bütövlüyünün tanınmasıdır. Azərbaycan qalib ölkə kimi ən qısa müddətdə bu məsələlərin həllində, sülh sazişinin imzalanmasında və regionun inkişafında maraqlıdır. Ermənistan deyilən istiqamətlərdə konstruktivlik nümayiş etdirmədiyi üçün Azərbaycan görüş xatirinə görüşdən imtina edə bilər”.
Bu nəticəni çıxara bilərik ki, Ermənistan nəticəli danışıqlara hələ hazır deyil”.
Məhəmmədəli QƏRİBLİ
