Məlum olduğu kimi, Bakıda Nizami Gəncəvi Beynəlxalq Mərkəzinin təşkilatçılığı ilə “COVID-19-dan sonrakı dünya” mövzusunda növbəti Qlobal Bakı Forumu keçirilib. Forumda dünyanın tanınmış ictimai-siyasi xadimləri, sabiq dövlət və hökumət başçıları, alimlər, ziyalılar, din xadimləri, beynəlxalq qurumların rəhbərləri iştirak edib.
Sayca 8-ci olan Qlobal Bakı Forumu Azərbaycan torpaqlarının işğaldan azad olunmasından sonra ölkəmizdə keçirilən ilk beynəlxalq səviyyəli tədbirdir. Forumda müxtəlif ictimai-siyasi xadimlərin çıxışlarında, həmçinin bir sıra dövlət başçılarının göndərdiyi təbrik məktublarında səsləndirilən fikirlərdən aydın olur ki, beynəlxalq ictimaiyyət Azərbaycan xalqının öz ərazilərini Ermənistan işğalından azad etməsini təqdir, bölgədə sabitliyə gətirəcək yekun sülh müqaviləsinin imzalanmasının zəruriliyini qəbul edir. Məsələn, İsrailə rəhbərlik etmiş siyasi xadimlər Azərbaycanla bağlı dəstək məzmunlu fikirlər səsləndirdilər. Belə ki, 1999-2001-ci illərdə İsrailin baş naziri, sonrakı illərdə müdafiə naziri olan Ehud Barak dedi ki, Azərbaycanın müharibədə Ermənistan üzərində qələbə qazanması çox mühüm tarixi hadisədir: “Azərbaycanın torpaqlarını işğaldan azad etməsi həm də beynəxalq ədalətin yerinə yetirilməsi deməkdir”. Bundan başqa, sabiq xarici işlər naziri Tzipi Livni Prezident İlham Əliyevlə görüşdə dedi ki, tədbirdə çox sayda mötəbər qonağın iştirak etməsi Qlobal Bakı Forumunun əhəmiyyətini bir daha nümayiş etdirir.
O da məlumdur ki, müharibə bir ildir bitsə də, Azərbaycana yönəlik erməni təbliğatı, yalanları davam edir. Guya Azərbaycan hərbi əsirləri hələ da saxlayır, onlara işgəncə verir, tarixi abidələri dağıdır və s. O baxımdan, bütövlükdə forumda iştirak edən tanınmış şəxslərin təəssüratları erməni yalanlarının dünyada ifşa olunmasında nə kimi rol oynayacaq?
“Tədbirdə iştirak edən müxtəlif tanınmış ictimai-siyasi xadimlərin təəssüratları erməni təbliğatına zərbədir”
Məsələyə münasibət bildirən Yeni Yol Partiyasının sədri Ramil Hüseynov hesab edir ki, bu kimi tədbirlər erməni tərəfinin Azərbaycana qarşı apardığı kampaniyanın neytrallaşmasında vacib rol oynaya bilər: “Başlıca olaraq onu nəzərə almalıyıq ki, müharibə hərbi müstəvidə başa çatsa da, siyasi müstəvidə davam edir. Özü də bu, daha gərgin formada gedir. Nəzərə almaq lazımdır ki, erməni millətçiləri, o cümlədən diaspora məğlubiyyəti həzm etmək istəmir. Onlar bütün resurslarını, əlaqələrini səfərbər edərək Azərbaycana qarşı güclü təbliğat kampaniyası aparırlar. Müxtəlif xarici telekanallarda, mətbuat orqanlarında şüvən qoparırlar. O cümlədən, beynəlxalq tədbirlərdən Azərbaycana qarşı təbliğat tribunası kimi istifadə edirlər. Bu günllərdə Böyük Britaniyada ekologiya ilə bağlı keçirilən beynəlxalq tədbirdə Ermənistan prezidenti Armen Sarkisyan Azərbaycanın ünvanına həqiqətə uyğun olmayan fikirlər səsləndirdi. Ona görə də biz hər an necə bir məkrli düşmənlə mübarizə apardığımızın fərqində olmalıyıq. Bakı forumu müharibədən sonra ölkəmizdə keçirilən ilk beynəlxalq tədbir idi. Hiss olunur ki, müharibədən sonra Azərbaycana münasibət dəyişib. Dünya dövlətləri qalib dövlət olmağımızın fərqindədir. Şübhəsiz ki, tədbirdə iştirak edən müxtəlif tanınmış ictimai-siyasi xadimlərin təəssüratları erməni təbliğatına zərbədir. Bu onu göstərir ki, dünyada heç də hamı erməni yalanının təsiri altına düşmür. Reallıqlar ermənilərin təbliğ etdiklərindən tamam fərqlidir”.
Bir sözlə, partiya sədri hesab edir ki, biz maksimum bu kimi tədbirlərdən faydalanmalıyıq.
Vidadi ORDAHALLI
