Son illər qlobal və regional çağırışların müzakirəsi müstəvisində əhəmiyyətli dialoq platformalarından birinə çevrilən Nizami Gəncəvi Beynəlxalq Mərkəzində Azərbaycan Prezidenti İlham Əliyevin himayəsi ilə “COVID-19-dan sonrakı dünya” mövzusunda hibrid formatda keçirilən VIII Qlobal Bakı Forumu günün ən əsas hadisəsi kimi tarixə düşdü. Tədbirdə Prezident İlham Əliyevin çıxışı və toxunduğu məsələlər xüsusi maraq doğurdu.
Çıxışı zamanı Prezident İlham Əliyev Qarabağ müharibəsinin səbəbkarının Ermənistan olmasını tutarlı arqumentlərlə ortaya qoydu. Ölkə başçısının sözlərinə görə, Ermənistan yalnız status-kvonu möhkəmləndirmək, danışıqlar formatını münaqişənin əbədi dondurulması aləti kimi istifadə etməyə cəhd edirdi: “Əvvəlki illərdə Ermənistan hakimiyyəti ATƏT-in Minsk Qrupu çərçivəsində münaqişənin işğal edilmiş ərazilərin boşaldılması yolu ilə həllinə nail olmaq istiqamətində işləmək görüntüsü yaradırdısa, son bir neçə ildə Ermənistan rəhbərliyi işğal olunmuş torpaqların bir qarışını belə qaytarmayacağını artıq açıq şəkildə bəyan edirdi. Bununla bağlı kifayət qədər sübut var. Təkcə Ermənistanın hazırkı baş nazirinin Azərbaycanın işğal olunmuş ərazilərində iki il əvvəl verdiyi bəyanatı qeyd etmək kifayət edər – “Qarabağ Ermənistandır və nöqtə”. Bu, əslində danışıqların sonu idi. Birincisi, bu ziddiyyətli və yalan bəyanat idi, çünki Ermənistan rəhbərliyi iddia edirdi ki, Qarabağ “müstəqil dövlətdir”. Halbuki, Ermənistan da daxil olmaqla, dünyanın heç bir ölkəsi onu tanımamışdı. Digər tərəfdən isə onlar deyirdilər ki, “Qarabağ Ermənistandır”. Yəni bu ziddiyyət Ermənistanın ötən il üzləşdiyi rüsvayçı məğlubiyyətlə nəticələnən təzadlı siyasətinin göstəricisi idi. Digər bir bəyanat Ermənistanın o zamankı müdafiə naziri tərəfindən verilmişdi. O açıq şəkildə bəyan edirdi ki, Ermənistan “yeni ərazilər uğrunda yeni müharibə”yə hazırlaşır”.
Prezident onu da qeyd etdi ki, 2020-ci ilin iyulunda onlar sərhəddə açıq hərbi təxribata əl ataraq, mülki şəxslərimizi və hərbçilərimizi qətlə yetirdilər: “2020-ci ilin avqustunda diversiya qrupu göndərdilər ki, terror aktı törətsinlər. O, zərərsizləşdirildi. Son olaraq sentyabrda onlar Azərbaycanın dinc kəndlərini atəşə tutmağa başladılar”.
Bütün bu deyilənlərin fonunda Prezidentin çıxışı Azərbaycanı müharibənin səbəbkarı kimi təqdim edən Ermənistanın təbliğatını ifşa etməkdə necə rol oynayacaq?
“Bütün bu təxribatlar cavabsız qala bilməzdi”
Sözügedən məsələ ilə bağlı fikirlərini “Bakı-Xəbər”lə bölüşən media eksperti Yadigar Məmmədlinin fikrincə, cənab Prezident çıxışı zamanı böyük siyasi ustalıqla və ardıcıllıqla Ermənistanın təxribatlarını sıraladı: “Prezident bununla bir daha dünya ictimaiyyətinə bildirdi ki, Ermənistan məqsədyönlü şəkildə Azərbaycanı müharibəyə sövq etdi. Çünki Ermənistan həm siyasi, həm də hərbi müstəvidə bu yöndə təxribatçı fəaliyyətlə məşğul idi. Prezident çıxışında bunların arasında olan əlaqəni tədbir iştirakçılarının diqqətinə çatdırdı. Məsələ ondadır ki, Paşinyanın Qarabağ danışıqlarını açıq şəkildə iqnor etməsi və digər tərəfdən Ermənistanın hərbi müstəvidə təxribatlara rəvac vrməsi müharibəni qaçılmaz etdi. Prezident 27 sentyabra qədər olan prosesləri aydın formada forum iştirakçılarının diqqətinə çatdırdı. Məsələ ondadır ki, Paşinyanın “Qarabağ Ermənistandır” açıqlaması işğalçı ölkəni himayə edən həmsədrləri də pis vəziyyətdə qoydu. Onları bir növ fakt qarşısında qoydu. Bu isə diplomatik imkanların tükənməsi anlamına gəlir. Aydın məsələdir ki, bütün bu təxribatlar cavabsız qala bilməzdi. Nəticədə bu, böyük bir müharibəyə çevrildi. Prezidentin bütün bunları ardıcıllıqla qeyd etməsi Ermənistanın yalançı təbliğatına tutarlı zərbə oldu. Bir daha bəlli oldu ki, 27 sentyabra qədər bir sıra siyasi-hərbi təxribatlar baş verib ki, bütün bunlara görə məsuliyyət məhz Ermənistanın üzərinə düşür. Dünya artıq əvvəlki dünya deyil. Ermənistan öz lobbi resurslarından istifadə etsə də, beynəlxalq ictimaiyyəti aldada bilməyəcək. Belə mötəbər tədbirlərdə bütün bunların deyilməsinə ehtiyac var. Ona görə ki, ermənilər saxta əsaslarla bizə qarşı kampaniya aparırlar”.
Media eksperti hesab edir ki, biz davamlı olaraq erməni saxtakarlığını ifşa etməliyik.
Vidadi ORDAHALLI
